Hechos 25

1Orze' Festo briy par nu chu'y riiñ nu gyub ic yu por cuen ni gubier. Tees ornu bi bza' chon dzi, orze' bruuy Cesarea zay Jerusaleeng. 2Ze' de yu zub lo ni de uz nu de yu zub lo ni de mbecy Israeel briib dey gyidza ic Baly. Orze' mnishbaa dey lo Festo 3nu gyicy yu faboor nu caay de mbecy nu cha nuy Baly par Jerusaleeng. Ni mnii dey gun bloo ic dey lac mod cut dey Baly nez nu chay. 4Orze' na Festo rab yu dey: ―Baly riy pres Cesarea. Ya̱ sñuu ga cha̱ par Cesarea. 5Orze' de yu nu riib ic lat der rlagy ñi nu cha nu dey ya̱ par Cesarea. Orze' re gac riib dey cyi ic yu, benu shiñ bicy yu ―nay. 6Orze' Festo briy Jerusaleeng tub shuñ dzi o tub tii dzi. Gaze' nu bruuy zay par Cesarea. Orze' tuuba' dzi bi zub yu nañ yu' riiñ par nu ri beey ni de mbecy. Orze' mnii nuy de mbecy nu cyid nu dey Baly. 7Ornu bru'ña Baly, orze' de mbecy Israeel nu bruu Jerusaleeng bri lo' la dey yu. Orze' brugyi' driib dey zañ gyidza ic yu tees wangac ñgyicy caacy dey ti nde' coz rishli. 8Orze' Baly pcay ub yu. Gaze' nu nay: ―Ya̱ wangyicya̱ ni tub la coz nu za contr ni leey ni de mbecy Israeel, ni coz nu za contr ni yu' nu driib zily de̱ Ñgyoozh, ni coz nu za contr ni yu nu riib ic dela nasyoong ―nay. 9Tees Festo rlagy yu gyicy yu coz nu gyet lagy de mbecy Israeel. Orze' nay rab yu Baly: ―¿A shet ic ru char par Jerusaleeng par nu ri be̱e̱ nir nu nac de coz nu rnii de mbecy ii? ―nay. 10Orze' na Baly: ―Ya̱ zu̱ lo ru, yu nu zu riiñ por cuen ni yu nu riib ic dela nasyoong. Ii rlagy ñi ri beer ne̱. Mas ru rad lagy ru nu se la la coz a̱' nap bicy du̱ de mbecy Israeel. 11Benu ya̱ ñgyicya̱ coz nu za contr ni leey o benu ñgyicya̱ coz nu gyicy ñi nu rlagy ñi nu gata̱, orze' ya̱ wane̱e̱ lor nu co mbañ ru ya̱. Tees como de gyidza nu driib dey ica̱, nde' walab coz rishli, orze' ni tub la mbecy wac gu' dey ya̱ yaa dey. Ya̱ rdiña̱ nu ub la yu nu riib ic de nasyoong ri beey ne̱ ―nay. 12Na ornu blazh bee nu Festo de yu nu rbic consef riidz, orze' nay rab yu Baly: ―Ru bdiiñ ru nu yu nu riib ic de nasyoong nu ri beey nir. Orze' lo yu ze' char ―nay. 13Orze' ornu blazh la be dzi rey Agripa nu Berenice za dey Cesarea za güiiy Festo. 14Na ornu bi rac la be dzi rcyiiñ dey ze', orze' Festo mniiy loy de coz nu bzac Baly. Orze' nay rab yuy: ―Ri tub mbecy ii, yu nu bzeeñ Feely pres. 15Ornu gua̱ Jerusaleeng, orze' de yu zub lo ni de uz nu de yu bel ni de mbecy Israeel briib dey cyi ic yu, nunu mnii dey lo̱ nu ne̱e̱ nu yu' falt niy. 16Orze' ya̱ mne̱e̱ lo dey nu de̱ ya̱ gal nu de mbecy nu riib ic por cuen ni gubier Rom rila wagne̱e̱ de̱ nu yu' falt ni mbecy nu gyicy ñi nu gat yu anzir nu gac lo nu lo niy nu de mbecy nu driib cyi ic yu, gun orze' gad mod nu niiy lagu sac falt niy nu nac de cyi nu driib dey ic yu. 17Na ornu biid dey par ii, orze' wansaana̱ nit lo tiem. Orze' tuuba' dzi bi zuba̱ nañ yu' riiñ. Orze' pca̱a̱ de mbecy nu cha tee dey Baly. 18Ya̱ psa' lagya̱ nu de mbecy nu driib cyi ic yu zañ coz a̱' nap nii dey nu bicy yu. Tees walab ni. 19Tub zi la coz nu mnii dey, nde' nu ricy yu coz nu za contr ni mod nu driib zily dey Ñgyoozh, nunu bzat dey tub yu nu la Jesuuz. Gut yu tees Baly rniiy nu mbañ yu. 20Wangad lagya̱ lac gyicya̱ par nu gad lagya̱ de coz nu guc. Orze' mne̱e̱ lo Baly nu ben a washet ic yu gyay Jerusaleeng. Orze' ze' duri be̱e̱ niy. 21Tees orze' Baly bdiiñ yu nu chay lo Augusto, yu nu riib ic de nasyoong, nu ri beey niy. Orze' mne̱e̱ lo de mbecy nu zeeñ dey yu pres gashtal ornu gad mod nu zuu neza̱ yu lo yu nu riib ic ze' ―nay. 22Orze' na Agripa rab yu Festo: ―Ni' ya̱ rlagya̱ gyeña̱ coz nu nii mbecy ze' ―nay. Orze' na Festo rab yu Agripa: ―Ina gyeñ ru de coz nu gniiy ―nay. 23Orze' tuuba' dzi rey Agripa nu Berenice bru'ña nuy de jef ni soldad nu de yu zub lo ni gyedz ze'. Na ornu gu' dey nañ yu' ze', orze' tona' la briib zily dey de yu ze'. Orze' Festo pcaay de mbecy nu cha tee dey Baly. 24Gaze' nu na Festo: ―Rey Agripa gal nu de ru mbecy nu byatublaazh ii. Ii bi zu tub mbecy. Zigy mbecy Israeel driib dey cyi ic yu ii lo̱: tant mbecy nu yu' Jerusaleeng, nunu tant mbecy nu yu' Cesarea ii. Zaab rbish ti la dey nu rlagy ñi gat yu. 25Tees ya̱ rsa' lagya̱ nu wangyicy yu ni tub la coz nu gyicy ñi nu rlagy ñi nu gat yu. Nunu como laab yu bdiiñ yu nu chay lo Augusto nu ri beey niy, orze' ya̱ bi mne' ica̱ nu zeeda̱ yu lo Augusto. 26Tees ya̱ wagad lagya̱ la na falt niy nu ca̱a̱ lo gyicy nu zeeda̱ lo yu nu riib ic dela den. Nde' nu yap du̱ yu lo der. Nunu ricy zir ñi presis lo ru, rey Agripa, gun ornu lazh cugyi'r loy ben a wad la ñuu coz nu ca̱a̱ lo gyicy. 27Gun ya̱ rze̱e̱ nu dzi coz ton benu zuu neza̱ tub pres lo yu nu riib ic de nasyoong benu wagac ne̱e̱ de falt nu yu' niy ―nay.

will be added

X\