Hechos 22

1Orze' nay rab yu de mbecy zigy: ―Der bicya̱ gal nu de ru yu bel, bzuub gyidag der ornu ne̱e̱ lagu nu sac falt ne̱ ―nay. 2Na ornu güeñ dey nu mnii Baly nu riidz hebreo, orze' guri zir dey. Orze' na ga' Baly: 3―Ya̱ naca̱ tub mbecy Israeel. Gula̱ tub gyedz ni Cilicia nu la Tarso, tees bguul dey ya̱ Jerusaleeng ii. Gamaliel byub ic yu de coz nu psya̱', nunu blyuu dey ne̱ nu nap gyicy pa̱a̱ nu de leey nu bzeeñ Moisees. Ya̱ fert la zaba̱ nu rca̱ Ñgyoozh gal nu de ru rca der mi ii dzi na. 4Nde' nu gulas psheed zi̱ de mbecy nu gush nez cub ni Crisht gashtal bicya̱ nu gut dey. Pshet laga̱ mñaa gyeey la pres. Mne̱' dey yu' gyiib. 5Orze' yu nu riib ic de uz nu dela yu nu zu riiñ ni yu bel ni den gac nii dey nu ya̱ rne̱e̱ coz rishli. Briic dey tub gyicy ne̱ nu cha̱ du̱ lo de bicy na, mbecy Israeel nu yu' Damasco. Orze' ze' za̱, gun orze' ni' du' ya̱a̱ de mbecy nu nac num lugaar ze' nu yap du̱ dey pres par Jerusaleeng ii, gun orze' gad cashtig ni dey. 6’Na nez nu za̱ ornu bi rgaab ri̱ Damasco tub or wi doo, sij la bet tub yaa ryal bruuñ gashtal baa bet ñi dub yub la lo̱. 7Orze' wes sa̱a̱ la̱ lo yu, nunu güeñ ya̱ nu zaab ti' mbecy. Orze' nam: “Saulo, Saulo, ¿lagu rsheed zir ya̱?” nam. 8Orze' ya̱ mne̱e̱: “¿Cyu nac ru, Shuaana̱?” mne̱e̱. Orze' nam: “Ya̱ naca̱ Jesuuz, biñ nu pcyiiñ Nazaret, biñ nu ru rsheed zir”, nam. 9De yu nu za nu ya̱ bzaac dey yaa ze', nunu gudzib dey tees wangyeñ dey coz nu mnii biñ nu mnii nu ya̱ ze'. 10Orze' ya̱ mne̱e̱: “¿La coz rlagy ñi gyicya̱ Shuaana̱?” mne̱e̱. Orze' Shuaan na nam: “Weshte nunu gua Damasco. Orze' ze' nii mbecy lor dela coz nu rlagy ñi nu gyicy ru”, nam. 11Ya̱ byaca' lo̱ par nu nac yaa ryal ze'. Orze' de yu nu za du̱ bdu' yaa dey ya̱a̱ za nu dey ya̱ par Damasco. 12’Ze' rcyiiñ tub mbecy nu la Ananías. Yu ze' tub mbecy nu tona' la pcaa ic Ñgyoozh, nunu dzi bicy paay nu leey nu bzeeñ Moisees, nunu dela mbecy Israeel nu yu' Damasco nap mnii dey niy. 13Orze' yu ze' biid güiiy ya̱. Na ornu bru'ñay, orze' nay rab yu ya̱: “Bicya̱ Saulo, na gac zac ru tuuba' tir”, nay. Orze' laab or la ze' guc bzaaca̱ tuuba' tir, nunu bgüi̱i̱ loy. 14Orze' nay rab yu ya̱: “Ñgyoozh ni de gyitoo bel ni den pcuiim ru par nu gad lagy ru coz nu rlagy mi, nunu par nu zac ru biñ nu sac falt ni, nunu par nu gyeñ ru de riidz nu ruu ru' ub lam. 15Gun ru zat ru mi ze' lo de lo la mbecy nu yu' gyishlombecy. Shaal ru lo dey dela coz nu bzaac ru, nu dela coz nu güeñ ru. 16Orze' cue' cuez ru. Weshte, nunu bzu nis, nunu bicy cup consuel lo Shuaan den, gun orze' gyecy dela cyi nu bicy ru”, nay. 17’Orze' ya̱ bish cya̱ ga̱' yapa̱ Jerusaleeng. Orze' lat nu rne̱e̱ du̱ Ñgyoozh nañ yu' nu driib zily den mi, orze' bde' lo̱. 18Orze' bzaaca̱ Shuaan na. Orze' nam rab mi ya̱: “Bicy lal. Dzach ru bruu Jerusaleeng, gun de mbecy ii wayeña lagy dey de coz nu rniir nu nac ya̱”, nam. 19Orze' ya̱ mne̱e̱ lom nu “De mbecy ii nap rad lagy dey nu ya̱ gua̱ nañ dela yu' nu rsya' mbecy leey nir. Gua̱ bdu' ya̱a̱ de yu nu ricy cup consuel lor. Gua du̱ dey nañ yu' gyiib. Nunu bdi su̱ dey. 20Nunu ornu biit dey Shteb, yu nu bzat ru lo de mbecy, ni' ya̱ ri̱ lat de yu ze', nunu bicy de̱ tub zi'l riidz nu de yu ze'. Nunu ya̱ mña̱ shab de yu nu biit dey ze'”, mne̱e̱ lom. 21Orze' Shuaan den nam rab mi ya̱: “Char, gun ya̱ zuu neza̱ ru char zet lat de mbecy nu walab mbecy Israeel”, nam ―na Baly. 22Orze' bee nde' zi'l bzuub gyidag dey. Gaze' nu brugyi' dub ru' la dey rbish tiy. Orze' na dey: ―¡Rlagy ñi nu gat yu! ¡Walab se'ñ benu cui mbañ yu! ―na dey. 23Orze' rbish ti dey, nunu rboo dey shab yu brugyi' rne' dey ñi baa. Nunu rne' ga' dey yu gyedz par baa, gun tona' la guzi lagy dey. 24Orze' yu nu riib ic de soldad pcaay de soldad nu cha nuy Baly par nañ yu' nu rcyiiñ dey ze'. Orze' mniiy lo de soldad nu gaaz dey yu par nu gad lagy yu lagu rbish ti de mbecy Israeel nu nac Baly. 25Tees ornu pcyiig dey Baly par nu gaaz yuy, orze' nay rab yu jef ni soldad: ―Par lo leey, ¿a se'ñ nu gaaz der tub mbecy nu nash gyedz Rom benu nigul ri bee dey niy? ―nay rab yu jef ni soldad ze'. 26Na ornu jef ni soldad güeñ yu nde', orze' guay lo yu riib ic dey. Orze' nay rab yu yu ze': ―Cuidad nu coz nu gyicy ru, gun mbecy re nash yu Rom ―nay. 27Orze' yu riib ic ze' guay lo Baly. Orze' nay rab yuy: ―Mnii lo̱. ¿A laab nash ru Rom? ―nay. Orze' na Baly: ―Laab ―nay. 28Orze' nay rab yu Baly: ―Ya̱ sheñ tiñ brisha̱ par nu byaca̱ tub yu nu nash Rom ―nay. Orze' na ga' Baly: ―Tees ya̱ nasha̱ Rom gaal zi nese nu gula̱ ―nay. 29Orze' dela de mbecy nu bicy pee nu ngaaz Baly lueg la bruu chu dey loy. Nunu yu nu riib ic de soldad gudzib yu ornu gud lagy yu nu Baly nash yu Rom, nunu gudzib yu gyi' nu pcacuuñ dey yu nu caden. 30Orze' yu nu riib ic de soldad ze' rlagy yu gad lagy yu ben la cyi driib de mbecy Israeel ic Baly. Orze' tuuba' dzi, orze' pshaagy yu caden nu pcyiig dey Baly. Orze' pcaay de uz zub lo nu de yu nu zu riiñ ni junt zub lo nu gyatublaazh dey. Orze' za nuy Baly bzuy yu lo de yu ze'.

will be added

X\