Hechos 27

1Na ornu mnii too Festo nu zeed yu de̱ Italia nañ tub barc, orze' bgu' dey Baly nu la be de' zir pres yaa tub jef ni de soldad, yu nu la Julio. Yu ze' riib ic yu tub nac soldad nu bloo la dey De Soldad ni Augusto. 2Orze' gu̱' de̱ nañ tub barc ni tub mbecy gyedz Adramitio. Barc ze' bi zu lily ñii par nu ruuñ chañ par de gyedz ni Asia nu yu' ru' nisyudoo. Orze' bruu barc ze'. Orze' za̱ de̱. Aristarco, tub mbecy Tesalónica, tub gyedz nu ri lo yu ni Macedonia, yu ze' za nuy de̱. 3Orze' na tuuba' dzi bri̱ de̱ Sidón. Julio dzi nap bicy nuy Baly. Bzaan yu nu cha güiiy de amig niy, nunu bzaañ yu nu cuic de amig niy dela coz nu cyiiñ niy. 4Orze' bru̱u̱ de̱ Sidón za̱. Bzeeñ de̱ Chipre, tub nac yu nu ri lo nisyudoo, par yaa reg na, gun tona' la druu bi par ze' nu za de̱. 5Orze' bded de̱ lo nisyudoo ru' yu ni Cilicia nu Panfilia. Orze' bri̱ de̱ Mira, tub gyedz nu ri lo de yu ni Licia. 6Orze' lugaar ze' jef ni soldad ze' byap yu tub barc ni de mbecy gyedz Alejandría. Barc ze' chañ par Italia. Orze' bgu'y de̱ nañ barc ze'. 7Orze' guly za̱ de̱ nañ la be dzi. Orze' dzi gyee bri̱ de̱ lo nis nu ri gaab ga tub gyedz nu la Gnido, gun gabee rzub bi par ze' nu za̱ de̱. Orze' bded de̱ tub gyedz nu la Salmón. Gaze' nu bded de̱ cuit Creta, tub nac yu nu ri lo nisyudoo. 8Bded de̱ gaab ga lo yu ze', nunu dzi gyee bded de̱. Orze' bru'ña de̱ tub lugaar nu la Buenos Puertos. Ze' gaab ga ri tub gyedz nu la Lasea. 9Mnit lo zañ dzi. Orze' byarishdzidz nu cha̱ de̱ nañ barc, gun bi rgaab tiem nu ri gyey. Orze' Baly byooy rishlo de mbecy. 10Orze' nay: ―Der mbecy, ya̱ rze̱e̱ nu dzi rishdzidz za̱ den na. Tona' la coz ily nit lo. Walab barc zi'l, nunu walab yuu zi'l nit loñ, sinu gnit lo ga' mbecy ―nay. 11Tees yu nu riib ic de soldad wansuub gyidag yu ni Baly. Bzuub gyidag zir yu ni yu nu riib ic barc ze', gal nu ni shuaan ñi. 12Nunu lugaar ze' nu byeeñ barc ze' walab lugaar nap par tiem nu gri gyey. Nde' nu sñuu ga zi'l gac dela mbecy rlagy yu ruuy lugaar ze'. Orze' cha dey ben a wariy tub gyedz ni Creta nu la Fenice. Ze' tub lugaar nu dri barc, nunu druuñ. Nunu ornu rgüiin par ze' nu rza doo, orze' nis ze' zub ro' niñ par yaa been nu par yaa reg na. Orze' ze' gac cyiiñ de̱ lascyey. 13Orze' brugyi' nu yagugy druu bi par yaa reg na ornu rgüiin par ze' nu rza doo. Orze' de mbecy psa' lagy dey nu gyicy yu gan gal mod nu mnii tooy. Gaze' nu bruu dey lugaar ze', za dey gaab ga lo de yu ni Creta. 14Tees ornu sa zi'l bruu dey ze' zay, orze' brugyi' druu tub bi ily rdugyiñ par lo barc nu yu̱' de̱ ze'. Bi ze' bloo la dey ñi Bi nu Druu Par Yaa Reg Na Ornu Güiin Par Ze' nu Rza Doo. 15Bi ze' tona' la bicy nuñ barc, nunu wangaca' saa dey barc ze' par ze' nu rdugyiñ. Orze' blaa yaa dey ñi. Orze' za nu biñ. 16Orze' za̱ de̱ cuit tub nac yu mi' nu ri lo nisyudoo nu la Cauda. Za̱ de̱ tub lo nis ze' nu beñ ricy bi. Orze' ze' gyee bzu nap de̱ barc mi' nu zaab par ich ze'. 17Despuees ornu bi pshup de̱ barc mi' ze', orze' bgu' dey ñi nañ barc ily. Gaze' nu ptiish dey duu cacy nañ barc par nu gyafert ñi. Orze' rdzib dey nu ches ti̱ barc lo tub nac yu uzh nu ri par iiñ nis gaab ga lo yu ni Libia. Gaze' nu pshet te dey negy nu zaab too barc ze'. Orze' bzaan dey nu za nu biñ. 18Orze' tuuba' dzi, como ni zi'l dzi ricy bi, orze' brugyi' rne' dey de yuu nu yu' nañ barc ze' lo nis. 19Orze' dzi chon de coz nu ricy nu barc riiñ mne' dey ñi lo nis laab nu yaay. 20Zañ dzi wansaca̱' de̱ doo güidz, nunu ni' zi'l wansac de̱ bel baa. Nunu ii zaab druu la bi ily. Orze' brugyi' nu wagrish lo ga̱' de̱ nu gruu mbaña̱. 21Orze' como dela mbecy bi guzañ dzi wagowa' dey gyit, orze' Baly wes suy lat dey. Gaze' nu nay rab yu dey: ―Der mbecy, nap zir benu nzuub gyidag der ne̱, nunu cue' ndruun lo yu ni Creta, gun orze' cue' nnit lo de coz sheñ ze'. 22Tees cue' dzib der, gun wat ni tub la den. Nomaas barc ii nit loñ. 23Gun che bruu zac tub anc ni Ñgyoozh lo̱, biñ nu nac nu ya̱, nunu biñ nu ya̱ rca̱. 24Orze' nay rab yu ya̱: “Cue' dzib ru Baly. Rlagy ñi nu char lo mbecy nu riib ic de nasyoong. Nunu par nu nac ru, wazaan Ñgyoozh nu gat ni tub mbecy nu yu' nur nañ barc ii”, nay. 25Nde' nu cue' dzib der, gun ya̱ ricy cupa̱ consuel lo Ñgyoozh nu gyicy mi gal nu mnii anc ze'. 26Orze' gyet lag den lo tub nac yu nu ri lo nisyudoo ―na Baly. 27Despuees ornu bza' trotap dzi nu dzi ricy bi, na or bi rel, bi bri nuñ barc lo tub nisyudoo nu la Nisyudoo Adriatico. Na or guzeel rel mnii too dey nu cyup ridz yagaab dey lo tub nac yu nu ri lo nisyudoo. 28Gaze' nu pcaa dey tub coz ye lo tub duu cacy. Orze' mne' dey ñi lo nis. Orze' gud lagy dey nu yu' tub gal rub tiiñ zu tub metr nu gyi ri nis. Na ornu bzaañ sñuu miiñ, ni' zi'l bicy dey. Orze' gud lagy dey nu yu' gal rub gaay zu cyup metr nu gyi. 29Na orze' gudzib dey nis dugyi barc lo de gyita' nu yu' par iiñ nis ze'. Orze' mne' dey tap duu cacy nu ca coz ye lo par ich barc, gun orze' chesab riñ lo nis. Orze' brish lo dey nu dzach za' yu. 30De yu nu rsaa barc bicy pee dey nu ndruu chuy. Orze' brugyi' rshet lag dey barc mi' ze' lo nis. Bicy pee dey nu ñgya nuy tub coz ye nu ne'y par lo barc ze'. 31Orze' na Baly rab yu yu nu riib ic de soldad, nu de' zir de soldad: ―Benu de yu nu rsaa barc re wabez dey nañ barc, orze' wac ruu mbañ der ―na Baly. 32Orze' de soldad pshi'ñ yu de duu cacy nu nag barc mi' ze'. Orze' bet lag ñi lo nisyudoo. 33Na ornu gabee cow ru', orze' Baly mnishbaay lo dela mbecy nu gow dey ñuu gyit. Gaze' nu nay rab yu dey: ―Bi bza' trotap dzi nu yu' der dzi rash ru shcab, nunu wangow der gyit. 34Nde' nu ya̱ rnishba̱a̱ lo der nu gow ru ñuu. Gun nde' coz nu rlagy ñi par nu gagye der. Nunu wat ni tub der, nunu ni tub gyich too der wadune'ñ ―nay. 35Ornu blazh mnii Baly de coz ze', orze' bdu' yaay tub gyishtily. Orze' briic yu gras ni Ñgyoozh lat dela mbecy ze'. Orze' blew yu gyishtily ze'. Gaze' nu brugyi' row yu. 36Orze' dela mbecy guud baloor ni dey, nunu bdowa' dey ñuu gyit. 37Yu' cyup gaynal zub chon gal rub gaay zu tub mbecy nu yu' nañ barc ze'. 38Na ornu bi bdow gyel dey na, orze' mne' dey de trig lo nisyudoo par nu gyadzach barc ze'. 39Na ornu bza' yu, orze' bzaac dey lo yu par wagyu' lo ga' dey ca lugaar ni yu ze'. Orze' bzaac dey tub nis nu ri reñ, tees ñgyiid la ru'ñ nu nisyudoo. Nunu ru' nis ze' ri tub lacy she. Gaze' nu mnii too dey benu gac cha nu dey barc par ze' nu ri lacy ze'. 40Gaze' nu pshi'ñ dey duu cacy nu nag barc ze' nu coz ye ze'. Orze' bzeeñ dey ñi lo nis. Nunu pshaagy dey duu cacy nu nag yag nu rlyuu ca na nez nu cha barc. Gaze' nu pshes nañ dey negy nu zaab too barc ze', gun orze' bi saañ barc ze'. Na orze' brugyi' nu rza barc par garee ga ze' nu ri yu ze'. 41Tees orze' bdugyiñ ze' nu ri tub nac yu uzh nu ri par iiñ nis. Orze' wes ti̱ par loñ lat yu uzh ze'. Wangaca' ruuñ. Nunu tona' la bicy nu nis par ich ñi, gashtal brugyi' rduzug lañ. 42Orze' de soldad rlagy dey cut yu de mbecy nu nac pres nis riib dze dey ornu lazh nu cub dey nis nu riy gal lo yu bigy. 43Tees yu nu riib ic de soldad rlagy yu co mbañ yu Baly. Orze' wansaan yu nu ni gyicy dey. Sinu bicy yu mandaar lo de mbecy ben ca na dey gac cub yu nis, orze' yu ze' gyet yu lo nis loga la. Orze' cub yu nis par nu riy lo yu bigy. 44Orze' dela de' zir mbecy za ca dey ich yu. Yu' dey zay lo tub yala. Yu' ga'y zay lo tub la' barc bla'. Ni mod bruu nap de̱. Bri̱ de̱la̱ de̱ lo yu bigy.

will be added

X\