Hechos 26

1Orze' na Agripa rab yu Baly: ―Na gac niir lagu sac falt nir ―nay. Orze' Baly bicy yaay lo dey. Gaze' nu brugyi' rniiy. Orze' nay: 2―Rey Agripa, ya̱ ricya̱ uba̱ par tub mbecy nu tona' la cyit na dzi ni, gun gac ne̱e̱ lor dzi na lagu sac falt ne̱. Lo dela gyidza nu driib de mbecy Israeel ica̱, rila sac falt ne̱ nu nac de coz ze'. 3Nunu yet zir lagya̱, gun ru nap rad lagy ru dela cushtom ni de mbecy Israeel, nunu nap rad lagy ru dela nu la gyi' nu rtub su̱ de̱ losa̱'. Nde' nu rne̱e̱ lor nu bicy pase̱z zuub gyidag ru de riidz nu ne̱e̱ lor ―na Baly―. 4’Dela mbecy Israeel rad lagy dey lac mod na̱ lat nu pcyiiña̱ lat dey nese miiñ la̱: tant ledza̱, nunu tant Jerusaleeng. 5De yu ii rad lagy dey, nunu benu rlagy dey, gac niiy nu nese miiñ la̱ bicya̱ mod ni mbecy fariseo. Nunu de mbecy fariseo ta zir mod nu ricy dey lo Ñgyoozh gaze' de' zir mbecy Israeel. 6Nunu na zu̱ ii rduri bee ne̱ par nu nac nu drish lo̱ lo de riidz nu mnii Ñgyoozh lo de gyitoo bel ni den nu segur la gyicy mi. Riidz ze' nde' nu gyicy Ñgyoozh nu gyabañ dela mbecy nu bi gut. 7Lo trocyup nac nez de̱ drish lo̱ de̱ lo Ñgyoozh nu gzac de̱ nu gyicy yac mi de riidz nu mniim. Nunu nde' nu rca̱ de̱m, nunu ricy de̱ coz nu rlagy mi dzi rel la. Nde' nu ru rey Agripa par nu nac nu laaba' de coz ze' drish lo̱ looñ, nde' nu de mbecy Israeel driib dey gyidza ica̱ na. 8De ru mbecy Israeel ¿lagu wagac cheña lagy der nu Ñgyoozh gyicy mi nu gyabañ dela mbecy nu bi gut? 9’Tees ya̱ laa ni' zi'l mnii to̱o̱ anzir nu rlagy ñi nu dzi gyicya̱ coz nu cha contr ni Jesuuz, biñ nu pcyiiñ Nazaret. 10Ni mod bicya̱ Jerusaleeng. De yu zub lo ni de uz briic yu rishbeey ne̱. Orze' pshet laga̱ zigy mbecy nu ricy cup consuel lo Crisht nañ yu' gyiib, nunu bicya̱ tub zi'l riidz ornu mnii mbecy nu gat dey. 11Zañ tir pca̱a̱ mbecy nu cuic yu cashtig ni de mbecy ze' ben a walaa yaa dey de coz nu ricy cup yu consuel lo. Ni bicya̱ nañ dela yu' nu rsya' de mbecy Israeel riidz ni Ñgyoozh, gun tona' la guzi lagya̱ lo dey. Nde' nu gua̱ gashtal de gyedz nu yu' lo yu nu walaba' yu ni de mbecy Israeel par nu sheed zi̱ de mbecy ze'. 12’Par nu ni bicya̱, nde' nu ya̱ gua̱ tub gyedz nu la Damasco. De yu zub lo ni de uz pcaay ya̱ nu cha̱, nunu briic yu rishbeey ne̱. 13Orze' nez nu za̱, tub or wi doo, bzaaca̱ tub yaa. Bruuñ gal baa. Bet ñi dub yub la lo̱ nu lo de yu nu za̱ du̱. Tona' la ryal yaa ze'. Ryal zir ñi gaze' yaa ni doo güidz. 14Orze' dela de̱ wes sa̱a̱ lo yu. Orze' güeñ ya̱ nu zaab ti' tub mbecy. Orze' nam rab mi ya̱ nu riidz hebreo: “Saulo, Saulo, ¿lagu rsheed zir ya̱? Laab ru shiñ ricy nur ub ru gal nu ricy tor, ornu rlo ma too garoch, ornu rchiib mbecy ma”, nam. 15Orze' ya̱ mne̱e̱: “¿Cyu ru Shuaana̱?” mne̱e̱. Orze' na Shuaana̱ rab mi ya̱: “Ya̱ Jesuuz, biñ nu ru rsheed zir. 16Orze' weshte, nunu bzu gyi'r lo yu. Ya̱ bruu zaca̱ lor par nu du̱' riiñ yaar nu gac ru moz ne̱, nunu par nu shaal ru lo de mbecy de coz nu bzaac ru dzi na, nunu par nu shaal ru lo mbecy de coz nu lyu̱u̱ nir par lo. 17Ya̱ wazaana̱ nu shiñ gyicy nu de mbecy Israeel ru, nunu wazaana̱ nu shiñ gyicy nu mbecy nu walab mbecy Israeel ru, de mbecy nu zuu neza̱ ru nu char lo ze'. 18De yu ze' nay gal nu na mbecy lo ca'. Tees ru rlagy ñi nu gyicy ru nu zac dey. Gun orze' ruu dey ze' nu cow. Cha dey ze' nu yu' yaa. Orze' cue' gyub ic nuras dey, sinu Ñgyoozh gyub ic mi dey. Gun par nu nac nu gyicy cup dey consuel lo̱ ya̱, gyicy sulagy Ñgyoozh dela coz cyi nu ricy dey. Nunu gyacaacy dey gal nu byacaacya' de' zir mbecy nu nac nu ricy cup dey consuel lo̱”, nam. 19’Orze' na rey Agripa, ya̱ wangyicya̱ nu wansuub gyidaga̱ ni de coz nu güeña̱ nu bruu gashtal gyibaa. 20Sinu nu loga la pshaala̱ de riidz nu bruu lo Ñgyoozh lo de mbecy Damasco. Niga pshaala̱ de riidz ze' lo de mbecy nu yu' Jerusaleeng. Niga pshaala̱ ñii lo de mbecy nu yu' dutuub la lo yu ni de mbecy Israeel. Ni' zi'l pshaala̱ ñii lo de mbecy nu walab mbecy Israeel. Ya̱ mne̱e̱ lo dey nu rlagy ñi nu ne' dey dela coz cyi nu ricy yu, nunu rlagy ñi nu gyicy dey coz nu rlagy Ñgyoozh, nunu rlagy ñi nu gyicy dey tub mod nu gabe nu bi mne' dey dela coz cyi nu ricy yu. 21Orze' par nu nac de nu nde', orze' de mbecy Israeel bdu' yaa dey ya̱ lat nu ri̱ loli' ni yu' nu driib zily den Ñgyoozh, nunu bicy pee dey ñgyut yu ya̱. 22Tees Ñgyoozh zaab rlocyuub lam ya̱. Nde' nu dzi na zu̱ ii, nunu rzata̱ de coz nu guc ze' lo dela der: mas lo de mbecy shni, mas lo de mbecy lily. Nde' nu rne̱e̱ lor laaba' de coz nu mnii de yu nu mnii por cuen ni Ñgyoozh. Ni mnii Moisees nu de yu nu mnii por cuen nim nu ni gac. 23Mnii dey nu Mesías, biñ nu ca lo cuen nu co mbañ mbecy, rlagy ñi nu gzac zim, nunu gac mi biñ nu gyabañ loga la despuees ornu bi gut mi. Orze' de riidz nu rnii mi ze' nañ gal nu na tub yaa. Riidz ze' rniiñ lo de mbecy Israeel nu gac gruu mbañ dey, nunu ni' zi'l rniiñ lo de mbecy nu walab mbecy Israeel ―na Baly. 24Orze' lat nu rnii Baly nu lagu sac falt niy, orze' brish ti la Festo. Orze' nay: ―¡Nu guton ru Baly, nu nac nu dzi rsya'r gyicy, nde' nu raton ru! ―nay. 25Orze' na ga' Baly: ―Ya̱ walab nu gutona̱ Shi Festo. Riidz nu rne̱e̱, nii coz rishli nunu coz nu nap za. 26Nunu ii zu rey Agripa. Yu ii nap rad lagy yu de coz ze'. Nde' nu ya̱ wachiba̱ rne̱e̱ loy, nunu segur la rad lagya̱ nu bdu' cuen yu de coz ze', gun de coz ze' rila wangac ñi tub ze' nu ngach. 27Rey Agripa, ¿a rzeña lagy ru de riidz nu mnii de yu nu mnii por cuen ni Ñgyoozh? Ya̱ rad lagya̱ nu ru rzeña lagy ru ―na Baly. 28Orze' na ga' Agripa rab yu Baly: ―Ru rsa' lagy ru nu gac cuugy ru lardo̱o̱ nu gaca̱ mbecy ni Crisht nu nac riidz gyidz ze' ―na Agripa. 29Orze' na' Baly: ―Mas rne̱e̱ riidz gyidz o mas rne̱e̱ riidz nap tees ya̱ rdiña̱ lo Ñgyoozh nu walab ru zi'l, sinu dela de mbecy nu rzuub gyidag de riidz nu rne̱e̱ dzi na, nu gzu dela der mod nu ya̱ zu̱, nomaas walagya̱ nu de ru cuir pres gal nu ya̱ ri̱ ―na Baly. 30Gaze' nu wes su Agripa nu Festo nu Berenice nu de' zir de yu nu nguaa ze'. 31Orze' bruu dey nañ yu' ze'. Orze' na dey rab yu losa'y: ―Yu re wangyicy yu ni tub la coz nu gyicy ñi nu gat yu o nu gyicy ñi nu chay nañ yu' gyiib ―na dey. 32Orze' na Agripa rab yu Festo: ―Benu cue' ñgyiiñ yu nu ri bee yu nu riib ic de nasyoong niy, orze' ñgyac ndulaay i ga la ―nay.

will be added

X\