Hechos 20

1Na ornu guca de gyel deet ze', orze' Baly bicy tublaazh yu de mbecy nu ricy cup consuel lo Crisht. Orze' briic yu consef ni dey. Orze' despuees mniiy ñgyoozh nuy dey. Orze' bruuy zay par Macedonia. 2Lat nu zay de lo yu ni Macedonia, dzi briic yu baloor ni de mbecy ni Crisht. Orze' briy Grecia. 3Ze' pcyiiñ yu chon beey. Na ornu bzu lily yu nu chay par Siria nañ tub barc, orze' gud lagy yu nu de mbecy Israeel psaap dey riidz nu shiñ gyicy nu dey yu. Orze' mnii tooy nu cush cyay, ded yu lo de yu ni Macedonia tuuba' tir. 4Sópater, tub mbecy Berea, gua nuy yu. Yu ze' i'ñ Pirro. Ni' zi'l reña' mbecy gua nu dey yu. Gush lañ: Aristarco, nu yu nu la Segundo, cyup de yu ze' mbecy Tesalónica, nu Gayo, tub yu Derbe, nu Timoteo, nu Tíquico nu Trófimo, cyup de mbecy ze' bruuy lo de yu ni Asia. 5Orze' de mbecy ze' za ga la dey par lo de̱. Za dey tub gyedz nu la Troas. Ze' blez dey de̱ ya̱. 6Ze' de̱ ya̱, ornu bded sa' nu row dey gyishtily nu sac lebadur, orze' gu' de̱ nañ barc. Orze' bruu de̱ Filipos za̱ de̱. Na ornu bza' gaay dzi, orze' bri̱ de̱ Troas. Orze' byatublaazh de̱ nu losa̱'. Ze' pcyiiñ de̱ tub sman. 7Orze' dzi loga la ni sman byatublaazh de̱ nu losa̱' nu da̱w de̱ gyit mod nu bzeeñ Jesucrisht. Orze' Baly pshaal yu riidz ni Crisht lo de mbecy. Zaab rnii lay lo dey gashtal or guzeel rel, gun tuuba' dzi gyay. 8Orze' byatublaazh de̱ nañ tub yu' nu zub gya ni tub yu' chon shily. Ze' rca gyi ni zañ candiil. 9Ze' zub tub yu feñ nu la Eutico. Zub yu ru' bentan. Lat nu rnii Baly, orze' tona' la byeed pcaal yu gashtal por fi̱i̱ gush la pcaal yu, gun Baly dzi tuñ mniiy. Orze' bruuy gal shily chon ni yu' ze'. Bet lag yu gal lo yu la. Orze' pshes nañ dey yu gut lay. 10Orze' Baly bet yu par lo yu. Orze' gusaab tiily yu. Bdu' yaay yu. Orze' nay: ―Cue' dzib der gun gabee mbañ yu ―nay. 11Orze' gupa'y laab gal gya ze' bdow nuy dey gyit mod nu bzeeñ Jesuuz. Despuees orze' chi bee nuy dey riidz gashtal briib la doo. Gaze' nu bruuy lo dey zay. 12Orze' ya nu dey yu feñ ze' par yu'y mbañ yu. Orze' guud baloor ni dey. 13Orze' bzeeñ Baly de̱ ya̱. Gaze' nu gu̱' de̱ nañ barc za̱ ga̱ de̱ lo par Aso. Ze' chu' Baly nañ barc. Ni mniiy nu gyicy de̱, gun rlagy yu chay gyi' lay par Aso. 14Na ornu bdzeel de̱ Baly Aso, orze' gu'y nañ barc. Orze' za̱ de̱ par Mitilene. 15Orze' ze' bru̱u̱ de̱ za̱. Orze' tuuba' dzi bri̱ de̱ Quío. Gal tuuba' dzi bri̱ de̱ Samos. Ze' bzu lagy de̱ Troguilio. Orze' tuuba' dzi bri̱ de̱ Mileto. 16Gun Baly bdu' ic yu nu ded nez zi'l yu Éfeso, gun orze' cue' ganda̱y yu lo yu ni Asia, gun gyeel riy Jerusaleeng, gun dzi ga dugyi ru'y sa' ni Pentecostés. 17Orze' lat nu ri Baly Mileto, bzeed yu raso̱o̱ za nu mbecy par Éfeso. Mniiy nu cha de yu bel ni de mbecy ni Crisht nu cha cheel dey yu. 18Na ornu bri dey, orze' nay rab yu dey: ―De ru rad lagy der la coz bicya̱ nese dzi loga la nu bri̱ de lo yu ni Asia. 19Dub laa tiem nu pcyiiña̱ lat der bicya̱ coz nu mnii Shuaan den lo̱. Nunu rila wangyale̱', sinu bicya̱ riiñ ze' tiem nu deet rac. Nunu tiem ze' tona' la bicy shni̱ par nu nac de coz a̱' nap nu psaap de mbecy Israeel riidz nu ñgyicy nuy ya̱. 20De ru rad lagy der nu ya̱ rila wancheca̱ nu ne̱e̱ ni tub la coz nu rlagy ñi nu locyuuba̱ der. Tees ya̱ pshaala̱ de riidz ni Crisht, nunu blyu̱u̱ ni der lat de mbecy zigy gal nu nañ yu' ni der. 21Blyu̱u̱ ni de mbecy Israeel, nunu tant blyu̱u̱ ni de mbecy nu walab mbecy Israeel. Ya̱ mne̱e̱ lo dela mbecy nu rlagy ñi ne' dey de cyi nu ricy dey, nunu gyicy yu coz nu rlagy Ñgyoozh. Nunu rlagy ñi gyicy cup dey consuel lo Shuaan den, Jesucrisht. 22Orze' na cha̱ par Jerusaleeng gal nu mnii Espiriit Yon ni Ñgyoozh lo̱ nu gyicya̱. Ni wagad lagy ya̱ la coz zaca̱ re. 23Tub zi la coz rad lagy ya̱. Nu dela gyedz nu rdeda̱ Espiriit Yon ni Ñgyoozh rniim lo̱ nu gyet laga̱ nañ yu' gyiib, nunu zañ coz deet zaca̱ de ze'. 24Tees ya̱ rnii to̱o̱ nu se la la saca̱ nu cyiiña̱ gyishlombecy ii, benu chi ga nde' gyicy ñi nu shupa̱ laza̱, nunu za' lo̱ de riiñ nu briic Shuaan den Jesucrisht nu gyicya̱. Riiñ ze' nde' nu shaala̱ de riidz nu sac nu bruu lo Ñgyoozh, de riidz nu rniiñ nu dzi coz nap ricy nu Ñgyoozh de ub na. 25’Ya̱ gusa̱ mne̱e̱ de riidz ni gyel gubier ni Ñgyoozh lat der, nunu na rad lagya̱ nu rila wazaca' der ya̱. 26Nde' nu dzi na ya̱ ne̱e̱ lo der, benu yu' mbecy bdune' lat der, ya̱ sac falt ne̱. 27Gun ya̱ mne̱e̱ lo der dela coz nu bloo ic Ñgyoozh nu gyicy mi, nunu wancach ru̱' ni tub lañ. 28Bicy cuidad der ub ru, nunu bicy cuidad der nu de mbecy zigy nu bzeeñ Ñgyoozh nu ña der. Ña der dela mbecy nu ricy cup consuel lo Shuaan den, biñ nu brish cyi den nu nac nu pshum reñ mi. 29Ya̱ rad lagya̱ nu despuees ornu ru̱u̱ lat der, cyid mbecy a̱' nap. Gyicy yu nu laa yaa de mbecy ni Crisht de coz rishli. Na dey gal na lob dañ nu nit lo ma shily. 30Shuub dzi nu ruu la be mbecy rguu lat der. Lyuu dey coz fals, gun orze' de mbecy ni Crisht cha cay ich yu. 31Cuidad der, nunu cue' nit lagy der nu dzi rel la ya̱ blyu̱u̱ ni der nu nis lo̱ nañ chon ña'n lat nu tona' la bzac zi̱. 32’Orze' der bicy na, ya̱ zeeña̱ der yaa Ñgyoozh nu ñam der. Nunu ya̱ drish lo̱ nu de riidz nu rnii de coz ily nu ricy Ñgyoozh locyuub ñi de ru, gun gyicy fert ñi der, nunu gac cuic ñi dela coz nu bzu chum par dela mbecy nu bi pcuim nu gac nim. 33Ya̱ rila wansaab lagya̱ ni tiñ ni mbecy, ni de shab mbecy. 34Gun de ru nap rad lagy der nu ya̱ bicya̱ riiñ par nu gad coz nu rlagy ñi ne̱, nunu coz nu rlagy ñi ni de yu nu gusa nu ya̱. 35Dub laa tiem rlyu̱u̱ ni der nu ni mod rlagy ñi gyicy den riiñ, nunu locyuub den de mbecy nu ricy falt la coz ni. Byeza' lagy der de riidz ni Shuaan den Jesuuz ornu nam: “Gacyit zir lagy mbecy ornu cuic yu coz ni losa'y gaze' ornu gash yu coz nu cuic losa'y niy”, nam ―na Baly. 36Na ornu blazh mnii Baly de nde', orze' gusu tib yu nuy dey. Mnii nuy Ñgyoozh nu dela dey. 37Orze' dela mbecy biiñ yu, nunu bdu' yaa dey yeñ Baly. Nunu bdow dey chit lo Baly. 38Tona' la bicy shni dey, gun mnii Baly nu wazaca' dey yu. Orze' za nu dey yu gashtal lo la barc.

will be added

X\