Hechos 19

1Lat nu ri Apolos Corinto, Baly gusay de lugaar ni logyi'. Orze' briy Éfeso. Ze' byap yu la be mbecy nu ricy cup consuel lo Crisht. 2Orze' nay rab yu dey: ―¿A guud Espiriit Yon ni Ñgyoozh ni de ru, ornu nu loga la nu bicy cup der consuel lo Crisht? ―nay. Orze' na dey: ―Ni wangyeñ de̱ ti yu' tub Espiriit Yon ni Ñgyoozh ―na dey. 3Orze' na Baly: ―Benu ni, orze' ¿lac yaruuñ ornu briib nis dey de ru? ―nay. Orze' na dey: ―Yaruuñ gal nu mnii Waa ―na dey. 4Orze' na Baly: ―Waa briib nis yu de mbecy nu bi mne' de coz cyi, nunu mniiy lo de mbecy Israeel nu gyicy cup dey consuel lo biñ nu cyid despuees par lo ub yu. Mi ze' lam Jesuuz ―nay. 5Ornu güeñ dey riidz ze', orze' bzu nis dey par nu gabe nu nac dey mbecy ni Shuaan den, Jesuuz. 6Orze' Baly briib yaay too dey. Orze' Espiriit Yon ni Ñgyoozh bicy nim dey. Orze' mnii dey nu riidz reña' mbecy, nunu mnii dey por cuen ni Ñgyoozh. 7Lo dela dey tub trocyup yu gyeey nac yu. 8Lat chon beey gua Baly nañ yu' nu rsya' de mbecy Israeel riidz ni Ñgyoozh, wanchib lay mniiy lo de mbecy. Bee nuy dey riidz, nunu bicy yu nu bguugy lardoo dey nu nac riidz ni gyel gubier ni Ñgyoozh. 9Tees bruu su la be mbecy ze' nu bicy cyigy lardoo dey, nunu wacheña lagy yu. Shiñ mnii dey ni de coz ni Shuaan den lat de mbecy zigy. Nde' nu Baly bruuy lat dey. Orze' za nuy de mbecy nu ricy cup consuel lo Crisht par nañ tub yu' scuel, nu la Yu' Scuel ni Shi Tirano. Ze' bee nu Baly de mbecy riidz de dzi la. 10Ni bicy yu nuy dey nañ cyup ña'n. Nde' nu güeñ dela mbecy nu yu' lo de yu ni Asia de riidz ni Shuaan den: tant mbecy Israeel, tant mbecy nu walab mbecy Israeel. 11Nunu Ñgyoozh tona' la nusuriidz ily bicy mi par nu nac Baly. 12Mas tub bay ni Baly o tub shab yu nu rzuy rza nu dey lo de mbecy rat. Orze' de mbecy rat ze' ryac yu. O benu nuras bicy ras nuy dey, orze' druu chu nuras ze' lo dey. 13Na yu' la be mbecy Israeel nu rded rboo nuras. Orze' yu ze' bicy peey mbooy nuras nu nac rishbeey nu rbic Jesuuz. Orze' na dey rab yu nuras: ―¡Par nu nac rishbeey ni Jesuuz, biñ nu rzat Baly, rne̱e̱ de̱ lor nu ruu chur lo mbecy ii! ―na dey. 14Ni bicy gagy i'ñ tub mbecy nu la Esceva. Yu ze' tub yu nu riib ic de uz. 15Tees ornu ni gugy dey nuras, orze' na nuras rab yu dey: ―Ya̱ yu' lo̱ Jesuuz, nunu ya̱ yu' lo̱ cyu nu Baly. Ze' de ru ¿cyu nac ru? ―nay. 16Orze' mbecy nu bicy ni nuras ze' tona' la fert pshet yaay dey. Bicy yu gan dey. Orze' bruu dey nañ yu' ze' carer. Guud güii dey, nunu por fers la blooy dela shab dey. Gyid yaagy la dey yay. 17Dela de mbecy Éfeso nu de mbecy Israeel gal nu mbecy nu walab mbecy Israeel, dela dey güeñ dey de coz nu guc nunu tona' la gudzib dey. Orze' tona' la briib zily mbecy Jesuuz. 18Orze' zigy mbecy nu ricy cup consuel lo Crisht bicy caacy yu de cyi nu bicy yu lat de mbecy. 19Zigy de mbecy nu bicy tu' losa' bicy tublaazh dey de libr ni tu' ni dey, nunu pcaa dey gyiñ lo rgüii la de mbecy zigy. Na ornu bloo dey cuen ben la be sac de libr ze', orze' pshuub ñi pres ni cyaal gaynal miily tiñ plat. 20Ni mod guc. Orze' bzu laa riidz ni Ñgyoozh, nunu bicy ñi nu byanap de mbecy. 21Na despuees nu bi guc de coz ze', orze' Baly mnii tooy nu ches say lo de yu ni Macedonia nu lo de yu ni Acaya. Na ornu lazh chesay de lugaar ze', orze' mnii tooy nu gyay Jerusaleeng. Orze' nay: ―Lazh nde' rlagy ñi cha̱ güi̱i̱ gyedz Rom ―nay. 22Na tub tiem, lat nu gabee riy lo yu ni Asia se tub tiem, orze' bzuu nez yu Timoteo nu Erasto nu cha ga dey par Macedonia. De yu ze' nil rlocyuub dey Baly. Orze' Baly bzuu nez yu dey zay. 23Tiem ze' tona' la deet guc par nu nac de coz ni Shuaan den Éfeso. 24Zu tub mbecy nu la Demetr. Yu ze' tub yu nu ricy nap plat. Bzaay nab ni yu' nu driib zily mbecy tub ñgyoozh nu la Diana. Orze' tona' la sheñ tiñ rad ni de mbecy nu rzaa de nab ze'. 25Orze' bicy tublaazh yu de mbecy nu ricy laab losa' riiñ nu ricy ub yu. Orze' nay rab yu dey: ―De ru mbecy, de ru rad lagy der nu dzi gusht rcyiiñ den par nu nac riiñ nu ricy na. 26Gun de ru rzac der nunu reñ der de coz nu rnii Baly. Rniiy nu ñgyoozh nu rzaa mbecy, nde' rila walab ñgyoozh, nunu bi bicy yu gan nu pcuugy yu lardoo zañ mbecy nu laa yaa dey de ñgyoozh ze': tant Éfeso gal nu dela lugaar lo yu ni Asia. 27Orze' dzi rishdzidz walab tub lo zi'l nu nii zi mbecy ni de riiñ nu ricy na, sinu ni' zi'l gyicy dey nu se la la sac yu' ni Diana, ñgyoozh lily ni den. Orze' nit lo gyel lily nim. Nunu biñ re biñ nu driib zily dela mbecy Asia, nunu dela mbecy nu yu' gyishlombecy ―nay. 28Na ornu güeñ de mbecy ze' de riidz ze', orze' tona' la guzi lagy dey. Orze' brugyi' rbish ti dey. Orze' nay: ―¡Tona' la coz ily nac Diana ni de mbecy Éfeso! ―na dey. 29Orze' dutuub la lat gyedz brush las nu zu redz ze'. Orze' de mbecy zigy bdu' yaa dey Gayo nu Aristarco, cyup mbecy Macedonia nu rded nu Baly. Orze' za nu dey yu carer par nañ yu' nu ryatublaazh de mbecy. 30Baly ngulagy yu chay lo de mbecy zigy tees de mbecy ni Crisht wansaan dey. 31Nunu la be de fushtiz ni Asia, de yu nu nac amig ni Baly, bzeed dey raso̱o̱ loy nu cue' chu'y nañ yu' nu ryatublaazh mbecy ze'. 32Ze' tona' la zu redz gu' de mbecy. Tub mbecy rbish tiy tub coz. Ze' tuuba' mbecy rbish tiy reña' coz. Orze' zigy zir de mbecy nu wangad lagy dey lagu byatublaazh yu. 33Yu' mbecy nu briic yu fers ni Alejandro, gun de mbecy Israeel mnii dey loy nu chay cha niiy lo dela de mbecy. Orze' Alejandro bicy yaay lo dey par nu cue' gyicy dey zu redz. Bicy peey niiy tub riidz par nu gabe nu sac falt ni de mbecy Israeel lo de mbecy zigy. 34Tees de mbecy zigy byu' lo dey yu nu nac yu mbecy Israeel. Orze' tublaazh la brish ti dey nañ cyup or. Orze' na dey: ―¡Tona' la coz ily nac Diana ni de mbecy Éfeso! ―na dey. 35Or guchi orze' scyerban ni gyedz ze' pcyaag yu ic de mbecy zigy. Orze' nay: ―De ru mbecy Éfeso, dela mbecy rad lagy dey nu bdugyi gyedz Éfeso ii par nu ña dey yu' ni ñgyoozh lily, yu' ni Diana, nunu par nu ña dey nab mi nu bruu gashtal gyibaa bet lag ñi. 36Nunu ni tub la mbecy wac niiy nu de coz nu mne̱e̱ nde' tub coz nu walab rishli. Orze' nde' nu rlagy ñi gyag ic der nunu cue' gur gyicy la der. 37De ru biid nu der de mbecy ze' par ii mas wangyicy gubaan dey la coz nu yu' nañ de yu' nu driib zily den ñgyoozh nin. Ni wannii zi dey nim. 38Benu Demetr nu de yu nu ricy nuy riiñ rlagy dey cu'y cyi ca na mbecy, orze' par nde' yu' dzi nu yu' de fushtiz par nu ri beey ni de mbecy. Lo de yu ze' gad gyel fushtiz. 39Tees benu yu' reña' coz nu rlagy der niir, orze' rlagy ñi za' lo der ñii ii lat de junt nu cu' de fushtiz. 40Gun na rishdzidz nis nii mbecy nu bicy den gyel yuu lat de ub na par nu nac de coz nu guc dzi na. Wad la ru'n niin lagu ni gu' deet na ii. Ni' wac shaal den lo mbecy lagu ni rlagy na gyicy na ―na scyerban ni gyedz ze'. 41Orze' ornu bded nu ni mniiy lo de mbecy, orze' ptush las yu dey yay.

will be added

X\