Hechos 2

1Ornu pshuub dzi ni sa' nu la Pentecostés, dela de mbecy ni Crisht yu' dey tublaazh la tub se' zi'l. 2Orze' derepent la brugyi' rzigy baa. Gal rac nu yad tub bi ily ni rac. Nunu dutuub la nañ yu' ze' nu nguaa dey bzigy. 3Orze' bruu zac gal nu na lyush gyi na bruu zac. Gul ñii tub ga la dey. 4Orze' dela dey gutib ic za' la Espiriit Yon ni Ñgyoozh dey, nunu brugyi' rnii dey riidz reña' mbecy. Dub gal lac na riidz nu briic Espiriit Yon ni Ñgyoozh nu nii dey dub ni mod mniiy. 5Tiem ze' zañ mbecy Israeel nu zu shcab nu nac de coz ni Ñgyoozh yu'y Jerusaleeng. Zañ lugaar ni gyishlombecy bruu dey. 6Ornu bzigy ze', orze' tona' la mbecy zigy byatublaazh yu. Nunu guton la dey yu'y, gun tub ga la de mbecy ni Crisht ze' brugyi' rniiy riidz de mbecy nu bde' ze'. 7Dela mbecy bdzo'w laa dey, nunu za nu la ic dey. Orze' nay: ―¡Güii ñuu! Ze' ¿a walab mbecy Galilea nac dela mbecy nu rnii ii? 8Ze' ¿lac guc nu rac rnii dey de riidz guledz tub ga la den? 9Gun ii yu' mbecy nu bruu zañ lugaar. Yu' mbecy nu bruu Partia, yu nu bruu Media, yu nu bruu Elam, yu nu bruu Mesopotamia, yu nu bruu Judea, yu nu bruu Capadocia, yu nu bruu Ponto, yu nu bruu Asia, 10yu nu bruu Frigia, yu nu bruu Panfilia, yu nu bruu Egipto, yu nu bruu de lugaar ni Libia nu yu' par lo Cirene. Dela ze' bruu de mbecy nu yu' ii. Nunu gaza' de mbecy nu bruu Rom nu rcyiiñ laab ii. Yu' de yu nu nac mbecy Israeel nese nu gul laa dey, nunu yu' ga' de yu nu byac mbecy Israeel. 11Nunu gaza' mbecy nu bruu Creta, mbecy nu bruu Arabia. ¡Dela ze' bruu tub nac ga den, tees dela den reñ na coz ily ni Ñgyoozh nu riidz na! ―na dey. 12Dela mbecy bdzo'w laa dey, nunu guton la dey yu'y. Se nu rgugyi' zi'l dey lo losa'y yu'y: ―Ze' ¿lac yaruu de nu nii? ―rnii dey. 13Tees yu' ga' mbecy canu rgubdzaa dey. Orze' nay: ―¡Ni ricy dey gun rzugy yu! ―na dey. 14Orze' wes su Bed nu de' zir de trotub aposht gaze' nu brugyi' ye la rniiy. Orze' nay: ―De ru mbecy Israeel, gal nu dela de ru mbecy nu yu' gyedz Jerusaleeng, rlagy ñi gad lagy der de coz nu rac ii, nunu nap bzuub gyidag der de coz nu ne̱e̱. 15De mbecy ii walab nu rzugy dey gal nu rnii too de ru. Gyiib gaa zi or napor yu'n na. Walab i or gzugy mbecy. 16Sinu na ricy yac ñi coz nu pcaa Joeel, yu nu mnii por cuen ni Ñgyoozh. Ñgyoozh nam: 17Ornu bi yad lazh tiem, ya̱ rica̱ Espiriit ne̱ ni de lo la mbecy. Orze' dela de yu nguzh ni dey, gal nu dela de fiñ nguzh ni dey, gnii dey por cuen ne̱. De yu feñ gyicya̱ nu de' lo dey de coz nu gac. Nunu de yu bel lat pcaal dey rica̱ nu gad lagy yu de coz nu gac. 18Laab tiem ze' rica̱ Espiriit Yon ne̱ ni yu nu ricy coz nu rne̱e̱, nunu rica̱'m ni de biñ mñaa nu ricy de coz nu rne̱e̱. Orze' gnii dey por cuen ne̱. 19Ya̱ gyicya̱ zañ coz ily baa. Ze' lo yu gyicya̱ coz par nu gad lagy mbecy la tiem. Shu reñ; grib gyi; nunu grib dzeeñ nan. 20Gyet cow lo doo. Ze' lo beey gyet ña gal na reñ. Dela nde' gac ñii anzir nu shuub dzi nu bi pcui̱ par nu gyicy ya̱ gyel fushtiz ne̱. Dzi ze' tona' la dzi ily. Nunu dzi ze' tona' la cyit gac. 21Nunu dela mbecy nu nish baa lo̱ nu gloo mbaña̱ dey, de yu ze' gruu mbañ yu, nam. Ni pcaa Joeel gulas. 22’De ru mbecy Israeel, bzuub gyidag der de coz nu ne̱e̱ na. Ñgyoozh naal la briic mi nu gad lagy der nu Jesuuz, biñ nu pcyiiñ Nazaret, bdu' gyim riiñ ni Ñgyoozh nu nac de coz ily nu bicy mi lat de ru. Ñgyoozh bicy mi nu bicy Jesuuz zañ coz ily. Bicy mi nusuriidz. Bicy mi zañ coz par nu gad lagy der cyu nac mi. 23Tees Ñgyoozh nil nese gulas bi mne̱' ic mi, coz nu gyicy mi. Nunu bi gud lagy mi nu gyet lag mi yaa der. Orze' de ru gua nu der mi pres. Gaze' nu bicy der nu de mbecy nu wagyicy yac de leey ni Ñgyoozh biit dey mi lo cruuz. 24Tees Ñgyoozh bicy mi nu byabañ mi. Bloom mi lat de mbecy gut, gun ze' nu yu' mbecy gut wac soow ñi lom. 25Gun Dabi laab mi bzat yu ornu pcaay: Ya̱ rad lagya̱ nu zaab zu gala Ñgyoozh lo̱. Zub mi par yaa be̱e̱, gun orze' mas lac ru' wagyicy deet mbecy nuy ya̱. 26Nde' nu tona' la gusu cyit lagya̱, nunu mne̱e̱ riidz nu rnii mbecy nu zu cyit lagy. Nunu drish lo̱ lo Ñgyoozh nu nac cuerp ne̱. 27Gun ru wazaan ru nu gyiyeeñ lardo̱o̱ lat de mbecy gut. Ni wazaan ru nu gadz cuerp ni mbecy yon nir. 28Ru mniir lo̱ mod nu gyicya̱ par nu cui mbaña̱. Ya̱ tona' la chesu cyit lagya̱, gun nac nur ya̱, pcaa Dabi. 29’Der bicy na, naal la za de riidz ii. Gyitoo bel ni den Dabi gut yu. Orze' pcach dey yu. Nunu baa niy rzac den ñi mas gal dzi na. 30Tees Dabi guc yu tub mbecy nu mnii por cuen ni Ñgyoozh. Gud lagy yu nu Ñgyoozh mniim nu waded la nu lat ca na tub nez yu, ruu biñ nu pcuim nu gac Shuaan den gal nu ub yu guc yu rey nu byub ic den. 31Nde' nu Dabi gud lagy yu coz nu gyicy Ñgyoozh. Mniiy nu biñ nu pcuim nu co mbañ de mbecy nim gat mi. Orze' gyabañ mi. Mniiy nu lardoom wayiyeeñ ñi lugaar ze' nu ryeeñ de mbecy gut, nunu mniiy nu cuerp nim wadz ñi. 32Mi ze' laab Jesuuz. Bicy Ñgyoozh nu byabañ mi, nunu de̱ ya̱ bzaac urlo̱ la̱ de nde'. 33Na Ñgyoozh bicy mi nu zub mi ze' nu zub biñ zub lo zir par dela. Zub mi par yaa beem. Orze' Ñgyoozh Uz mi briic mi Espiriit Yon nim ni mi ze'. Gal nu mniim, ni bicy mi. Na dela coz nu rzac der ii, nunu dela coz nu reñ der ii, dela nii bruuñ gal lom. 34Gun Dabi walab ub yu gup yu gyibaa gal nu gup Jesuuz. Sinu ub lay mniiy ornu nay: Ñgyoozh nam rab mi Shuaan na: Bzub par yaa be̱e̱, se' mbecy zub lo zir, 35Lat nu gyicya̱ nu gyicy ru gan de losa' yuur, nam, na Dabi. 36’Nde' nu dela mbecy Israeel rlagy ñi nu gad lagy dey nu Jesuuz, biñ nu biit dey lo cruuz, Ñgyoozh bicy mi nu nac mi Shuaan den, nunu nac mi biñ nu bloo sum nu co mbañ den ―na Bed. 37Ornu güeñ de mbecy de riidz ze', orze' tona' la bicy dey sentiir nañ lardooy. Gaze' nu na dey rab yu Bed nu de' zir de aposht: ―Der bicy na, ¿la coz rlagy ñi nu gyicy de̱? ―na dey. 38Orze' na Bed rab yu dey: ―Mne̱' der dela de cyi nu ricy ru, nunu dela der bzu nis der par nu gabe nu nac der mbecy ni Jesucrisht, gun orze' gyicy sulagy Ñgyoozh de cyi der, nunu gaze' nu cuic mi Espiriit Yon nim ni der. 39Gun Ñgyoozh bi mniim nu segur la cuic mi Espiriit Yon nim ni de ru nu ni de i'ñ ru nu chu' par lo, nu ni dela de mbecy nu yu' zet, de yu nu bi blosum ―na Bed. 40Dela nde' mniiy, nunu zañ zir riidz mniiy lo dey. Briic yu consef ni dey. Nunu mniiy lac gyicy dey. Orze' i mod mniiy: ―Bicy der nu glar ni cashtig nu cuic Ñgyoozh ni de mbecy a̱' nap nu yu' na ―nay. 41Orze' de yu nu “O” mnii ni de riidz nu mnii Bed, dela dey bzu nis yu. Dzi ze' chon miily mbecy brugyi' ricy cup yu consuel lo Jesuuz, reñ de yu nu nil bi ricy cup consuel lom. 42Orze' dela dey fert la zu dey shcab nu nac de coz nu rlyuu de aposht. Nunu yatublaazh dela dey nu ro nuy losa'y riidz. Nunu yatublaazh dela dey ricy yu che nu losa'y gal mod nu bzeeñ Crisht. Nunu yatublaazh dey nii nuy Ñgyoozh. De nde' coz nu zaab bicy la dey. 43Dela de mbecy za nu ic dey nu nac de coz nu bicy de aposht, gun de aposht bicy dey zañ coz ily. Nunu zañ nusuriidz bicy dey. 44Dela de yu nu ricy cup consuel lo Crisht ze' tona' la nap byap riidz ni dey nu losa'y. Nunu dela dey rlew yu de coz nu cyiiñ lat de losa'y. 45Rut dey de coz nu yu' niy. Orze' rlew dey ñuu ga tiñ nu losa'y dub gal lac tant nu cyiiñ ni tub ga dey. 46Orze' de dzi la yatublaazh dey nañ yu' nu driib zily mbecy Ñgyoozh, nunu yatublaazha' dey yu' losa'y nu ricy dey che tublaazh gal mod nu bzeeñ Crisht. Nap zu lagy dey. Nunu dub gal ri lagy dey bicy yu de nde'. 47Ryabic dey gyel mbecy ni Ñgyoozh. Nunu dela reña' mbecy, nap yu' nuy dey. Nunu Ñgyoozh tub dzi ga rcyaañ zir mi mbecy nu ricy cup consuel lo Crisht.

will be added

X\