Hechos 3

1Tub dzi Bed nu Waa rca dey zay par ic tublaazh la. Za dey ze' nu zub yu' nu driib zily mbecy Ñgyoozh. Bi yu'n tub gyiib chon or gudze. Nde' or nu rnii nu mbecy Ñgyoozh. 2Orze' tub mbecy nu nil coj la ornu gul, de dzi la rza nu mbecy yu. Rzuub dey yu gyero' nu la Ro' Cyit Na. Laab ro' ni yu' nu driib zily dey Ñgyoozh. Rza nu dey mbecy coj ze' rzuub dey yu ze' par nu rgyiiñ yu gun lo de mbecy nu rzu' nañ yu' ze'. 3Na ornu bzaac yu Bed nu Waa nu se nu chu' zi'l dey nañ yu' ze', orze' bdiiñ yu gun lo dey. 4Orze' rgüii dey loy. Gaze' nu na Bed rab yuy: ―Bgüii lo̱ de̱ ―nay. 5Orze' mbecy coj ze' mbi la bgüiiy lo dey, gun psa' lagy yu nu la zi coz cuic dey niy. 6Tees Bed nay rab yuy: ―Rila sac tiñ ne̱ nu rica̱ nir, tees coz nu ricy cupa̱ gac rica̱ nir. Nu rishbeey ni Jesucrisht, biñ nu pcyiiñ Nazaret, ya̱ rne̱e̱ du̱ ru wes su nunu bza ―nay. 7Gaze' nu bdu' yaa Bed yaa bee mbecy coj ze' pshes suy yu. Orze' lueg la byanap lab yu, nunu byanap yeñ gyi'y. 8Orze' rzab lay wes suy, nunu brugyi' lay rzay. Gaze' nu gu' nuy dey nañ yu' nu driib zily mbecy Ñgyoozh. Rza lay, nunu yes nañ yu, nunu brugyi' ryabic yu gyel mbecy ni Ñgyoozh. 9Orze' dela de mbecy zigy bzaac dey nu rac rzay, nunu ryabic yu gyel mbecy ni Ñgyoozh. 10Se nu za nu zi'l ic dey, nunu bdzo'w laa dey nu nac coz nu guc nu yu ze', gun byu' lo dey yu nu laab yu nu rzub rgyiiñ gun gyero' nu la Ro' Cyit Na ni yu' nu driib zily mbecy Ñgyoozh. 11Ze' mbecy nu guc coj ze' waglaa ga' la yaay Bed nu Waa. Nunu dela de mbecy za nu la ic dey. Nunu orze' lueg la byatublaazh dey par ru' tub coredoor ni yu' nu driib zily mbecy Ñgyoozh. Coredoor ze' lañ Coredoor ni Salomoong. 12Ornu bzaac Bed de nde', orze' nay rab yu dela mbecy: ―Der mbecy Israeel, ¿lagu dzi za nu ic der nu nac nii? ¿Lagu dzi rgüii der lo̱ de̱? Walab nu dzi rcyiiñ de ub zi'l de̱, nunu walab nu dzi nac du̱ de̱ Ñgyoozh, walab nde' nu rac rza mbecy ii. 13Ñgyoozh, biñ nu guc nu de gyitoo bel ni den, Abraham, Isaac nu Jacob, laab mi ze' ricy zily mi I'ñ mi Jesuuz tiem na. De ru bgu' der mi yaa de mbecy nu riib ic. De ru mnii zi der nim mas tiem nu ngulagy Pilato nlaay mi. 14Mi ze' biñ yon, biñ nu sac cyi, tees de ru mne' der mi. Lugaar nu nii der nu ndulaa mi ze', ca tub yu nu rut mbecy mnii der nu dulaay. 15Orze' biit der mi ze', biñ nu rbic gyel mbañ. Tees Ñgyoozh bicy mi nu byabañ mi. 16Laab nu nac Jesuuz ze', byanap gyi' mbecy ii, gun de̱ ya̱ ricy cup de̱ consuel lom. Nunu yu ii, yu nu nil rzac der, nunu yu' lo der yu. Nu nac nu ricy cup de̱ consuel lom, nde' nu byac nap lay lo rgüii la dela der. 17’Der bicy na, ya̱ rad lagya̱ nu de ru gal nu de yu nu riib ic ni der, ornu biit der Jesuuz, rishli gaal wangyet lag nap der cuen coz nu bicy ru. 18Ni guc gun byu' ni de coz nu gulas bi mnii Ñgyoozh nu nac de yu nu mnii por cuen nim. Mniim nu Mesías, biñ nu ca lo cuen nu co mbañ mbecy rlagy ñi nu zac zim. 19Nde' nu na mne' der dela de coz cyi nu ricy ru. “O” mnii der ni Ñgyoozh, gun orze' cyib mi dela cyi der. Gun orze' gyicy mi nu cyid tiem nu gad nu zu lagy der nañ lardoor como nac num der. 20Nunu zeed mi Jesuuz. Mi ze' Mesías, biñ nu nil nese gulas bi bloo sum par de ru. 21Mi ze' rlagy ñi cyiiñ mi gyibaa gal shuub la dzi nu gzu nap Ñgyoozh dela coz gal nu bi mnii de mbecy nu bloo sum nu mnii por cuen nim gulas. 22Gun Moisees nay rab yu de gyitoo bel ni den: “Ñgyoozh, Shuaan den, gzeed mi tuuba' mbecy nu nii por cuen nim gal nu bzeed mi ya̱. Mbecy ze' laab lat losa' zi'l der gruuy. Rlagy ñi zuub gyidag der dela coz nu gniiy. 23Cyu zi'l mbecy nu wazuub gyidag ni mbecy nu nii por cuen nim ze', dela dey zu chum yu, nunu nit lom yu”, na Moisees. 24’Dela de yu nu mnii por cuen ni Ñgyoozh, gaal zi gush ñi nese Samueel, nu de' zir dey, dela de yu ze' bi mnii dey coz nu rac tiem na. 25Yaa de ru gyiyeeñ dela gyel nap nu mnii Ñgyoozh nu segur la cuic mi: de coz nu mniim lo de yu nu mnii por cuen nim nu nii dey. Nunu yaa de ru gyiyeeñ dela gyel nap ni trat nu bicy Ñgyoozh num de gyitoo bel ni den, ornu nam rab mi Abraham: “Nu nac nez ru cyid gyel nap lat dela mbecy nu yu' gyishlombecy”, nam. 26Orze' ornu bicy mi nu byabañ I'ñ mi, nu loga la bzeed mi mi ze' nu cyid mi lat de ru nu gyicy mi coz nap num der. Ni bicy mi gun orze' tub ga la der gruur lo de coz cyi nu ricy ru ―na Bed.

will be added

X\