Hechos 16

1Orze' Baly zay par Derbe nu Listra. Ze' bdzeel yu tub mbecy nu ricy cup consuel lo Crisht nu la Timoteo. Yu ze' i'ñ tub biñ mñaa Israeel. Ze' uz yu nac yu mbecy griego. Ñaay laab mbecy ni Crisht. 2Orze' dela bicy na nu yu' Listra, nunu dela bicy na nu yu' Iconio nap mnii dey niy. 3Baly rlagy yu cha nuy Timoteo, nde' nu pcaay beey sircunsision cuerp niy. Ni bicy Baly, gun dela mbecy Israeel nu yu' de lugaar ze' gud lagy yu nu uz Timoteo nac yu tub mbecy griego. 4Orze' lat nu gusa dey dela gyedz, blyuu dey ni de mbecy gal nu mnii de aposht nu de yu bel nu yu' Jerusaleeng ornu byatublaazh dey. 5Orze' dela mbecy ni Crisht fert zir guc nu dey de coz nim, nunu tub dzi ga ryañ zir dey. 6Espiriit Yon ni Ñgyoozh wansaan mi nu shaal dey riidz ni Crisht lo de mbecy Asia, nde' nu bded dey dub tuuñ la ze' nu ñgyiid ru' yu ni Frigia nu Galacia. 7Na ornu bri dey ru' bzaa ni Misia, orze' bicy pee dey ñgyay lo de yu nu la Bitinia. Tees Espiriit ni Jesuuz wansaan mi nu ñgya dey lugaar ze'. 8Orze' bded nez zi'l dey lo yu ni Misia. Gaze' nu za dey par Troas. 9Na ornu bri dey Troas, orze' rel bde' lo Baly. Bzaac yu tub mbecy Macedonia mod ni pcaal. Orze' mnishbaay lo Baly. Orze' nay: “Cyid ru par Macedonia nu locyuub ru de̱ ya̱”, nay. 10Orze' cuanzir bzaac Baly nde', orze' bzu lily de̱ nu cha̱ de̱ par Macedonia, gun mnii to̱o̱ de̱ nu Ñgyoozh bredz mi de̱ ya̱ par nu shaal de̱ de riidz nap ni Crisht lo de mbecy nu yu' ze'. 11Orze' Troas brush de̱ tub barc. Za̱ de̱ par lo tub nac yu nu ri lo nisyudoo nu la Samotracia. Orze' bru̱u̱ de̱ ze'. Orze' tuuba' dzi bri̱ de̱ tub gyedz nu la Neápolis. 12Orze' bru̱u̱ de̱ ze'. Za̱ de̱ gyedz nu la Filipos. Filipos, nde' tub gyedz nu bzaa de mbecy Rom, nunu nde' gyedz nu ricy ñi presis ni de lugaar ni Macedonia ze'. Orze' ze' byeeñ de̱ la be dzi. 13Orze' sab, dzi nu rzu lagy mbecy Israeel, orze' bru̱u̱ de̱ par ru' gyedz. Za̱ de̱ par ru' gyoow, ze' nu psa' lagy de̱ nu gyatublaazh mbecy nu nii nu dey Ñgyoozh. Orze' gucua̱ de̱ ze' rdo̱ de̱ de riidz nu sac ni Crisht nu de biñ mñaa nu byatublaazh ze'. 14Ze' tub biñ mñaa nu güeñ riidz nu rdo̱ de̱, mi ze' lam Lidia. Mi ze' mbecy Tiatira nunu ricy mi dalje̱z nu rut mi negy bizat. Nac mi tub mbecy nu rca Ñgyoozh, nunu Shuaan den pshaal mi shcab nim par nu gyet lag mi cuen de riidz nu mnii Baly. 15Orze' briib nis dey mi, nunu briib nis dey dela famil nim. Orze' mnishbaam lo de̱. Orze' nam: ―Yaa gyan cyiiñ der yu̱' benu rash der shcab nu ya̱ rishli ricy cupa̱ consuel lo Shuaan na ―nam. Orze' pcuugy mi lardo̱o̱ de̱ nu gya̱ de̱ yu'm. 16Orze' tub dzi ornu za̱ de̱ ze' nu ryatublaazh mbecy par nu rnii nu dey Ñgyoozh, orze' bdzeel de̱ tub fiñ feñ nu nac moz por fers la ni mbecy. Tub nuras bicy niy fiñ ze', nunu rbooñ cuen par nu nac nuras ze'. Tona' la sheñ tiñ rad ni patro̱o̱ ñiñ nu nac nu rbooñ cuen. 17Tees biid cañ ich de̱ nu Baly, orze' brugyi' ye la rbish tiñ. Orze' nañ: ―¡De mbecy re ricy mi coz nu rnii Ñgyoozh biñ nu zily zir nac! ¡Rbic mi nu gad lagy der lac mod ruu mbañ ru! ―naañ. 18Zañ dzi ni bicy ñi gashtal ornu bdza' Baly niñ. Orze' bish cyay bgüiiñ loñ. Orze' nay rab yu nuras ze': ―Par nu nac rishbeey ni Jesucrisht, ya̱ rne̱e̱ lor nu ruu chur lo fiñ ii ―nay. Orze' lueg la bruu nuras ze'. 19Na ornu de patro̱o̱ ni fiñ feñ ze' gud lagy dey nu wada' mod nu gyicy dey gan tiñ nu nac ñii, orze' bdu' yaa dey Baly nu Silas. Gua nu dey yu lo de fushtiz loli' ze' nu rgua de yu zu riiñ. 20Na ornu bru'ña dey lo de fushtiz, orze' na dey: ―De mbecy ii nac dey mbecy Israeel, nunu ricy dey coz deet ledz na. 21Rlyuu dey nu gyicy na coz nu cha contr ni leey. Como de ub na nac na mbecy Rom, nde' nu wac nii den nu nap de coz nu rnii dey. Ni wac gyicy den gal nu rlagy dey ―na dey. 22Orze' ni' de mbecy zigy bish cya dey ich dey. Orze' de fushtiz por fers la bloo dey shab dey. Orze' pcaa dey mbecy nu gaaz dey yu nu laspeed. 23Na despuees ornu dzi bi bgaaz dey yu, orze' mne' dey yu nañ yu' gyiib. Orze' pcaa dey de yu nu riib ic yu' gyiib ze' nu nap gyicy segur yu dey. 24Na ornu bi gu' riiñ ze' yaa yu nu riib ic ze', orze' mne'y de yu ze' gal ze' nu gyi zir ni nañ yu' gyiib ze'. Orze' briy gyi' de yu ze' nañ gyeegy nu zub gazel cyup ya gyibag. Gaze' nu bicy nicy dey ñi. 25Orze' tub guzeel rel, Baly nu Silas rnii nu dey Ñgyoozh, nunu rul dey lom. Nunu reñ dela de pres. 26Orze' derepent la briib tub duru ily. Orze' pcueñ yu' gyiib gashtal ze' nu zu laa simient niñ. Orze' lueg la byaal dela ro', nunu bet lag dela caden nu pcacuuñ dey de pres. 27Orze' yu nu riib ic yu' gyiib ze' brish yu yaa. Na ornu bzaac yu nu naal dela ro' ni yu' gyiib, orze' psa' lagy yu nu briib dze dela pres. Orze' blooy mandzicy niy nañ gyid yu'ñ, nunu bicy peey nu ñgyuut yu ub yu. 28Orze' brish ti Baly. Gaze' nu nay: ―¡Cue' shiñ gyicy nur ub ru gun ii yu̱' dela de̱! ―nay. 29Orze' yu nu riib ic ze' bredz yu mbecy nu cha nuy gyi. Orze' carer la gu'y nañ yu' ze'. Nunu rash la bis yu nu tanta' gudzib yu. Orze' wes saa lay yeñ gyi' Baly nu Silas. 30Orze' blooy de yu ze' lugaar ze'. Gaze' nu nay rab yu dey: ―¿La ñuu coz rlagy ñi nu gyicya̱ par nu ruu mbaña̱? ―nay. 31Orze' na Baly nu Silas: ―Bicy cup consuel lo Shuaan den, Jesucrisht. Orze' ruu mbañ ru nu dela famil nir ―na dey. 32Orze' pshaal dey riidz ni Shuaan den loy nu lo dela mbecy nu rcyiiñ loy. 33Na laab or ze' yu nu riib ic ze' za nuy dey nu bdiib yu ze' nu guud güii ni dey. Orze' lueg la wi nis yu nu dela famil niy. 34Orze' ya nuy Baly nu Silas. Gup yu par nañ yu'y nuy dey. Ze' briic yu coz nu gow dey. Orze' mbecy nu riib ic ze' nu dela famil niy tona' la gucyit lagy dey gun bi ricy cup dey consuel lo Crisht. 35Na tuuba' dzi or napor, orze' de fushtiz bzuu nez dey ayudant ni dey lo yu nu riib ic ze'. Orze' na dey rab yuy: ―Blaa de mbecy ze' ―na dey. 36Orze' yu riib ic ze' gua mniiy lo Baly. Orze' nay: ―De fushtiz bzeed dey raso̱o̱ nu la̱a̱ ru nu Silas. Orze' na ruu der. Gac gya der dub gusht la ―nay. 37Orze' na Baly rab yu ayudant ze': ―Pshet dey yag ich de̱ lo rgüii la de mbecy zigy, nunu ii nigul ri bee dey de̱. Nunu de̱ ya̱ nac de̱ mbecy Rom. Ze' ii mne' dey de̱ ya̱ nañ yu' gyiib. Orze' na rlagy dey coy de̱ ya̱ dze ga. Rila wac. Ub la de fushtiz rlagy ñi nu cyid dey coy de̱ ya̱ ―nay. 38Na de ayudant gua niiy lo de fushtiz de riidz nu mnii Baly. Na ornu güeñ de fushtiz nu Baly nu Silas nac dey mbecy Rom, orze' tona' la gudzib dey. 39Orze' za dey lo Baly nu lo Silas, nunu bdiiñ dey rishsulagy lo dey. Orze' gua nu dey de yu ze' par ich yu' gyiib nunu mnishbaa dey loy nu ruu dey gyedz ze'. 40Orze' Baly nu Silas bruuy nañ yu' gyiib zay par yu' Lidia. Ze' bdzeel dey dela bicy na, nunu briic dey consuel ni de yu ze'. Orze' bruu dey yu' Lidia za dey.

will be added

X\