Hechos 24

1Ornu blazh gaay dzi, Ananías, yu nu riib ic de uz zay Cesarea. Za nuy la be mbecy nu zu riiñ ni yu bel ni de mbecy Israeel. Nunu za nuy Tértulo, tub yu nu rne' ic ni de mbecy lo gubier. Orze' gua dey lo Feely, yu nu riib ic por cuen ni gubier. Orze' briib dey gyidza ic Baly. 2Orze' ornu bru'ña nu dey Baly, orze' Tértulo brugyi' driib yu gyidza ic yu. Orze' nay rab yu Feely: ―Shnu la ru Shi Feely, gun par nu nac ru, ri zu ledz de̱. Nunu gusht zir rcyiiñ de̱ na gaze' gulas. 3Tona' la yet lagy de̱, nunu rlagy de̱ ric de̱ gras nir. 4Ya̱ walagya̱ nit lo sheñ tiem nir. Orze' na bicy pase̱z bzuub gyidag de coz nu ne̱e̱ de̱ lor tub miiñ. 5Byap de̱ mbecy ii tona' la ricy deet yu nu losa'y. Dutuub la gyishlombecy ricy cyup la'y de mbecy Israeel, nunu riib ic yu tub nac mbecy nu la nazarenos. 6Nunu bicy pee ga'y ñgyicy bag yu nañ yu' nu driib zily de̱ Ñgyoozh. Orze' bdu' ya̱a̱ de̱ yu za̱ du̱ de̱ yu pres. Ngulagy de̱ ri be̱e̱ de̱ niy gal mod nu rnii leey ne̱ de̱. 7Tees orze' Lisias, yu nu riib ic de soldad, pshet yaay de̱. Por fers la bloo zay yu ya̱a̱ de̱. 8Orze' mniiy nu benu ca na mbecy rlagy yu riib yu gyidza ic Baly, rlagy ñi nu cyid yu lo ru. Benu ru cugyi'r loy, orze' gad lagy ru nu rishli dela cyi nu rne̱e̱ de̱ ii ―nay. 9Orze' dela mbecy Israeel nu yu' lugaar ze' mnii dey nu nde' coz rishli. 10Orze' Feely, yu nu riib ic por cuen ni gubier, bicy yaay par nu gad lagy Baly nu niiy. Orze' na Baly: ―Ya̱ rad lagya̱ nu guzañ ña'n ru dri beer ni de mbecy ledza̱. Nde' nu yet lagya̱ ne̱e̱ lor lagu nu sac falt ne̱. 11Orze' na benu cugyi'r lo de mbecy, bi rac trocyup zi dzi nu bya̱a̱ Jerusaleeng par nu riib zilya̱ Ñgyoozh. 12De mbecy Israeel wansac dey nu ndoo zi̱ riidz nu losa̱'. Ni wansac dey nu ñgyicya̱ nu ncha' ic mbecy. Wansac dey nu ni ñgyicya̱ nañ yu' nu driib zily de̱ Ñgyoozh. Nunu ni wansac dey nu ni ñgyicya̱ nañ yu' nu rsya̱' de̱ riidz nim. Ni wansac dey nu ni ñgyicya̱ ni tub la lugaar lat gyedz Jerusaleeng. 13De mbecy ii wagac gyicy caacy dey ti coz rishli de cyi nu driib dey ica̱ lor. 14Tees ya̱ gyicy caacya̱ nu ya̱ rca̱ Ñgyoozh ni de gyitoo bel ne̱ de̱ ze' mod nu rnii dey nu nde' mod fals. Tees ya̱ zeña lagya̱ dela coz nu ca lo leey nu bzeeñ Moisees. Nunu zeña lagya̱ dela riidz nu pcaa de yu nu mnii por cuen ni Ñgyoozh. 15Ya̱ drish lo̱ lo Ñgyoozh gal nu de ub yu ni' rgyish loy lom. Ya̱ drish lo̱ nu dela mbecy gyabañ dey: tant mbecy nap, nunu tant mbecy a̱' nap. 16Nde' nu dub laa tiem ryuba̱ mod nu cue' gyicya̱ coz nu gyicy ñi nu gat lo̱ lo Ñgyoozh. Nunu ryuba̱ mod nu cue' gyicya̱ coz nu gyicy ñi nu gat lo̱ lo mbecy. 17’Na ornu bza' la be ña'n nu bru̱u̱ Jerusaleeng, orze' ya̱a̱ ga̱' par nu rica̱ tiñ ni losa̱', nunu par nu rica̱ gun ni Ñgyoozh. 18Lat nu bicya̱ nde' bzaac dey ya̱ loli' ni yu' nu driib zily de̱ Ñgyoozh. Saa la blazh nu bicy yaca̱ nu dela coz nu rnii leey nu rlagy ñi gyicy mbecy par nu gyicy caacy dey ub yu. Nunu wansac dey nu rded du̱ mbecy zigy. Ni wansac dey ya̱ lat de gyel deet. 19Tees ze' yu' la be mbecy Israeel nu bruu lo de yu ni Asia. Nap zir benu cyid de yu ze' lor benu ricy cup dey gyidza nu rlagy yu riib yu ica̱. 20O benu wancyiid dey, orze' cugyi'r lo de mbecy ii la cyi byu' be̱e̱ nu bicya̱ ornu gua̱ lat junt zub lo. 21Nomaas tub coz mne̱e̱ ornu zu̱ lat dey: “Dzi na dri bee der ne̱ gyi' nu rzeña lagya̱ nu ornu gat de mbecy, orze' despuees gyabañ dey tuuba' tir”, mne̱e̱ ―na Baly rab yu Feely. 22Gaze' nu Feely como nap gud lagy yu de coz ni nez cub ni Crisht, orze' bzeeñ naat yu ni nde'. Orze' nay rab yu Baly: ―Ya̱ ri be̱e̱ nir ornu ri Lisias, yu nu riib ic de soldad ―nay. 23Orze' pcaay soldad nu riib ic nu ñay Baly. Tees bzaan yu nu chesay, nunu zaan yu nu cyid güii de amig niy yu, nunu zaan yu nu zu bich dey nu nac yu. 24Na ornu blazh la be dzi, orze' bru'ña ga' Feely nu mñaay Drusila. Drusila nac mi mbecy Israeel. Orze' bredz yu Baly nu zuub gyidag yu riidz nu niiy. Orze' mniiy lac yaruu nu gyicy cup den consuel lo Crisht. 25Tees ornu mnii Baly nu rlagy ñi nu gyicy na coz nu se'ñ, nunu rlagy ñi nu nap gyub ic na ub na, nunu ornu bzat yu dzi nu ri bee Ñgyoozh ni dela mbecy, orze' gudzib Feely. Orze' nay: ―Gua la ru na, tees ornu zu nata̱, orze' redza̱ ru tuuba' tir ―nay. 26Ni' zi'l Feely brish loy lo Baly nu cuic yu tiñ par nu ruuy. Nunu nde' nu zañ tir bredz yuy. Nunu bee nuy yu riidz. 27Ornu bza' cyup ña'n, orze' Feely bruuy riiñ nu zuy ni nu riib ic yu por cuen ni gubier. Orze' bdugyi tuuba' mbecy riiñ ze'. Orze' gu' yu nu la Porcio Festo. Orze' Feely rlagy yu nu ganap lagy de mbecy Israeel loy. Orze' bzeeñ yu Baly pres.

will be added

X\