Hechos 15

1Orze' la be mbecy bruu dey lo de yu ni Judea guay Antioquía. Orze' blyuu dey ni de bicy na. Orze' na dey: ―Wac ruu mbañ den benu waca beey sircunsision cuerp ni den gal nu rniiñ lo leey nu bzeeñ Moisees ―na dey. 2Orze' Baly nu Bernabee fert la mnii dey nu walab ni. Orze' zi ga la bee nu dey yu riidz. Orze' de mbecy mnii too dey nu Baly nu Bernabee nu la be mbecy nu yu' Antioquía, de yu ze' rlagy ñi cha dey par Jerusaleeng par nu cha güii dey de aposht nu de yu bel, gun orze' cugyi' dey nu nac de coz ze'. 3Orze' de mbecy ni Crisht ze' bzuu nez yu dey zay. Lat nu za dey lo yu ni Fenicia gal nu lo yu ni Samaria, orze' bdzeel dey de mbecy ni Crisht. Orze' byoo dey rishlo dey lac mod guc. Orze' mnii dey nu de mbecy nu walab mbecy Israeel byac dey mbecy ni Ñgyoozh. Ornu güeñ de mbecy nu yu' lugaar ze' nde', orze' tona' la bet lagy dey. 4Na ornu bri dey Jerusaleeng, orze' de mbecy ni Crisht, nu de aposht, nu de yu bel, de yu ze' gua nii nu dey yu ñgyoozh. Orze' Baly nu Bernabee byoo dey rishlo dey nu lac mod bicy nu Ñgyoozh dey. 5Orze' la be mbecy nu ricy cup consuel lo Crisht, yu nu gunash leey ni de mbecy fariseo, orze' wes su dey. Orze' na dey: ―Rlagy ñi caan de mbecy ni Crisht nu walab mbecy Israeel nu caa dey beey sircunsision cuerp ni dey, nunu rlagy ñi caan dey nu gyicy yac yu nu leey nu bzeeñ Moisees ―na dey. 6Orze' de aposht nu de yu bel byatublaazh dey par nu go dey riidz nu nac de coz ze'. 7Na ornu blazh bee dey riidz, orze' wes su Bed. Orze' nay: ―Der bicy na, de ru rad lagy der nu tona' la gulas pcui Ñgyoozh ya̱ lat de ru par nu shaala̱ de riidz ni Crisht lo de mbecy nu walab mbecy Israeel, gun orze' gyeñ dey, nunu gyicy cup dey consuel lom. 8Ñgyoozh, biñ nu rad lagy la na lardoo mbecy, bicy mi nu rad lagy den nu cyiiñ de mbecy nu walab mbecy Israeel nu gac dey mbecy ni Crisht. Ni bicy mi ornu briic mi Espiriit Yon nim ni dey gal nu bicy nu'm de ub na. 9Mod nu bicy num de ub na laab ni' zi'l mod bicy num dey. Bicy sulagy mi de cyi nu bicy dey, gun ricy cup dey consuel lo Crisht. 10Orze' na ¿lagu rlagy der gyicy ru preb Ñgyoozh ornu ricy der nu deet rzac de mbecy nu ricy cup consuel lo Crisht? Coz nu rnii der nu gyicy dey, nde' coz nu wagyee den, gal nu de gyitoo bel ni den wangagyee dey. 11Ze' de ub na rzeña lagy den nu gruu mbañ na nu nac faboor nu ricy nu Shuaan den Jesuuz. Ni' zi'l de yu ze' ―na Bed. 12Dela mbecy gucua ri dey ornu güeñ dey nu rnii Baly nu Bernabee, ornu bzeed cuen dey lo dey dela coz ily nu bicy Ñgyoozh, nunu dela nusuriidz nu bicy mi lat de mbecy nu walab mbecy Israeel lat de riiñ nu bicy dey. 13Na or blazh nu mnii Baly nu Bernabee, orze' na Santiag rab yu de mbecy: ―Bzuub gyidag der, bicy na. 14Simo̱o̱ Bed bi byoo ga'y rishlon mod nu bicy Ñgyoozh num de mbecy nu walab mbecy Israeel ornu nap bicy num dey tir loga la. Bloo sum tub nac mbecy nu gac nim lat dey. 15Ni' zi'l yaruu riidz nu pcaa de yu nu mnii por cuen ni Ñgyoozh. 16Orze' na Ñgyoozh: Or lazh nde', orze' ya̱ cush cya̱ locyuuba̱ de nez Dabi, gun mnu nez Dabi, tees ya̱ zu napa̱ ñii. 17Gun orze' dela de' zir mbecy yub dey Shuaan yu. De lo la mbecy nu ya̱ pcui̱ nu gac ne̱ yub dey ya̱. 18Ni na Ñgyoozh, biñ nu bi gulas briic nu gad lagy de mbecy de nde', rniiñ. 19’Ni' ya̱ rsa' lagya̱ nu walagy ñi nu gyicy deet den nu de mbecy nu walab mbecy Israeel, de yu nu yac mbecy ni Ñgyoozh. 20Tees rlagy ñi caan tub gyicy zeed na lo dey. Rlagy ñi niin lo dey nu cue' gow dey de coz nu a̱' yad ñi nu gow yu. Cue' gow dey de gun nu briic mbecy lo nab. Rlagy ñi niin nu cue' gal dey de mbecy nu wanchelaay, nunu cue' gow dey bañcyug nu psi̱i̱ mbecy yeñ, nunu cue' gow dey reñ. 21Gun nese gulas nu gashtal dzi na rlab mbecy leey nu bzeeñ Moisees nañ de yu' nu rsya' de losa'n riidz ni Ñgyoozh. De sab la, dzi nu rzu lagy mbecy, rlab dey riidz nim, nunu dela gyedz rshaal mbecy riidz ze' nim ―nay. 22Orze' de aposht, nu de yu bel byatublaazh dey, nu dela mbecy ni Crisht. Orze' mnii too dey nu co su dey la be mbecy lat dey, par nu cha nu dey Baly nu Bernabee par Antioquía. Orze' bloo su dey Judas, laab yu ze' yu nu la Barsabás, nunu ni' zi'l bloo su ga' dey Silas. De yu ze' mbecy nu rca lagy de bicy na lo. 23Orze' briic dey tub gyicy za nu dey. Gyicy ze' rniiñ: “De̱ ya̱, nu de aposht, nu de yu bel, nu de bicy na, zeed de̱ ñgyoozh ni de ru bicy na nu walab nez de mbecy Israeel. Zeed de̱ ñgyoozh ni de ru mbecy nu yu' Antioquía, nunu ni' zi'l ni de ru mbecy nu yu' lo yu ni Siria, nunu ni' zi'l ni de ru mbecy nu yu' lo de yu ni Cilicia. 24Bi güeñ de̱ nu la be mbecy nu bruu lat de̱ bru'ña dey lat der nu bicy dey nu rac deet nañ shcab ni der nu nac de coz nu rnii dey. Tees de̱ ya̱ wanne̱e̱ de̱ lo dey nu ni gyicy yu. 25Nde' nu na byatublaazh de̱, nunu bicy de̱ tub zi'l shcab nu pcui̱ de̱ la be mbecy nu cyid tooy rishlo der. Orze' bzuu nez de̱ yu cyid yu lo der. Yad nu dey Bernabee nu Baly, de yu nu dzi rca den. 26De yu ze' mas rlagy mbecy cut yu dey, tees ricy paa dey nu coz nu rlagy Shuaan den Jesucrisht. 27Orze' gzuu nez de̱ Judas, nu Silas nu cyid yu lo der, gun orze' nii dey lo der par nu gyeñ gyidag la der dela coz nu ca̱a̱ de̱ lo gyicy ii. 28Gun Espiriit Yon ni Ñgyoozh nu de̱ ya̱ rze̱e̱ nu walagy ñi ca̱a̱ de̱ reña' coz nu gyicy der, sinu de coz nu rlagy ñi gyicy der, de coz nu zat de̱ lo gyicy ii. 29Cue' gow der coz nu rbic mbecy lo nab. Cue' gow der reñ, nunu cue' gow der bañcyug nu gut nu psi̱i̱ mbecy yeñ. Cue' gal der de mbecy nu wanchelaar. Tona' la nap gyicy der benu cue' la gyicy der de coz ze'. Bi nii ga'n.” Ni cañ lo gyicy ze'. 30Orze' bzuu nez dey de mbecy ze' za dey par Antioquía. Na ornu bri dey Antioquía, orze' byatublaazh dela mbecy nu ricy cup consuel lo Crisht. Orze' briic dey gyicy ze' nu sya' dey. 31Na ornu psya' de mbecy gyicy ze', orze' riidz nu ta' loñ bicy ñi nu tona' la bet lagy dey. 32Judas nu Silas, como nac dey mbecy nu rnii por cuen ni Ñgyoozh, chi ñuu mniiy lo de bicy na. Briic yu baloor ni dey, nunu bicy fert yu dey nu nac de coz ni Crisht. 33Na ornu bi rac la be tiem nu rcyiiñ dey lugaar ze', orze' de bicy na mnii nu dey yu ñgyoozh. Orze' bruu dey yay lo de mbecy nu bzuu nez yu. 34Tees Silas mnii tooy nu gyiyeeñ gay. 35Ni' Baly nu Bernabee byeeñ dey Antioquía. Bicy dey riiñ tublaazh nu zigy de' zir mbecy. Blyuu dey ni de mbecy, nunu pshaal dey riidz ni Shuaan den lo de mbecy. 36Despuees, or gules, orze' na Baly rab yu Bernabee: ―Yaa chan cha güiin de bicy na nu yu' dela gyedz ze' nu pshaal na de riidz ni Shuaan na. Cha güiin la ricy dey ―nay. 37Tees Bernabee rlagy yu cha nuy Waa. Laab yu ze' yu nu la Marc. 38Ze' Baly psa' lagy yu nu a̱' nap nu cha nu Waa dey, gun bzeen gay riiñ nu bicy dey ornu pcyiiñ dey Panfilia, nunu wangyicya'y riiñ nuy dey. 39Orze' bee zi dey riidz nu losa'y. Orze' bicy zet lagy dey lo losa'y. Orze' Bernabee za nuy Marc. Orze' gush dey tub barc nu za par Chipre. 40Ze' Baly bloo suy Silas par nu gac losa'y. Orze' de mbecy bzeeñ dey Baly yaa Ñgyoozh par nu locyuub mi yu, nunu güiim yu. Orze' bruuy Antioquía zay. 41Orze' bded yu lo yu ni Siria, nunu bdeda'y lo yu ni Cilicia. Lat nu gua zaab loy de mbecy ni Crisht, orze' bicy fert yu dey nu nac coz nim.

will be added

X\