Hechos 23

1Orze' Baly bgüiiy lo de yu nu zu riiñ ni junt zub lo ze'. Orze' nay rab yu dey: ―Der bicy na, dub laa lat nu zu̱ gyishlombecy, nunu mas gashtal dzi na ya̱ wagat lo̱ lo Ñgyoozh par nu nac de coz nu bicya̱ ―nay. 2Orze' Ananías, yu nu riib ic de uz, pcaay de yu nu zu gaab ga lo Baly nu shet dey tub yaa yaru'y. 3Orze' na Baly rab yuy: ―¡Mbecy rzuu lo, Ñgyoozh segur la shet yaam ru! Ru zub ru ze' dri beer ne̱ mod ni leey, tees ru zar contr ni leey ornu mniir lo mbecy nu shet yu ne̱ ―nay. 4Orze' yu nu zu garee lo Baly nay rab yuy: ―Ru rnii zir ni yu nu pcuii Ñgyoozh nu riib ic de uz ―nay. 5Orze' na ga' Baly: ―Der bicy na, ya̱ wangad lagya̱ nu yu ze' nac yu yu nu riib ic de uz, gun riidz ni Ñgyoozh rniiñ: “Cue' nii zir ni yu nu riib ic losa'r”, rniiñ ―nay. 6Na ornu Baly bzaac yu nu lat junt ze' yu' mbecy saduceo, nunu yu' ga' mbecy fariseo, orze' nay rab yu dey: ―Der bicy na, ya̱ mbecy fariseo, nunu i'ñ mbecy fariseo naca̱. Nunu ii dri bee der ne̱ gyi' nu nac nu drish lo̱ nu ornu gat de mbecy gyabaña' dey despuees ―nay. 7Cuanzir nu ni mniiy, orze' de mbecy fariseo nu de mbecy saduceo brugyi' zi ro dey riidz nu de losa'y. Nunu byac cyup nac de yu nu zu riiñ ni junt ze'. 8Gun de mbecy saduceo rnii dey nu ornu gat mbecy wayabaña' dey, nunu rnii dey nu sac de anc, ni sac espiriit. Tees de mbecy fariseo rzeña lagy dey nu yu' anc, rzeña lagy dey nu yu' espiriit, nunu rzeña lagy dey nu gyabaña' de mbecy. 9Orze' brugyi' rbish ti dey. Lat de mbecy fariseo, yu' ga' la be mbecy nu rlyuu leey nu bzeeñ Moisees. Orze' wes su dey. Orze' na dey: ―Mbecy ii rila wagyicy yu ni tub la coz a̱' nap. Benu mnii tub espiriit loy o tub anc mniiy loy, nde' walab nu zañ contr ni Ñgyoozh ―na dey. 10Orze' brugyi' tona' la fert zi ro dey riidz nu losa'y. Orze' yu nu riib ic de soldad gudzib yu nu ncad güii dey Baly. Orze' pcaay de soldad nu chu' dey lat de mbecy ze' nu co dey Baly por fers la, nunu cha nu dey yu par ze' nu rcyiiñ dey. 11Orze' rel ze' bruu sac Jesuuz lo Baly. Orze' nam rab mi yu: ―Cue' dzib ru, gun ru bzat ru ya̱ Jerusaleeng ii nunu ni' zi'l rlagy ñi gyicy ru Rom ―nam. 12Orze' tuuba' dzi de mbecy Israeel bicy dey tub zi'l riidz ben lac mod cut dey Baly. Mnii dey nu segur la nu wow la dey gyit, nunu ni wo' la dey nis gashtal cut la dey Baly. Nunu mnii dey nu Ñgyoozh shiñ gyicy num dey benu wagyicy paa dey nu de coz nu mniiy ze'. 13Bded cyuu mbecy nu psaap dey riidz nu ni gyicy yu. 14Orze' gua dey lo de uz zub lo nu lo de yu nu zu riiñ ni de yu bel ni de mbecy Israeel. Orze' na dey: ―De̱ ya̱ mne̱e̱ de̱ lo Ñgyoozh nu shiñ gyicy num de̱ benu da̱w de̱ la zi'l coz anzir nu dut de̱ Baly. 15Orze' de ru nu de' zir mbecy ni de junt zub lo ii zeed der raso̱o̱ lo yu nu riib ic de soldad nu cyid nuy Baly lor ina. Gyicy ru tub mod nu rlagy ñi nu cugyi' zir ru lo Baly par nu gad lagy nap zir ru la coz bicy yu. Orze' de̱ ya̱ bi zu lily de̱ nu dut de̱ yu anzir nu ru'ñay lor ―na dey. 16Tees i'ñ zan Baly güeñ yu nu ni mnii dey ni Baly. Orze' gua niiy lo Baly nañ yu' nu rcyiiñ de soldad. 17Orze' Baly bredz yu tub jef ni soldad. Orze' nay rab yuy: ―Gua nu yu feñ ii lo yu nu riib ic der, gun rlagy yu niiy tub riidz loy ―nay. 18Orze' jef ni soldad gua nuy yu feñ ze' lo yu riib ic de soldad. Orze' nay rab yuy: ―Baly, yu nu ri pres, bredz yu ya̱. Mniiy nu yap tu̱ yu feñ ii lor, gun rlagy yu niiy tub riidz lor ―nay. 19Orze' yu nu riib ic ze' bdu' yaay yaa yu feñ ze' gua nu reñ yuy. Na ornu bi zu reñ dey lat mbecy. Orze' nay rab yuy: ―¿La coz rlagy ru niir lo̱? ―nay. 20Orze' yu feñ ze' nay: ―De mbecy Israeel bicy dey tub zi'l riidz nu nishbaa dey lor ina nu cha nur Shi Baly lat junt zub lo. Gyicy dey tub mod nu rlagy yu gad lagy nap zir yu nu nac de coz nu ricy Shi Baly. 21Tees cue' zuub gyidag ru ni dey, gun bded cyuu mbecy nu siiñ dey ni Shi Baly nez nu chay. Bi mnii dey lo Ñgyoozh nu shiñ gyicy num dey benu gow dey la coz o benu go' dey la zi'l coz anzir nu cut dey Shi Baly. Orze' na rbez dey ben la na riidz nu niir ―nay. 22Orze' yu riib ic ze' nay: ―Cue' la niir lo ni tub la mbecy nu ni mniir lo̱ ―nay. Orze' blaay yu feñ ze' yay. 23Orze' yu nu riib ic ze' bredz yu cyup jef ni soldad. Orze' nay: ―Bzu lily der cyup gaynal soldad nu rgyit nu mandzicy, nunu zu lily der setent de yu nu ryub cuay, nunu zu lily der cyup gaynal soldad nu rgyit nu yag too lyuch, nunu zu lily der dey par nu chay Cesarea, tub gyiib gaa or becheñ. 24Nunu zu lily der cuay nu gyub Baly. Nunu gri nu ruub der yu lo Feely, yu nu riib ic por cuen ni gubier ―nay. 25Orze' yu riib ic de soldad ze' pcaay tub gyicy nu rniiñ: 26“Ya̱ Clau Lisias zeeda̱ gyicy ii lor, shi Feely, yu lily nu riib ic por cuen ni gubier. Shnu ru. 27De mbecy Israeel bdu' yaa dey mbecy nu zeeda̱ lor ii, nunu bicy pee dey nu ñgyut dey yu. Mbecy briic yu nu gad lagya̱ nu nash yu Rom. Orze' gua̱ du̱ soldad ne̱, nunu blo̱o̱ mbaña̱y. 28Ya̱ ngulagya̱ nu ñgyad lagya̱ la cyi driib dey ic yu. Orze' gua̱ du̱ yu lat junt zub lo ni de mbecy Israeel. 29Orze' gud lagya̱ nu driib dey cyi ic yu nu nac leey ni de ub zi'l dey. Par wangyicy yu coz nu gyicy ñi nu cut dey yu. Nunu ni' wangyicy yu coz nu gyicy ñi nu chay nañ yu' gyiib. 30Na ornu mbecy briic yu nu gad lagya̱ nu la be mbecy Israeel mnii too dey ben lac mod cut dey yu, orze' ya̱ mnii to̱o̱ nu zuu neza̱ yu lor. Orze' ya̱ mne̱e̱ lo de yu nu briib gyidza tooy nu cyid nii dey lor de coz nu rnii dey nu ricy yu.” Ni pcaay lo gyicy ze'. 31Orze' de soldad bicy yac dey de coz nu mnii yu riib ic ze'. Gua tee dey Baly, nunu gua nu dey yu laab rel ze' gashtal tub gyedz nu la Antípatris. 32Orze' tuuba' dzi de soldad nu rza gyi' bish cya dey yay par ze' nu rcyiiñ yu. Orze' byeeñ de soldad nu riib cuay ze'. Za nu dey Baly. 33Na ornu bri dey Cesarea, orze' briic dey gyicy ze' ni yu nu riib ic por cuen ni gubier, nunu bzeeñ yu Baly yaay. 34Orze' yu riib ic ze' blab yu lo gyicy ze'. Orze' bdugyi'y lo Baly ben ca ledz yu. Na ornu gud lagy yu nu ledz yu ze' riñ lo de yu ni Cilicia, 35orze' nay rab yu Baly: ―Ya̱ gzuub gyidaga̱ de coz nu niir ornu ri de yu nu driib cyi ic ru ―nay. Orze' pcaay de mbecy nu ña dey Baly nañ yu' ily nu bzaa Herodes.

will be added

X\