Hechos 18

1Na despuees ni de nu nde', bruu Baly Atenas, zay tub gyedz nu la Corinto. 2Ze' bdzeel yu tub mbecy Israeel nu la Aquila. Yu ze' tub mbecy Ponto, tees sa bruuy lo de yu ni Italia nu mñaay, tub biñ mñaa nu la Priscila. Bruuy Italia, gun Clau, yu nu riib ic de nasyoong, pcaay dela mbecy Israeel nu ruu dey tub gyedz ni Italia nu la Rom. Orze' Baly gua güiiy dey. 3Orze' byeeñ nuy de yu ze', nunu tublaazh la bicy dey riiñ, gun Baly nac yu tub yu nu rzaa yu' negy. Laaba' nde' dalje̱z nu ricy Aquila nu mñaay. 4De sab, dzi nu rzu lagy de mbecy Israeel, rza Baly nañ yu' nu rsya' de mbecy Israeel riidz ni Ñgyoozh, gun rlagy yu cuugy yu lardoo de mbecy Israeel, nunu tant mbecy nu walab mbecy Israeel. 5Na ornu bruu Silas nu Timoteo Macedonia za dey par Corinto. Orze' Baly wangyicy yu reña' riiñ. Se tub lo zi'l nu rshaal yu riidz ni Crisht. Naal la blyuuy ni de mbecy Israeel nu Jesuuz laab mi ze' Mesías, biñ nu bloo su Ñgyoozh. 6Tees ornu gua dey contr niy, nunu ornu shiñ mnii dey niy, orze' bdib yu shab yu par nu gabe nu wangash dey riidz ze'. Orze' nay: ―Benu de ru dune'r, laab der yu' falt nir. Ya̱ sac falt ne̱. Na par lo ya̱ cha̱ lat de mbecy nu walab mbecy Israeel ―nay. 7Orze' bruuy nañ yu' nu rsya' de mbecy Israeel riidz ni Ñgyoozh ze', zay cyiiñ yu yu' tub mbecy nu la Ticio Justo, tub yu nu rca Ñgyoozh. Yu ze' rcyiiñ yu cuit yu' nu rsya' de mbecy Israeel riidz ni Ñgyoozh. 8Tees Crispo, yu nu riib ic nañ yu' nu rsya' mbecy Israeel riidz ni Ñgyoozh, yu ze' nu dela famil niy bicy cup yu consuel lo Shuaan den. Nunu zigy zir mbecy Corinto güeñ dey riidz ni Crisht, nunu bicy cup dey consuel lom, nunu wi nis dey. 9Na tub rel Shuaan den Jesuuz bruu zac mi lo Baly mod ni pcaal. Orze' nam rab mi yu: ―Cue' dzib ru. Zaab nii lar riidz ne̱. Cue' checar nu niir lo de mbecy. 10Gun ya̱ nac du̱ ru. Ni tub la mbecy wac shiñ gyicy nuy ru, gun zigy de mbecy gyedz ii nac dey mbecy ne̱ ―nam. 11Orze' byeeñ yu ze' tub ña'n nu. Orze' blyuuy riidz ni Ñgyoozh ni de mbecy. 12Ornu Galión bdugyiy riiñ nu riib ic yu por cuen ni gubier ni Acaya, de mbecy Israeel byatublaazh dey nu cha dey contr ni Baly. Orze' gua nu dey yu ze' nu dri bee Galión ni de mbecy. 13Orze' na dey rab yu Galión: ―Yu ii rcuugy yu lardoo de mbecy nu cay Ñgyoozh tub mod nu za contr ni leey ―na dey. 14Na ornu Baly bicy peey niiy, orze' na Galión rab yu de mbecy Israeel: ―Benu bicy yu coz nu walab se'ñ, o benu bicy yu tub cyi ily nu tona' la shiñ, orze' rlagy ñi gyicy cupa̱ pase̱z du̱ de ru mbecy Israeel. 15Tees como rtub su der losa'r nu lac yaruu de riidz, nunu rtub su der losa'r nu nac ca na tub mbecy, nunu rtub su der losa'r nu nac leey ni ub der, orze' laab de ub ru rlagy ñi nu za' lo der gyel cha' ic ni ub ru. Ya̱ wari be̱e̱ coz nu na gal nu na nii ―na Galión. 16Orze' pcyuu nuy dey par ich yu' ze' nu dri beey ni mbecy. 17Orze' de mbecy pshet yaa dey Sosht, yu nu riib ic nañ yu' nu rsya' mbecy Israeel riidz ni Ñgyoozh. Orze' bdi dey yu laab ro' la ze'. Nunu Galión wangyicy cuen yu de coz nu bicy dey. 18Na despuees ni de nu nde', orze' Baly byeeñ yu zañ ru' dzi Corinto. Gaze' nu bruuy lat de bicy na za nuy Priscila nu Aquila nañ tub barc par lo de yu nu la Siria. Tub gyedz nu la Cencrea, anzir chu'y nañ barc, orze' bicy yu tub trat nu Ñgyoozh. Orze' bicy yagy yu tooy par nu gabe nu segur la gyicy paay nu trat ze'. 19Orze' bru'ña dey Éfeso. Ze' bzeeñ Baly Priscila nu Aquila. Orze' guay nañ yu' nu rsya' de mbecy Israeel riidz ni Ñgyoozh. Orze' bee nuy de mbecy Israeel riidz. 20Orze' mnishbaa dey loy nu tuñ tiem gyiyeeñ yu nuy dey tees wanshet ic yu. 21Tees ornu bruuy lo dey, orze' nay rab yu dey: ―Benu Ñgyoozh rlagy mi, ya̱ yap güi̱i̱ der tuuba' tir ―nay. Orze' gu'y nañ barc. Bruuy Éfeso zay. 22Orze' bru'ñay Cesarea. Orze' bruu ga'y ze' yay par Jerusaleeng. Yay nu niiy ñgyoozh nu de mbecy ni Crisht nu yu' ze'. Orze' bruuy Jerusaleeng zay par Antioquía. 23Na ornu pcyiiñ yu lugaar ze' tub tiem, orze' bruuy. Gusay lo de yu ni Galacia nu lo de yu ni Frigia. Bicy yu nu byafert zir ricy cup de mbecy consuel lo Crisht. 24Na tub mbecy Israeel nu la Apolos briy Éfeso. Yu ze' tub mbecy Alejandría. Tona' la nap za riidz nu rniiy, nunu nap ñuu rad lagy yu riidz ni Ñgyoozh. 25Nap blyuu mbecy niy de coz ni Shuaan den. Nunu fert la rniiy, nunu nap rlyuuy de coz ni Jesuuz. Tees par nu zu nis mbecy, tub zi la de coz nu blyuu Waa, de nde' zi'l rad lagy yu. 26Orze' brugyi' nu wachib lay rniiy lat de mbecy nañ yu' nu rsya' mbecy riidz ni Ñgyoozh. Na ornu Priscila nu Aquila güeñ dey de riidz nu mniiy, orze' gua nu dey yu par yu'y. Ze' nap zir pshaal dey de coz ni Ñgyoozh loy. 27Orze' Apolos mnii tooy nu chay par lo yu ni Acaya. Orze' de mbecy ni Crisht nu yu' Éfeso blocyuub dey yu, gun bzeed dey tub gyicy lo de bicy na nu yu' ze'. Mniiy lo dey nu nap gyicy nu dey Apolos ornu griy. Na ornu briy Acaya, tona' la nap blocyuub yu de yu nu brugyi' nu ricy cup consuel lo Crisht par nu nac faboor ni Ñgyoozh. 28Lat de mbecy zigy nap blyuuy nu dzi radza de riidz nu rnii de mbecy Israeel. Orze' wangaca' nii dey nu walab ni. Bzat yu riidz nu bzeeñ Ñgyoozh, ornu blyuuy ni dey nu Jesuuz, laab mi ze' Mesías, biñ nu ca lo cuen nu co mbañ mbecy.

will be added

X\