Hechos 21

1Ornu bzeeñ de̱ de bicy na, orze' gu̱' de̱ nañ barc. Orze' za̱ de̱ li laa tub lugaar nu la Cos. Orze' tuuba' dzi za̱ de̱ Rodas. Ze' bru̱u̱ de̱ za̱ de̱ Pátara. 2Pátara byap de̱ tub barc nu za par Fenicia. Gu̱' de̱ nañ barc ze' za̱. 3Za̱ de̱ ze' nu rabee tub nac yu nu ri lo nisyudoo nu la Chipre. Orze' ze' briic de̱ welt bzeeñ de̱ Chipre par yaa reg na. Orze' za̱ de̱ par Siria. Orze' ze' blez barc gyedz Tiro, gun rlagy ñi gyet yuu ze'. Orze' ze' bet de̱ par lo yu. 4Orze' ze' byap de̱ la be mbecy ni Crisht, nunu pcyiiñ du̱ de̱ yu tub sman. Orze' nu nac Espiriit Yon ni Ñgyoozh mnii nu dey Baly nu cue' chay par Jerusaleeng. 5Tees ornu blazh tub sman, bru̱u̱ de̱ za̱. Dela dey nu mñaay nu de yu nguzh za nu dey de̱ ya̱ par ru' gyedz ze'. Orze' ze' bzu tib de̱ mne̱e̱ du̱ de̱ Ñgyoozh. 6Orze' mne̱e̱ de̱ ñgyoozh nu dey nu bi gya̱ de̱. Orze' gu̱' de̱ nañ barc. Ze' de mbecy ze' bish cya dey yay par yu'y. 7Orze' bru̱u̱ de̱ Tiro za̱ de̱. Orze' bya' lo byaj mi' ze' Tolemaida. Orze' ze' mne̱e̱ de̱ ñgyoozh nu de bicy na. Ze' pcyiiñ du̱ de̱ yu tub dzi. 8Na tuuba' dzi bru̱u̱ de̱ ze' za̱ de̱ par Cesarea. Orze' ze' za̱ de̱ yu' tub mbecy nu rshaal riidz ni Ñgyoozh, yu nu la Lip, nunu pcyiiñ du̱ de̱ yu. Yu ze' tub yu nu bruu lat gagy mbecy nu pcui dey Jerusaleeng par nu locyuub dey de aposht. 9Yu ze' zu tap i'ñ yu, fiñ mñaa nu nigul gad ñgyee. Rnii deñ de riidz nu rbic Ñgyoozh niñ. 10Ze' pcyiiñ de̱ la be dzi. Orze' bru'ña Agabo, tub mbecy nu rnii por cuen ni Ñgyoozh. Yu ze' bruuy gashtal Judea. 11Biid güiiy de̱ ya̱. Orze' gush yu sinch ni Baly, nunu pcyiig yu yaa ub yu, nunu pcyiiga'y gyi'y nu sinch ze'. Orze' nay rab yu de̱: ―Espiriit Yon ni Ñgyoozh nam: “Ii mod gyicy mbecy Israeel nu yu' Jerusaleeng nu shuaan sinch ii. Orze' gu' dey yu yaa de mbecy nu walab mbecy Israeel”, nam ―na Agabo. 12Na ornu güeñ de̱ de riidz ze', orze' de̱ ya̱ nu de mbecy Cesarea mnishba̱a̱ de̱ lo Baly nu cue' gyay Jerusaleeng. 13Tees orze' Baly nay: ―¿Lagu dzi ruun der? Tona' la ricy der nu ricy shni̱. Ya̱ bi zu̱ la̱ ca na nu zu̱ walab tub lo zi'l nu cyiig dey ya̱, sinu ni' zi'l bi zu̱ la̱ par nu gata̱ Jerusaleeng nu nac Shuaan den Jesuuz ―nay. 14Wangac cuugy de̱ lardooy. Orze' guca̱ de̱ nu rne̱e̱ nu cue' gyay. Orze' mne̱e̱ de̱: ―Gal nu rlagy Shuaan den Jesuuz, ni gac ―mne̱e̱ de̱. 15Na ornu blazh la be dzi, orze' bicy nap de̱ su̱u̱. Orze' bru̱u̱ de̱ ze' ya̱a̱ par Jerusaleeng. 16Ni' la be de mbecy Cesarea nu ricy cup consuel lo Crisht ya nuy de̱ ya̱. Zu tub mbecy Chipre nu la Mnasón. Yu ze' tona' la gulas bicy cup yu consuel lo Crisht. Orze' lo yu ze' bri̱ de̱. 17Na ornu bri̱ de̱ Jerusaleeng, orze' tona' la bet lagy de bicy na ornu bdzeel dey de̱ ya̱. 18Orze' na tuuba' dzi Baly gua nuy de̱. Gua güi̱i̱ de̱ Santiag, nunu ni' zi'l nguaa dela de mbecy nu zu riiñ ni de yu bel lat de mbecy ni Crisht ze'. 19Orze' Baly mniiy ñgyoozh nuy dey, nunu pshaal yu lo dey dela coz nu ricy Ñgyoozh num de mbecy nu walab mbecy Israeel par nu nac riiñ nu ricy yu. 20Na ornu güeñ dey nde' orze' byabic dey gyel mbecy ni Ñgyoozh. Orze' na dey rab yu Baly: ―Orze' na bicy na, ru gac cu' cuen ru nu yu' bee miily mbecy Israeel nu ricy cup consuel lo Crisht. Tona' la ricy zily dey leey nu bzeeñ Moisees. 21Na güeñ dey nu ru shiñ na riidz nu rlyuur ni de mbecy Israeel nu ricy cup consuel lo Crisht, de yu nu yu' ledz de mbecy nu walab mbecy Israeel. Güeñ dey nu rlyuur nu rlagy ñi zaan dey leey nu bzeeñ Moisees. Nunu mbecy rnii dey nu rlyuur nu cue' caa dey beey sircunsision cuerp ni i'ñ yu. Nunu güeñ dey nu rlyuur nu cue' gyicy paa dey nu de cushtom ni de mbecy Israeel. 22Segur la gyeñ dey nu ru brir Jerusaleeng. Orze' ¿la coz rlagy ñi nu gyicy den? 23I mod gyicy ru ricy pe̱e̱ de̱. Zu tap mbecy nu rlagy ñi gyicy yac dey nu riidz nu mnii dey lo Ñgyoozh nu segur la gyicy yu. 24Cha nur dey, nunu tublaazh la gyicy der coz nu rnii leey par nu gyicy caacy mbecy ub yu par lo Ñgyoozh. Orze' rlagy ñi cyish ru gasht ni dey. Orze' despuees shi'ñ dey gyich tooy. Ni mod gad lagy de mbecy nu riidz nu zaab ze' nde' gyel rguu, gun ni' ru gyicy paar nu leey nu bzeeñ Moisees. 25Ze' de mbecy nu walab mbecy Israeel nu ricy cup consuel lo Crisht, bi bzeed de̱ gyicy lo dey. Mne̱e̱ de̱ lo dey nu cue' sug ic dey nu nac de coz ze'. Nomaas walagy ñi nu gow dey beel nu rcuaa mbecy lo nab, nunu walagy ñi nu gow dey reñ, nunu ni walagy ñi nu gow dey bañcyug nu bduzi̱i̱ yeñ, nunu cue' gal dey mbecy nu wanchelaay ―na dey rab dey Baly. 26Orze' tuuba' dzi Baly gua nuy de mbecy ze', nunu bicy nuy dey mod nu rnii leey nu bzeeñ Moisees par nu gyacaacy mbecy lo Ñgyoozh. Gaze' nu gu'y loli' ni yu' nu driib zily mbecy Israeel Ñgyoozh, nunu bicy yu nu gud lagy de mbecy nu yu' ze' gul gya' lo tiem nu gyacaacy dey. Tiem ze', orze' tub ga la dey cuic yu gun lo Ñgyoozh. 27Na ornu bi rgaab lazh gagy dzi ze', orze' la be mbecy Israeel nu bruu lo de yu ni Asia bzaac dey Baly loli' ni yu' nu driib zily de mbecy Israeel Ñgyoozh. Orze' bicy dey nu pcha' ic de mbecy zigy. Orze' bdu' yaa dey Baly. 28Orze' rbish ti dey. Gaze' nu na dey: ―¡Der mbecy Israeel, blocyuub de̱ ya̱! Yu ii mbecy nu rded dela lugaar nu rlyuuy ni de mbecy coz nu za contr ni mbecy Israeel, nunu coz nu za contr ni leey nu bzeeñ Moisees. Nunu coz ze' zañ contr ni coz ni yu' nu driib zily den Ñgyoozh ii. Orze' yeed nuy la be mbecy griego nañ yu' nu driib zily den Ñgyoozh. Na rnuy yu' yon ni den ii ―na dey. 29Ni mnii dey, gun bzaac dey nu rded nu Baly tub mbecy Éfeso, yu nu la Trófimo. Orze' psa' lagy dey nu Baly gya nuy yu ze' par loli' ni yu' nu driib zily dey Ñgyoozh. 30Orze' dutuub la lat gyedz deet guc. Orze' byatublaazh dey carer. Bdu' yaa dey Baly. Por fers la za nu dey yu. Bruu nu dey yu loli' ze'. Za nu dey yu lat cay. Rgayu tuñ la dey yu. Nunu lueg la psoow dey ro' nu rzu' dey loli' ze'. 31Orze' dela mbecy zigy bicy pee dey nu ñgyut yu Baly. Orze' bzeed mbecy raso̱o̱ lo yu nu riib ic de soldad nu dutuub la lat gyedz Jerusaleeng yu' deet dey. 32Orze' yu nu riib ic ze' lueg la gua nuy de jef ni soldad, nunu gua nuy la be soldad. Orze' tub miiñ zi'l bi bru'ñay ze' nu yu' de mbecy zigy ze'. Na ornu de mbecy bzaac dey yu nu riib ic ze' nu de soldad, orze' guca dey nu rshet yu ni Baly. 33Orze' mbecy nu riib ic ze' guay lo Baly. Orze' mniiy lo mbecy nu cyiig dey yu nu cyup caden nu cha nu dey yu pres. Orze' nay rab yu mbecy: ―¿Cyu mbecy yu ii? ¿La coz bicy yu? ―nay. 34Yu' mbecy rbish tiy tub coz. Ze' yu' ga'y rniiy reña coz. Yu nu riib ic ze' wangad lagy lay la coz guc, gun tanta' ricy mbecy zu redz. Orze' pcaay mbecy nu cha nu dey Baly ze' nu yu' de soldad. 35Na ornu bru'ña nu dey yu gyi' scaler nañ ze' nu rcyiiñ de soldad ze', orze' rlagy ñi shup dey yu, gun tanta' guloc de mbecy zigy. 36De mbecy zigy zaab dey ich yu. Rbish ti dey. Orze' na dey: ―¡Biit yu! ―na dey. 37Orze' ornu bicy pee dey ñgya nuy Baly ze' nu yu' de soldad, orze' na Baly rab yu yu nu riib ic ze': ―¿A gac ne̱e̱ tub coz lor? ―nay. Orze' na yu nu riib ic ze': ―¿A gac niir riidz griego? 38Orze' ¿a walab ru mbecy Egipto, yu nu bi rac tiem ricy gyel yuu nu gubier, nunu gua nur tap miily yu nu rut mbecy par tub lugaar ub zi? ―nay rab yu Baly. 39Orze' na ga' Baly: ―Ya̱ naca̱ mbecy Israeel. Gula̱ Tarso, tub gyedz lily nu ri lo yu ni Cilicia. Nunu ya̱ ricy cupa̱ dela rishbeey nu ca lo cuen ni de mbecy gyedz ze'. Orze' bicy faboor bzaan ne̱e̱ du̱ de mbecy zigy ―nay. 40Orze' yu nu riib ic ze' briic yu rishbeey ni Baly nu niiy. Orze' Baly wes suy lo escaler ze'. Bicy yaay lo de mbecy zigy nu cue' gyicy dey zu redz. Na ornu guca nu zu redz, orze' Baly mniiy lo dey nu riidz hebreo.

will be added

X\