Hechos 14

1Na Iconio tublaazh la gua Baly nu Bernabee nañ yu' nu rsya' de mbecy Israeel riidz ni Ñgyoozh. Tona' la nap mnii dey. Nde' nu tona' la mbecy zigy bicy cup dey consuel lo Crisht. Yu' mbecy Israeel bicy cup yu consuel lo Crisht, nunu yu' ga' mbecy nu walab mbecy Israeel bicy cup yu consuel lom. 2Tees de mbecy Israeel nu wangyicy cup consuel lo Crisht bicy dey nu pcha' ic mbecy nu walab mbecy Israeel, nunu bicy dey nu bish cya dey ich de bicy na. 3Tees Baly nu Bernabee tuñ pcyiiñ dey lugaar ze'. Wanchib la dey pshaal yu riidz ni Shuaan den. Mnii dey nu tona' la nap ricy num mbecy, nunu mi ze' bicy mi nu gud lagy de mbecy nu de riidz nu rnii dey, nde' coz nu laab ñi. De mbecy gud lagy dey nu riidz ze' rishli, gun Shuaan den briic mi mod nu gyicy dey nusuriidz gal nu de coz nu ricy nu za nu ic mbecy. 4Orze' dela mbecy gyedz ze' byac cup shcab ni dey. Tub nac yu guc nuy de mbecy Israeel, tub naca'y guc nuy Bernabee nu Baly. 5Orze' de mbecy nu walab mbecy Israeel, nu de mbecy Israeel, nu de yu nu riib ic ni dey, laab de yu ze' mnii too dey nu shiñ gyicy nu dey Baly nu Bernabee. Orze' mnii too dey nu goow gyita'y Baly nu Bernabee gashtal gat la dey. 6Na ornu gud lagy Baly nu Bernabee, orze' bruu chu dey. Zay par lo de yu ni Listra nu Derbe, cyup gyedz nu ri lo de yu nu la Licaonia. 7Ze' pshaal dey de riidz nu sac ni Jesuuz. 8Listra zu tub mbecy coj. Yu ze' zub zi'l yu, gun gaal zi'l nu gul yu rila wagac zay. 9Ze' güeñ yu riidz nu rnii Baly. Orze' Baly gud lagy yu nu ricy cup yu ze' consuel lo Crisht, nunu nde' nu gac gyac yu. Orze' Baly mbi la bgüiiy loy. 10Orze' ye la brish tiy. Orze' nay: ―¡Wes su nunu li bzu! ―nay. Orze' rzab lay wes suy. Nunu brugyi' lay rzay. 11Na ornu de mbecy zigy bzaac dey nu ni bicy Baly, orze' brugyi' nu rbish ti dey. Orze' na dey nu riidz yu, riidz Licaonia: ―¡De ñgyoozh gush dem mod nu na mbecy, nunu bet dem gashtal lo la den ii! ―na dey. 12Mnii dey nu Bernabee nac yu tub ñgyoozh nu la Júpiter. Ze' Baly mnii dey nu nac yu tub ñgyoozh nu la Mercurio, gun yu ze' yu nu rnii. 13Orze' de uz nu zu riiñ nañ yu' ni ñgyoozh Júpiter, yu' nu zub ru' gyedz, orze' uz ze' gua nuy la be tor nu gyee. Yu ze' nu de mbecy ngulagy dey ñgyuut yu chigud ze' nu cuic dey tub gun lo Baly, gal nu lo Bernabee. 14Na ornu Baly nu Bernabee güeñ dey de coz nu rlagy de yu ze' nu gyicy yu, orze' pshaa la dey shab yu, nunu gush dey carer gu'y lat de mbecy zigy ze'. Orze' brish ti dey. 15Orze' nay: ―Der mbecy, ¿lagu ni ricy der? De̱ ya̱ nac de̱ mbecy gal nu na' zi'l de ru. Nunu de̱ ya̱ yap de̱ ii par nu rica̱ nu gad lagy der nu laa yaa der de coz nu rila wacyiiñ ii, nunu “O” nii der ni Ñgyoozh mbañ, biñ nu psa' lagy gyibaa, nu gyishlombecy, nu nisyudoo, nu dela coz nu yu' de lugaar ze'. 16Gulas Ñgyoozh bzaan mi nu gyicy mbecy la zi'l coz nu rlagy ub yu gyicy yu. 17Tees dub laa tiem rlyuum cyu nac mi ornu ricy mi coz nap. Ricy mi nu yet gyey, nunu rbic mi cosech. Rbic mi coz nu gow der, nunu ricy mi nu zu cyit lagy der ―na dey. 18Mas nu de riidz ze', tees tona' la biigy par nu cay ni dey nu cue' cut dey de tor ze' par tub gun nu cha lo dey. 19Orze' la be mbecy Israeel bruu dey Antioquía ni Pisidia, nunu bruu ga' dey Iconio. Orze' za dey par Listra. Ze' bdu' dey lagy de mbecy zigy nu cha dey contr ni Baly. Orze' de mbecy pshet dey gyita' Baly nu ñgyut dey yu. Orze' bgayu tuñ la dey yu par ru' gyedz, gun psa' lagy dey nu gut yu. 20Tees ornu de mbecy nu ricy cup consuel lo Crisht byatublaazh dey lo Baly, orze' weshtey. Orze' gu' ga'y lat gyedz tuuba' tir. Na tuuba' dzi Baly nu Bernabee bruu dey Listra za dey par Derbe. 21Orze' Baly nu Bernabee pshaal dey riidz nu sac ni Crisht Derbe, nunu pshet gras dey lardoo zañ mbecy par nu gyicy cup dey consuel lo Crisht. Orze' bish cya dey. Bruu dey Derbe za'y par Listra. Orze' bruu dey Listra. Zay par Iconio. Orze' bruu dey Iconio. Za dey par Antioquía ni Pisidia. 22Nez nu za dey, gua zaab lo dey de mbecy ni Crisht nu yu' de lugaar ze'. Bicy dey nu byafert dey nu nac de coz ni Crisht, nunu mnii dey nu gyicy paa dey nu de riidz nim nu bi güeñ dey. Blyuu dey ni dey. Orze' na dey: ―Zañ coz deet rlagy ñi nu zac na par nu chu'n lo gyel gubier ni Ñgyoozh ―na dey. 23Baly nu Bernabee bloo su dey yu bel ni tub nac ga de mbecy ni Crisht. Orze' mnii nu dey Ñgyoozh, nunu pca dey ni ub yu nu cue' goy gyit. Orze' bzeeñ dey de yu bel ze' yaa Ñgyoozh, biñ nu ricy cup dey consuel lo, par nu güiim dey. 24Na ornu bded dey lo de yu ni Pisidia, orze' bru'ña dey lo yu ni Panfilia. 25Orze' za dey tub gyedz nu la Perge. Ze' pshaal dey de riidz ni Crisht. Orze' bruu dey Perge, za dey par Atalia. 26Ze' gush dey tub barc. Orze' za dey par Antioquía, ze' nu bgu' mbecy dey yaa Ñgyoozh par nu locyuub mi dey nunu par nu güiim dey lat nu gyicy yu riiñ nim, riiñ ze' nu bi bza' lo dey na. 27Na ornu bru'ña dey Antioquía, orze' bicy tublaazh dey de mbecy ni Crisht. Orze' pshaal dey lo de mbecy ze' dela coz nu bicy nu Ñgyoozh dey. Pshaal dey nu lac mod bicy Ñgyoozh par nu byaal nez nu cha dey lo de mbecy nu walab mbecy Israeel, gun orze' de yu ze' gac gyicy cup dey consuel lo Crisht. 28Orze' tuñ tiem byeeñ dey lugaar ze' nu de mbecy ni Crisht.

will be added

X\