Hechos 17

1Nez nu za dey bded yu tub gyedz nu la Anfípolis, nunu bded dey tuuba' gyedz nu la Apolonia. Orze' bru'ña dey tub gyedz nu la Tesalónica. Orze' ze' zub tub yu' ze' nu rsya' mbecy Israeel riidz ni Ñgyoozh. 2Orze' Baly zay nañ yu' ze' como nil rzay. Orze' chon sab, dzi nu rzu lagy mbecy Israeel, orze' Baly bee nuy de mbecy riidz. Bzat yu de riidz nu bzeeñ Ñgyoozh. 3Orze' mniiy tub mod par nu gyet gras lardoo de mbecy ze', nunu pshaal yu lo dey nu Mesías, bin nu ca lo cuen nu co mbañ mbecy, rlagy ñi nu gzac zim, nunu despuees ornu gat mi rlagy ñi nu gyabañ mi, nay. Orze' na ga'y rab yu dey: ―Laab Jesuuz, biñ nu ya̱ rzata̱ lo der, laab mi ze' nac mi Mesías, biñ nu ca lo cuen nu co mbañ mbecy ―nay. 4Orze' guña lagy la be mbecy riidz nu rnii Baly, nunu guc nu dey Baly nu Silas. Ni' zi'l guña lagy zigy mbecy griego, de yu nu rca Ñgyoozh, nunu guña lagy zigy biñ mñaa zub lo. 5Na de mbecy Israeel gusaap lagy dey. Orze' bicy tublaazh dey la be mbecy a̱' nap, gal nu mbecy gur rded. Orze' bicy dey nu pcha' ic dela mbecy gyedz ze'. Orze' por fers la gu' dey nañ yu' Jasón. Byub dey Baly nu Silas nu cha nu dey yu lo de mbecy zigy. 6Na ornu wangyad yu, orze' bgayu tuñ la dey Jasón nu de' zir de bicy na. Gua nu dey yu lo de fushtiz gyedz ze'. Orze' rbish ti dey. Orze' nay: ―¡De yu ii ricy deet dey dutuub la lugaar! ¡Na yada' dey gyedz ii nin! 7¡Nunu Jasón briic yu yu' nu rcyiiñ dey! ¡De yu ii za dey contr ni leey ni yu nu riib ic de nasyoong, gun rnii dey nu zu tuuba' mbecy nu riib ic, tub yu nu la Jesuuz! ―na dey. 8Orze' nu riidz ze' bicy dey nu pcha' ic de mbecy zigy, nunu bicy dey nu pcha' ic de fushtiz nu yu' gyedz ze'. 9Orze' de fushtiz pcaa dey Jasón nu de' zir de mbecy ze' nu zeeñ dey ñuu tiñ par nu cue' grib dze dey gyedz ze'. Gaze' nu blaa dey yu. 10Na ornu bi becheñ, orze' lueg la de bicy na bzuu nez dey Baly nu Silas zay Berea. Na ornu bru'ña dey Berea, orze' gua dey nañ yu' nu rsya' mbecy Israeel riidz ni Ñgyoozh. 11De mbecy Israeel nu yu' Berea napa' zir ricy dey gaze' de mbecy Tesalónica. Orze' tona' la yet lagy dey de riidz nu rnii Baly nu Silas. Nunu tub dzi ga psya' zir dey riidz nu bzeeñ Ñgyoozh ben a rishli de coz nu rnii Baly nu Silas. 12Orze' zigy mbecy ze' bicy cup dey consuel lo Crisht gal nu zigy mbecy griego: tant biñ mñaa zub lo, nunu tant yu gyeey. 13Tees ornu de mbecy Israeel nu yu' Tesalónica güeñ dey nu ni' zi'l Baly rshaal yu riidz ni Ñgyoozh Berea, orze' za dey ze'. Orze' brugyi' ricy dey nu rcha' ic de mbecy zigy. 14Orze' lueg la de bicy na bzuu nez dey Baly zay par ru' nisyudoo. Ze' Silas nu Timoteo rup laa dey byeeñ yu Berea. 15De mbecy nu za nu Baly, de yu ze' za nu dey yu gashtal Atenas. Gaze' nu bish cya dey zay par Berea tuuba' tir. Za nu dey raso̱o̱ nu bzeed Baly lo Silas nu Timoteo. Baly mniiy nu cha dey loy lueg lueg la. 16Lat nu Baly blez yu Silas nu Timoteo Atenas, tona' la deet guc nañ lardooy ornu bzaac yu nu dzi zañ nab nguaa gyedz ze'. 17Nde' nu beey riidz nu de mbecy Israeel nu de' zir mbecy nu driib zily Ñgyoozh nañ yu' ze' nu rsya' dey riidz nu bzeeñ mi. Nunu de dzi la beey riidz nu cyu zi'l mbecy nu byap yu lat yagyi'. 18Orze' la be mbecy nu rsya' leey nu la epicúreos nu la be mbecy nu rsya' ga' leey nu la estoicos brugyi' nu zi ro nu dey Baly riidz. Orze' na dey: ―¿La coz rnii mbecy nu dzi zaab ga ru' re? ―na dey. Orze' tub naca' mbecy nay: ―Rlyu nu rzat yu ñgyoozh nu walab ñgyoozh guledz ―na dey. Ni rnii dey, gun Baly rshaal yu riidz ni Jesuuz, nunu rshaal yu riidz nu lac byabañ mi despuees nu bi gut mi. 19Orze' gua nu dey yu tub lugaar nu la Areópago, ze' nu ryatublaazh tub nac mbecy nu zu riiñ. Orze' na dey: ―Rlagy de̱ gad lagya̱ de riidz cub nu rlyuur. 20Ru rniir reñ ga la riidz lo de̱, nde' nu rlagy de̱ gad lagya̱ lac yaruu de riidz ze' ―na dey. 21Ni mnii dey gun dela mbecy Atenas nu de' zir mbecy yad nu rcyiiñ Atenas walagya' dey gyicy yu reña' coz, sinu se nu niiy zi'l dey nunu se nu gyeñ zi'l dey ca na la de riidz cub. 22Orze' Baly wes suy lat de mbecy nu byatublaazh Areópago. Orze' nay: ―De ru mbecy Atenas, ya̱ rzaca̱ nu de mod la dzi ca ic der Ñgyoozh. 23Gun lat nu rdeda̱ ledz der, bzaaca̱ de lugaar nu driib zily der Ñgyoozh. Byapa̱ tub mez nu driib zily der tub ñgyoozh. Lo mez ze' ca letr. Orze' ze' rniiñ: “Ñgyoozh nu a̱' yu' lon”, rniiñ. Ñgyoozh nu de ru driib zily ru, mas a̱' yu' lo der mi, mi ze' biñ nu gzata̱ lo der na. 24’Ñgyoozh, biñ nu psa' lagy gyishlombecy nu dela coz nu yu' gyishlombecy ii, mi ze' waccyiiñ mi nañ yu' nu rzaa mbecy. 25Ni' mbecy wac gyicy dey ni tub la coz nu locyuub dey mi, como ub mi rbic mi gyel mbañ ni dey, nunu rbic mi dela coz nu galagy ñi ni dey. 26’Ñgyoozh psa' lagy mi tub mbecy. Lo nez yu ze' bruu de lo la nez mbecy. Ñgyoozh bicy mi nu yu' dey dutuub la gyishlombecy. Anzir nu sa' lagy mi dey, bi bloo ic mi gul chu' dey gyishlombecy, nunu bi bloo ic mi ca lugaar chu' dey. 27Ni bicy mi, gun orze' yub dey mi, gun dzi ga gyad mi ni dey lat nu yub dey mi. Rishli Ñgyoozh a̱' zet la zum lo tub ga de ub na. 28Gun par nu nac Ñgyoozh, mbañ den, nunu rcueñ den, nunu yu' den gyishlombecy ii. Gal nu mnii tub losa' der ornu pcaay riidz cyit. Orze' nay: “Ni' de ub na nac naa i'ñ mi”, nay. 29Orze' como nac naa i'ñ Ñgyoozh walagy ñi sa' lagy na nu nam gal nu na tub nab nu ryaa nu or o nu plat o nu gyita', tub nab nu bzaa mbecy nu shcab ni ub zi'l yu. 30Gulas Ñgyoozh se la la bicy num de mbecy nu wangad lagy de coz ze'. Tees na rcaam dela mbecy nu yu' dutuub la lugaar nu ne' dey dela cyi nu ricy yu. 31Gun Ñgyoozh bi bzum tub dzi nu li ri beem ni dela mbecy nu yu' gyishlombecy. Ni gyicy mi par nu nac tub biñ nu bi bloo sum. Nunu briic mi nu gad lagy mbecy nu segur la ni gyicy mi ornu bicy mi nu byabañ mi ze' despuees nu gut mi ―na Baly. 32Na ornu güeñ dey nu mnii Baly nu byabañ tub mbecy gut, orze' yu' mbecy nu psuriidz dey yu. Yu' ga' mbecy nu mniiy: ―De̱ ya̱ rlagya̱ gyeña̱ ornu zat ru de riidz ze' tuuba' tir ―na dey. 33Orze' bruu Baly lat dey. Zay. 34La be mbecy guc nuy Baly, nunu bicy cup dey consuel lo Crisht. Dionisio, yu ze' tub mbecy nu bzu riiñ Areópago bicy cup yu consuel lo Crisht. Nu tuuba' mbecy nu bicy cup consuel lo Crisht, tub biñ mñaa nu la Dámaris. Nunu zañ zir dey bicy cup yu consuel lo Crisht.

will be added

X\