Hechos 6

1Laab tiem ze', ornu bi ryañ zir de mbecy nu ricy cup consuel lo Crisht, orze' de mbecy Israeel nu rnii griego nu de mbecy Israeel nu rnii hebreo, riidz guledz, bdza' dey ni losa'y. De mbecy nu rnii griego mnii dey nu wagyicy paa mbecy ornu rgyeez dey de coz nu gow byud nu yu' lat dey. 2Orze' trocyup de aposht ze' bredz dey de mbecy nu ricy cup consuel lo Crisht. Orze' na dey rab yu dey: ―Walab se'ñ nu checa̱ de̱ nu ne̱e̱ de riidz ni Ñgyoozh par nu lyu̱u̱ de̱ ni der nu lac mod gyicy nu der de coz nu gow de mbecy. 3Orze' de ru bicy na, laab lat der bloo su gagy yu gyeey, de yu nu rca lagy der lo. Rlagy ñi mbecy nu riib ic za' la Espiriit Yon ni Ñgyoozh nañ lardoo, nunu rlagy ñi mbecy nu yu' shcab ni. Orze' de̱ ya̱ du̱' de̱ riiñ ze' yaa dey. 4Ze' de̱ ya̱, dub laa tiem ne̱e̱ du̱ de̱ Ñgyoozh, nunu shaal de̱ de riidz nim ―na dey. 5Orze' dela mbecy bet lagy dey riidz nu mnii de aposht ze'. Orze' bloo su dey Shteb, tub mbecy nu tona' la fert ricy cup consuel lo Crisht. Nunu riib ic za' la Espiriit Yon ni Ñgyoozh nañ lardooy. Gush lañ: Lip, nu Proc, nu Nicanor, nu Timón, nu Parmenas, nu Lyaa, tub mbecy nu gul Antioquía. De uz yu walab mbecy Israeel, tees ub yu gush yu leey ni mbecy Israeel. Dela yu ze' bloo su dey. 6Orze' de mbecy gua nu dey yu lo de aposht. Orze' de aposht briib yaay too tub ga dey, nunu mnii nu dey Ñgyoozh nu nac dey. 7Orze' zaab drush las la de riidz ni Ñgyoozh. Orze' tona' la byañ de mbecy nu ricy cup consuel lo Crisht Jerusaleeng. Gashtal zigy de uz ni de mbecy Israeel bicy cup dey consuel lo Crisht. 8Orze' yu nu la Shteb ze', tona' la nap bicy nu Ñgyoozh yu nunu dzi rcyiiñ yu nu gyicy yu coz nu rlagy mi. Bicy yu zañ nusuriidz, nunu zañ coz nu za nu ic mbecy bicy yu. 9Tees yu' la be mbecy nu gua contr niy. Yu' mbecy nu bruu lat de mbecy nu rza nañ yu' nu rsya' de mbecy riidz ni Ñgyoozh, yu' nu la Yu' ni De Mbecy nu Bdulaa Yaa. Yu' mbecy nu bruu Cirene, yu' mbecy nu bruu Alejandría, yu' mbecy Cilicia. Yu' ga' mbecy nu bruu lo de yu nu la Asia. Orze' brugyi' ro zi dey riidz nu Shteb. 10Tees Espiriit Yon ni Ñgyoozh pshaal mi shcab ni Shteb. Par nu tona' la nap mniiy, wangaca' la nii de mbecy nu radzay. 11Orze' briish dey ni mbecy par nu riib yu cyi fals ic Shteb. Orze' na de mbecy ze': ―De̱ ya̱ güeña̱ nu Shteb rniiy riidz nu za contr ni Moisees, nu riidz nu za contr ni Ñgyoozh ―na dey. 12Ni mod pcha' dey ic de mbecy. Pcha' dey ic de yu bel, nunu pcha' dey ic de yu nu rlyuu leey ni Ñgyoozh. Orze' gua dey lo Shteb pshet yaa dey yu. Gua nu dey yu lo de yu nu yu' junt zub lo ze'. 13Gaze' nu gua nu dey la be de mbecy nu briib cyi fals ic Shteb. Orze' na dey: ―Mbecy ii zaab rnii lay riidz nu za contr ni yu' yon nu driib zily den Ñgyoozh, nunu rniiy riidz nu za contr ni leey nu bzeeñ Moisees. 14Gun güeñ de̱ nu mniiy nu Jesuuz, tub mbecy nu pcyiiñ Nazaret, tily yu yu' yon ni Ñgyoozh nin, nunu rchaay de cushtom nu bzeeñ Moisees ni de gyitoo bel ―na dey. 15Orze' dela mbecy nu nguaa lat junt ze' bgüii dey lo Shteb. Orze' bzaac dey nu rgüiiy gal nu rgüii tub anc.

will be added

X\