Hechos 28

1Na ornu bri̱ nap de̱ lo yu, orze' gud lagy de̱ nu nde' tub nac yu nu ri lo nisyudoo nu la Malta. 2De mbecy nu guledz, de yu ze' tona' la nap bicy nu dey de̱ ya̱. Bet gyey, nunu dzi rag. Gaze' nu pcuaa dey tub nac gyi ily, nunu mnii dey nu cuidz de̱ gyi ze'. 3Orze' Baly bicy tublaazh yu tub nac yag wach. Orze' pcuaay ñi lo gyi ze'. Par nu nac nu dzi zig, orze' bruu tub bily lat yag ze' nu ricy pee ma cha ma. Orze' pshet la ru' ma yaa Baly. 4Na ornu bzaac de mbecy guledz nu zaab gyi̱ bily ze' yaa Baly. Orze' na dey rab yu losa'y: ―Rabee nu yu re nac yu tub mbecy nu rut losa'. Tees wasaan gyel fushtiz ni Ñgyoozh nu cui mbañ yu mas bruu nap yu lo nisyudoo ―na dey. 5Tees Baly bdib yaay. Orze' pshet lag yu bily ze' lo gyi. Nunu se la la bzac yu. 6Dela mbecy blez yu nu chegyi Baly o nu derepent la gyes saay gat yu. Tees ornu bi guchi rbez dey, nunu rgüii dey nu se la la bzac yu, orze' reña' mod mnii too dey. Gaze' nu na dey: ―Yu re tub ñgyoozh ―na dey. 7Gaab ga lugaar ze' mbish yu ni tub mbecy nu la Publio, yu ze' riib ic yu yu nu ri lo nisyudoo ze'. Orze' bredz yu de̱, nunu nap bicy nuy de̱ lat chon dzi nu pcyiiñ de̱ loy. 8Na uz Publio mbish yu nu rat yu. Rcaañ zig niy, nunu druyuuy. Orze' Baly gua güiiy yu. Na ornu blazh mnii nu Baly Ñgyoozh nu nac yu, orze' briib yaay yu. Orze' byac yu. 9Na ornu bi bded nde', orze' dela mbecy rat nu yu' lo yu nu ri lo nisyudoo ze' guay lo Baly. Orze' byac dey. 10Orze' briic dey zañ coz gane̱ de̱. Nunu ornu gu̱' de̱ nañ tuuba' barc, orze' briic dey dela coz nu cyiiñ ne̱ de̱ nez nu cha̱. 11Na ornu blazh chon beey, orze' gu̱' de̱ nañ tub barc ni de mbecy Alejandría. Lo barc ze' ca cyup nab ñgyoozh nu la Cástor nu Pólux. Barc ze' byeeñ ñi Malta lascyey. Gaze' nu gu̱' de̱ nañ ñi za̱ de̱. 12Orze' bri̱ de̱ tub gyedz nu ri ru' nisyudoo nu la Siracusa. Ze' pcyiiñ de̱ chon dzi. 13Gaze' nu bru̱u̱ de̱ ze'. Za̱ de̱ tub ru' yu la ni lugaar ze'. Orze' bru'ña de̱ tub gyedz nu la Regio. Orze' tuuba' dzi brugyi' nu druu bi par yaa been ornu güiin ze' nu driib doo. Orze' za̱ de̱. Na ornu bza' cyup dzi, orze' bri̱ de̱ tub gyedz nu la Puteoli. 14Ze' byap de̱ la be mbecy nu ricy cup consuel lo Crisht. De yu ze' bredz dey de̱ ya̱ par nu cyiiñ du̱ de̱ yu tub shuñ dzi. Orze' bru̱u̱ de̱ ze'. Za̱ de̱ par Rom. 15De bicy na nu yu' Rom, ornu güeñ dey nu za̱ de̱, orze' gua cheel dey de̱ ya̱ gashtal tub lugaar nu la Yagyi' ni Apio, nu tuuba' lugaar nu la Chon Posad. Ornu Baly bzaac yu de yu ze', orze' briic yu gras ni Ñgyoozh, nunu gud baloor niy. 16Na ornu bri̱ de̱ Rom, orze' yu nu riib ic de soldad ze' bzeeñ yu de pres yaa tuuba' yu nu riib ic de yu nu rña laab pres. Tees bzaan dey nu cyiiñ reñ Baly nu tub soldad nu ñay yu. 17Na ornu bi bza' chon dzi nu bri Baly Rom, orze' bredz yu de yu zub lo ni de mbecy Israeel, de yu nu yu' Rom par nu gyatublaazh dey. Na ornu bi byatublaazh dey, orze' nay rab yu dey: ―Der bicy na, ya̱ walab nu shiñ bicy du̱ de losa'n, nunu ni' walab nu bicya̱ coz nu za contr ni cushtom nu bzeeñ de gyitoo bel ni den, tees pshet lag dey ya̱ pres Jerusaleeng. Orze' bgu' dey ya̱ yaa de mbecy Rom. 18Orze' de mbecy Rom bdugyi' dey lo̱ de coz nu guc, nunu ngulagy dey nlaay ya̱, gun wancyuu caacy ni tub la cyi nu briib dey to̱o̱ par nu gyicy ñi nu gata̱. 19Tees de mbecy Israeel wangalagy dey nu ndula̱a̱. Nde' nu ya̱ wangac gyicya̱ reña' mod. Orze' ya̱ bdiña̱ nu yu nu riib ic de nasyoong gri beey ne̱. Ni bicya̱ mas sac ni tub la cyi fals nu riiba̱ ic de losa'n. 20Nde' nu ya̱ bredza̱ de ru par nu zaca̱ der, nunu par nu ne̱e̱ du̱ de ru. Tub zi la nu nac biñ nu rgyish lo de mbecy Israeel lo, par nu nac mi ze', nde' nu ri̱ pres ―na Baly. 21Orze' na dey rab yuy: ―De mbecy Judea wancaa dey ni tub la gyicy nu nzat dey ru lo̱ de̱. Ni' de bicy na nu bruu Judea wannii dey ti bicy ru cyi. 22Rlagy de̱ gyeña̱ de coz nu ru rnii toor, gun bi rad lagy de̱ nu dela lugaar rnii dey riidz nu za contr ni leey cub ze' ―na dey. 23Orze' bzu dey tub dzi nu gzuub gyidag dey de coz nu nii Baly. Na ornu pshuub dzi ze', orze' tona' la zigy mbecy byatublaazh dey ze' nu rcyiiñ Baly. Gaal zi'l brugyi' rniiy se or napor gashtal or bicheñ laa gabee rnii ru'y de riidz ni gyel gubier ni Ñgyoozh. Bzat yu de riidz nu bzeeñ Moisees, nunu bzat yu de riidz nu bzeeñ de yu nu mnii por cuen ni Ñgyoozh par nu gyicy ñi nu cuugy yu lardoo de mbecy nu cyu nac Jesuuz. 24Par nu nac de coz nu mniiy, orze' bguugy lardoo la be mbecy tees de' zir mbecy wancheña lagy dey. 25Orze' wangyicy dey tub zi'l riidz nu losa'y. Orze' brugyi' rash nez dey druuy lo Baly. Orze' na Baly: ―Nap mnii Espiriit Yon ni Ñgyoozh ornu mniim lo Isaías, tub yu nu mnii por cuen ni Ñgyoozh, ornu mniiy lo de gyitoo bel ni den. Isaías nay: 26Ñgyoozh nam: “Gua niir lo de mbecy ii. De ru mas nap gzuub gyidag der tees wayet lag der cuen. Mas nap güii der tees wazac der. 27Gun de mbecy ii byacyigy tooy. Nunu psoow dey gyidag yu. Nunu psoow dey urloy, gun orze' wazac dey nu urloy, nunu wagyeñ dey nu gyidag yu. Ni wayet lag dey cuen nu shcab niy. Nunu ni wachaa dey mod nu gyicy yu, gun orze' yub dey ya̱. Gun orze' ya̱ gyicy napa̱ dey”, na Ñgyoozh, na Isaías ―na Baly. 28Orze' na ga'y: ―Ya̱ rica̱ nu gad lagy der nu na Ñgyoozh rlagy mi nu ne̱e̱ de̱ de riidz nu gyicy nu gruu mbañ mbecy lo de mbecy nu walab mbecy Israeel. Nunu de yu ze' gzuub gyidag dey niñ ―na Baly. 29Ornu blazh mnii Baly de riidz ze', orze' de mbecy zi ga la ro dey riidz nu losa'y. Orze' ya dey. 30Orze' li laa cyup ña'n pcyiiñ Baly lugaar ze'. Pcyiiñ yu nañ tub yu' nu rgyish yu gyi'. Nunu nap bicy nuy de mbecy nu gua güiiy. 31Pshaal yu de riidz ni gyel gubier ni Ñgyoozh lo dey, nunu blyuuy ni dey de coz ni Jesucrisht. Nunu rila wanca de mbecy niy nu cue' ni gyicy yu.

will be added

X\