Hechos 4

1Lat nu zu Bed nu Waa, rniiy lo de mbecy zigy, orze' bru'ña de uz ni de mbecy Israeel, nunu bru'ña de yu nu rña yu' nu driib zily mbecy Ñgyoozh, nunu bru'ña de mbecy saduceo. 2Pcha' ic dey, gun blyuu Bed ni de mbecy nu Jesuuz byabañ mi. Nunu nde' cuic ñi nu gad lagy de mbecy nu gyabañ dela mbecy gut. 3Orze' bdu' yaa dey Bed. Mne' dey yu nañ yu' gyiib. Orze' gal ze' byeeñ yu gal tuuba' dzi, gun bi gudze. 4Ze' zigy mbecy nu güeñ de riidz nu mnii Bed, bicy cup dey consuel lo Jesuuz. Orze' byañ dey. Nu rnii tub gaay miily dey byac yu orze'. 5Orze' tuuba' dzi byatublaazh zigy mbecy zub lo ni de mbecy Israeel. Yu' de yu nu riib ic de mbecy Israeel. Yu' ga' de yu bel ni dey. Yu' de yu rlyuu leey ni mbecy Israeel. 6Byatublaazh dey Jerusaleeng nu Anás, yu nu riib ic de uz ni de mbecy Israeel, nu Caifás, nu Waa, nu Alejandro, nu de' zir de yu nu nac famil ni yu nu riib ic de uz ze'. 7Orze' bzuu nez dey mbecy nu cha tee dey Bed nu Waa. Orze' bzuub dey yu lat dey. Orze' na dey rab yuy: ―¿Lac guc nu rac ricy der nii?, o ¿cyu briic rishbeey nu ni gyicy der? ―na dey. 8Orze' Espiriit Yon ni Ñgyoozh riib ic za' lam nañ lardoo Bed. Orze' nay rab yu dey: ―De ru, yu nu riib ic ledz na, gal nu de ru yu bel, 9benu rgugyi' der par nu nac coz nap nu bicy de̱ nu mbecy coj ze', nunu par nu gad lagy der lac mod byac yu, 10orze' ya̱ rica̱ nu gad lagy de ru gal nu dela mbecy Israeel nu nu nac rishbeey ni Jesucrisht, biñ nu pcyiiñ Nazaret, byac yu ii, nunu nde' nu zuy lat dela der ii na la. Laab mi ze' biñ nu pcaa der lo cruuz. Tees Ñgyoozh bicy mi nu byabañ mi. 11Jesuuz nam gal nu na tub gyita'. Ze' de ru nar gal na biryu. Gyita' ze' mne' der ñii, tees na byac ñi gyita' zub lo zir. 12Nu nac Jesucrisht zi'l gac ruu mbañ den, gun Ñgyoozh wansat mi ni tuba' la mbecy gyishlombecy ii lo den nu co mbañ de ub na ―na Bed. 13Orze' de mbecy nu zu riiñ ze' tona' la za nu ic yu, ornu bzaac dey nu wachib la Bed nu Waa mniiy, mas nac dey mbecy cualcyer la. A̱' yu' lo dey gyicy. Tees de mbecy nu zu riiñ ze' byu' lo dey yu nu nac yu mbecy nu gusa nu Jesuuz. 14Tees wangaca' nii dey gun bzaac dey mbecy nu byac ze'. Zuy nu Bed nu Waa. 15Orze' bzuu nez dey Bed nu Waa nu ruu dey lat de mbecy ze'. Orze' brugyi' ro nu dey losa'y riidz. 16Orze' na dey: ―¿Lac gyicy tun dey? Dela mbecy nu yu' Jerusaleeng gad lagy dey nu bicy dey nusuriidz ze' nunu wac niin nu walab ni. 17Tees par nu cue' gad lagy zir mbecy de riidz nu rnii dey, rlagy ñi nu gyicy den mandaar lo dey nu bee na zi'l par lo rila cue' ga' nii dey nu nac Jesuuz ―na dey. 18Orze' bredz dey Bed nu Waa. Orze' mnii dey lo dey nu rila cue' ga' nii dey, nunu cue' lyuu dey nu nac Jesuuz. 19Orze' na Bed nu Waa rab yu dey: ―Gush der shcab ben ca na nu nap zir par lo Ñgyoozh: a nu zuub gyidag de̱ ni de ru uti nu zuub gyidag de̱ nim. 20Gun wac checa̱ de̱ nu zat de̱ de coz nu bzaaca̱, gal nu de riidz nu güeña̱ ―na dey. 21Orze' fert zir mnii dey lo Bed nu lo Waa nu cue' ni gyicy dey. Orze' blaa dey yu. Wangad la mod nu mbic dey cashtig ni dey, gun dela mbecy ryabic dey gyel mbecy ni Ñgyoozh par nu nac de coz nu bzaac dey, 22gun mbecy nu byac nu mod ni nusuriidz ze', yu ze' bded cyuu ña'n yu'y. 23Cuanzir nu blaa dey Bed nu Waa, orze' bish cya ga' dey zay lo de losa'y. Orze' briic dey nu gad lagy de yu ze' de coz nu mnii de uz ni de mbecy Israeel, gal nu de yu bel ni dey. 24Ornu güeñ dey nde', orze' mnii nu dey Ñgyoozh tublaazh la. Orze' na dey rab yum: ―Shuaan de̱, ru nac ru biñ nu psa' lagy baa nu gyishlombecy, nu nisyudoo, nu dela coz. 25Ru mniir ornu Espiriit Yon nir pcaam gyitoo bel ne̱ de̱ Dabi, yu nu bicy dela coz nu mniir, ornu mniiy: ¿Lagu dzi guzi lagy de mbecy nu walab mbecy Israeel? ¿Lagu bicy dey mod ton par nu gyicy yu gan Ñgyoozh? 26De rey nu de yu nu zu riiñ bi bzu lily dey nu chucooy nu Ñgyoozh. Byatublaazh dey nu zay contr nim, nunu zay contr ni biñ nu bloo sum, na Dabi. 27’Gun laab Herodes nu Poncio Pilato byatublaazh dey gyedz ii nuy de mbecy nu walab mbecy Israeel, gal nu de mbecy Israeel par nu cha dey contr ni Jesuuz. Jesuuz nac mi biñ Yon nu bicy yac dela coz nu ru mniir. Jesuuz nac mi Mesías, biñ nu ca lo cuen nu co mbañ mbecy. 28Tees byatublaazh dey gun bicy yu dela coz nu bi bloo ic ru nu gac. Ru bloo ic ru nde', gun ru ricy cup ru mod nu ni gyicy ru, nunu nde' mod nu rlagy ru. 29Orze' ru, Ñgyoozh, bdu' cuen ni nu rnii zi dey ne̱ de̱, nunu doo baloor ne̱ de̱ par nu wadzib la de̱ ne̱e̱ de riidz nu ruu lor. 30Gun orze' gyicy ru nu gzac dela mbecy nu dzi coz ily gyicy ru. Ricy yac ru de mbecy rat, nunu ricy ru nusuriidz nu nac Jesuuz, biñ Yon nu bicy yac dela coz nu mniir ―na dey rab yu Ñgyoozh. 31Ornu blazh mnii nu dey Ñgyoozh, orze' bicy mi nu briib duru lugaar ze' nu byatublaazh dey ze'. Orze' Espiriit Yon nim gutib ic za' lam nañ lardoo tub ga la dey. Orze' brugyi' nu wachib la dey rniiy de riidz nu bruu lo Ñgyoozh. 32Dela de mbecy nu bicy cup consuel lo Crisht bicy dey tub zi'l shcab. Ni tub la mbecy wangyicy yu nu de coz niy, nde' coz par ub zi'l yu. Orze' dela coz nac ñii ni delay. 33Nunu fert la bzat de aposht nu byabañ Crisht lo de mbecy. Nunu Ñgyoozh briic mi de gyel nap ni dela dey. 34Sac ni tub mbecy lat dey nu ricy falt la coz niy. De yu nu mbish yu ni, biit yu yu niy. Ze' de yu nu zub yu', biit yu yu'y. Orze' gua nu dey tiñ nu guud niy. 35Orze' bzeeñ dey ñi yaa de aposht. Orze' bleez dey de tiñ ze' ni de mbecy dub gal lac ga lagy tub ga dey. 36Ni mod bicy tub mbecy nu la See. Yu ze' nez Leví. Gul yu Chipre, tees de aposht bloo la dey yu Bernabee. Riidz ze' yaruuñ: Yu nu rbic consuel. 37Mbish tub nac yu niy. Orze' biit yu yu ze' niy. Orze' gua zeeñ yu tiñ yaa de aposht.

will be added

X\