Hechos 5

1Ze' zu tub mbecy nu la Ananías. Mñaay lam Safira. Orze' biit dey tub nac yu niy. 2Pcaa chuy tub nac tiñ par ub yu. Orze' bzeeñ yu de' zir tiñ ze' yaa de aposht. Nunu gud lagy mñaay dela coz nu bicy yu. 3Orze' na Bed rab yuy: ―Ananías, walab se'ñ nu bzaan ru nu nuras gyicy yu nu guur Espiriit Yon ni Ñgyoozh ornu pcaa chur ñuu tiñ ni yu nir par ub ru. 4Anzir nu cut ru yu ze', orze' nac ñii coz nir. Na ornu biit ru ñii, ni' zi'l tiñ nu guud nir ze' nac ñii coz nir. Orze' ¿lagu ni mnii toor nu bguur? Ru bguur Ñgyoozh. Walab mbecy bguur ―na Bed. 5Orze' cuanzir nu güeñ Ananías de riidz ze', orze' wes saa lay lo yu, nunu gut lay. Orze' dela mbecy, ornu gud lagy dey nu gut yu, dela dey gudzib yu. 6Orze' wes su la be yu feñ. Orze' ptiish dey yu negy. Orze' za nu dey yu nu cach yuy. 7Na ornu bi bi bded nu bza' chon or, orze' bru'ña mñaay tees wangad lagy mi la guc. 8Orze' na Bed rab yum: ―Mnii ben ¿a rishli a nde' dela tiñ nu guud ornu biit der yu nir? ―nay. Orze' nam: ―Laab nde' dela tiñ nu guud ―nam. 9Orze' na Bed rab yum: ―¿Lagu bicy der preb Espiriit Yon ni Ñgyoozh nu ñgyeer? Bzuub gyidag rzigy gyi' de yu nu yeed nu gua cach ñgyeer. Bi yeed dey ro' ii, nunu ni' zi'l cha nu dey ru ―nay. 10Orze' lueg la wes saa ga' lam garee la lo Bed. Orze' gut lam. Orze' bru'ña de yu feñ ze'. Bzaac dey nu mbish mi gut mi. Orze' za nu' la dey mi. Pcach dey mi laab cuit ñgyeem. 11Orze' dela de mbecy ni Crisht nu de' zir de mbecy, ornu güeñ dey nu ni guc, orze' tona' la gudzib dey. 12Na orze' de aposht bicy dey zañ nusuriidz, nunu bicy dey zañ coz nu za nu ic mbecy. Orze' dela mbecy nu ricy cup consuel lo Crisht byatublaazh dey tub lugaar nu la Coredoor ni Salomoong. 13Ni tub la de mbecy nu a̱' ricy cup consuel lo Crisht walagy yu chu'y lat dey, tees dela mbecy gyedz mnii nap yu ni dey. 14Orze' dzi zir ryañ de mbecy nu ricy cup consuel lo Ñgyoozh: tant yu gyeey nunu tant biñ mñaa. Orze' tona' la mbecy zigy byac. 15Par nu nac de coz nu bicy de aposht, orze' nde' nu de mbecy gua nu dey de mbecy rat gyernez. Orze' brish dey yu lo nuun nu lo da', gun ornu ded Bed ben a wal mas ñuu sheñ yu de mbecy rat ze'. 16Nunu tona' la bru'ña de mbecy zigy nu yu' de gyedz nu ri gaab ga Jerusaleeng. Gua nu dey de mbecy rat, nunu gua nu dey de mbecy nu bicy ni nuras. Nunu dela dey byac yu. 17Orze' gusaap lagy yu nu riib ic de uz ni mbecy Israeel, gal nu de yu nu nac nuy, de yu nu nac nu leey ni de mbecy saduceo. Orze' bicy dey tub zi'l riidz nu shiñ gyicy nu dey de aposht. 18Orze' pshet yaa dey de aposht. Gua nu dey yu yu' gyiib. 19Tees laab rel ze' bru'ña tub anc ni Ñgyoozh. Orze' pshaal yu ro' ni yu' gyiib ze'. Orze' blooy dey par ich yu'. Orze' nay rab yu dey: 20―Gua der ze' nu driib zily de mbecy Ñgyoozh. Orze' shaal der lo de mbecy de riidz nu rnii lac mod gyicy de mbecy ni Crisht ―nay. 21Orze' de aposht bicy yac dey gal nu mnii anc ze'. Or bza' yu tuuba' dzi, orze' gua dey ze' nu zub yu' nu driib zily de mbecy Ñgyoozh. Orze' brugyi' rlyuu dey ni de mbecy. Na yu nu riib ic de uz nu de' zir losa'y bredz dey de yu bel nu zu riiñ ni junt zub lo nu gyatublaazh dey. Orze' bzeed dey raso̱o̱ lo de yu nu rña ro' gyiib ze' nu coy de aposht nu cha nuy yu lo dey. 22Tees ornu bru'ña de yu nu za nu raso̱o̱ ro' gyiib, orze' wangyada' de aposht ni dey. Orze' bish cya ga' dey yay lo de mbecy nu yu' junt ze'. Orze' nay rab yu dey: 23―Ornu bru'ña de̱ ro' gyiib, orze' noow nicy lañ. Nunu yu' de yu nu rña ro' ze'. Tees ornu pshaal de̱ ro', orze' bzaac de̱ nu saca' ni tuba' la mbecy ze' nañ ñi ―na dey. 24Na ornu güeñ yu nu riib ic de yu nu rña yu' ze', nunu ornu güeñ de uz zub lo, orze' brugyi' rash dey shcab nu la zi coz yad ñi nu gac par lo. 25Gaze' nu bru'ña tub mbecy. Orze' nay rab yu dey: ―Güii der, de mbecy nu mne' der nañ yu' gyiib, yu'y loli' ni yu' nu driib zily den Ñgyoozh. Rlyuu dey ni de mbecy ―nay. 26Orze' tub yu nu riib ic de mbecy nu rña yu' nu driib zily mbecy Ñgyoozh nu de yu nu rña yu' ze' gua tee dey de aposht. Gua nu dey yu lo de yu nu zu riiñ ni junt ze'. Tees walab por fers la gua nu dey yu, gun rdzib dey lo de mbecy zigy nis shet dey gyita' too dey. 27Orze' bicy dey nu gu' de aposht nañ yu' ze'. Bzu dey yu par ze' nu ta' lo de mbecy nu yu' junt ze'. Orze' yu nu riib ic de uz nay rab yu de aposht: 28―De̱ ya̱ fert pca̱a̱ de̱ der nu cue' lyuu der ni de mbecy nu nac mbecy ze', tees ¡na güii la bicy der! De ru ptush las der riidz, nunu rlyuu der dutuub la Jerusaleeng. Nunu de ru rlagy ru gyicy ru nu de̱ ya̱ yu' falt ne̱ nu gut yu ―na dey. 29Orze' na Bed nu de' zir de aposht: ―Rlagy ñi nu zuub gyidag de̱ ni Ñgyoozh walab ni mbecy. 30Ñgyoozh, biñ nu briib zily de gyitoo bel ni den, bicy mi nu byabañ Jesuuz, biñ nu biit der ornu pcaa der mi lo cruuz. 31Orze' Ñgyoozh bicy zily mi mi ze'. Gusub mi par yaa bee Ñgyoozh. Byac mi biñ nu riib ic, nunu biñ nu rboo mbañ de mbecy, gun orze' gad mod nu ne' de mbecy Israeel de coz cyi nu ricy yu. Nunu gyicy sulagy Ñgyoozh de cyi nu ricy dey. 32De̱ ya̱ rne̱e̱ de coz nu bzaac de̱ lo de mbecy. Ni ricy de̱ nu nac Espiriit Yon ni Ñgyoozh, biñ nu briic Ñgyoozh ni de yu nu rzuub gyidag nim ―na dey. 33Na ornu güeñ de yu nu yu' junt ze' de riidz nu mnii de aposht, orze' tona' la guzi lagy dey. Orze' ngulagy dey ñgyut yu de aposht. 34Tees lat de mbecy ze' ri tub yu nu la Gamaliel. Guc yu mbecy fariseo. Guc yu tub mbecy nu rlyuu leey ni Ñgyoozh. Nunu dela mbecy pca lagy dey loy. Orze' yu ze' wes suy lat de mbecy nu yu' junt ze'. Orze' pcaay de mbecy nu co chu dey de aposht tub miiñ. 35Orze' nay rab yu de mbecy nu yu' junt ze': ―De ru mbecy Israeel, cuidad der nu nac coz nu rlagy ru gyicy nur de mbecy ii. 36Rad lagy der nu bi rac tiem bruu zac Teudas. Mniiy nu nac yu tub mbecy lily. Nunu tub tap gaynal mbecy gusa nu dey yu. Tees biit mbecy yu, nunu brush las de yu nu gusa nuy. Orze' guca de coz nu bicy yu. 37Orze' despuees bruu zaca' Judas, yu nu gul Galilea. Tiem ze' bruu ña'n de mbecy. Ni' yu ze' gusa nu mbecy yu. Tees biita' mbecy yu, nunu brush lasa' de yu nu gusa nuy. 38Orze' ni' zi'l rac na. Orze' ya̱ rdo̱o̱ rishlo der nu cue' shiñ gyicy nu der de yu ii. Blaa der dey, gun benu coz nu rboo ic ub zi'l dey o benu coz nu ricy dey, nde' coz ni mbecy zi'l, orze' nit loñ. 39Tees benu nde' coz nu bruu lo Ñgyoozh, orze' rila wac nit lo der ñii. Cuidad der nis cha der contr ni Ñgyoozh ―nay. Orze' de mbecy nu yu' junt ze' bicy yac dey nu consef ni Gamaliel. 40Orze' bredz dey de aposht. Gaze' nu bgaaz dey yu. Gaze' nu pcaa dey yu nu rila cue' ga' nii dey nu nac Jesuuz. Gaze' nu blaa dey yu. 41Orze' bruu de aposht lo de mbecy nu gu' junt ze'. Orze' tona' la bet lagy dey, gun Ñgyoozh bicy mi nu byap dey nu gzac ziy, nunu byap dey nu bruu gyel mbecy ni dey nu nac Jesuuz. 42Nunu de dzi la zaab rlyuu la dey ni de mbecy ze' nu zub yu' nu driib zily de mbecy Ñgyoozh, gal nu nañ yu' ni mbecy, nunu zaab rshaal la dey lo de mbecy de riidz nu sac ni Jesuuz, biñ nu ca lo cuen nu co mbañ mbecy.

will be added

X\