Hechos 13

1Lat de mbecy ni Crisht nu yu' Antioquía yu' la be mbecy nu rnii por cuen ni Ñgyoozh, nunu yu' ga' la be mbecy nu rlyuu coz ni Ñgyoozh. Tub yu lay Bernabee. Tuuba'y lay Simo̱o̱, laab yu ze' yu nu la Cas. Tuuba'y lay Lucio, yu ze' mbecy Cirene. Tuuba'y lay Manaén, yu nu tublaazh la bguul dey nu Herodes, yu nu byub ic Galilea. Tuuba'y lay Saulo. De yu ze' zuy riiñ lat de mbecy ni Crisht. 2Orze' tub dzi lat nu rzu bich dey nu nac Shuaan den, nunu lat nu rca dey ni ub yu nu cue' gow yu gyit nu rzu bich dey nu nac Ñgyoozh, orze' na Espiriit Yon ni Ñgyoozh rab mi dey: ―Bloo reñ der Bernabee nu Saulo par nu gyicy dey riiñ nu pcui̱ nu gyicy yu ―nam. 3Na ornu bded ni nu pca dey ni ub yu nu cue' goy gyit lat nu mnii nu dey Ñgyoozh, orze' briib yaa dey too de yu ze'. Orze' bzuu nez dey yu zay lo riiñ nu briic Espiriit Yon ni Ñgyoozh nu gyicy yu. 4Orze' Espiriit Yon ni Ñgyoozh bzuu nez mi dey zay. Bruu dey Antioquía za dey par Seleucia. Ze' gush dey tub barc zay par Chipre, tub nac yu nu ri lo nisyudoo. 5Na ornu bri dey Salamina, tub gyedz nu ri lo yu ni Chipre, orze' pshaal dey riidz ni Ñgyoozh nañ de yu' nu rsya' de mbecy Israeel riidz ni Ñgyoozh. Waa za nuy dey par nu locyuub yu dey. 6Bded dey lo yu nu ri lo nisyudoo ze'. Orze' bri dey tub gyedz nu la Pafos. Ze' bdzeel dey tub tu' nu la Barjesús. Yu ze' mbecy Israeel, nunu rniiy nu nac yu tub mbecy nu rnii por cuen ni Ñgyoozh, tees walab rishli. 7Yu ze' nac nuy Sergio Paulo. Nunu Sergio Paulo, yu ze' riib ic yu yu nu ri lo nisyudoo ze'. Nac yu mbecy nu tona' la yu' shcab ni. Orze' bredz yu Bernabee nu Saulo nu cha dey loy gun rlagy yu gyeñ yu riidz ni Ñgyoozh. 8Ze' tu' ze' tuuba' nu lay nde' Elimas. Orze' yu ze' guay contr ni dey. Orze' bdu'y lagy yu nu riib ic lo de yu ze', par nu cue' gyicy cup yu consuel lo Crisht. 9Orze' Espiriit Yon ni Ñgyoozh briib ic za' lam nañ lardoo Saulo, laab yu ze' yu nu la Baly. 10Orze' Baly mbi la bgüiiy lo tu' ze'. Orze' nay: ―¡Mbecy rguu, mbecy rgubdzaa, ru nar gal nu na nuras! Ru zar contr ni dela coz nu se'ñ, nunu rila wachecar nu rchaar dela riidz rishli ni Ñgyoozh. 11Orze' na Ñgyoozh shet yaam ru. Na gyaca' lor. Ru wazaca'r yaa ni doo par la be tiem ―nay. Orze' lueg la bet dzeeñ urlo Elimas. Orze' brugyi' ryub yu ca na mbecy nu gan yu yaay nu lyuuy nez niy. 12Orze' yu riib ic ze', ornu bzaac yu de coz nu guc, orze' bicy cup yu consuel lo Crisht. Tona' la za nu ic yu nu nac de riidz ni Shuaan den. 13Baly nu de losa'y bruuy Pafos, gu' dey nañ tub barc zay. Za dey par Perge, tub gyedz nu ri lo de yu nu la Panfilia. Tees ze' bruu Waa lat dey. Bish cyay yay par Jerusaleeng. 14Orze' bruu Baly nu de losa'y Perge. Zay par Antioquía, tub gyedz nu ri lo tub nac yu nu la Pisidia. Orze' sab, dzi nu rzu lagy mbecy Israeel, gua dey nañ yu' nu rsya' de mbecy Israeel riidz ni Ñgyoozh. Orze' gusub dey. 15Na ornu blazh nu blab mbecy tub nac riidz nu ta' lo leey ni Ñgyoozh nu bzeeñ Moisees, gal nu tub nac riidz nu bzeeñ de yu nu mnii por cuen nim, orze' yu nu riib ic nañ yu' ze' bzeed yu raso̱o̱ lo Baly, gal nu lo de losa'y. Orze' nay: ―Bicy na, benu ricy cup ru tub consef, orze' gac niir lo de mbecy na la ―nay. 16Orze' Baly wes suy. Bicy yaay par nu ri gua dey nu cue' gyicy yu zu redz. Orze' brugyi' rniiy. Orze' nay: ―Bzuub gyidag de ru mbecy Israeel nu de ru mbecy nu rca lagy lo Ñgyoozh. 17Ñgyoozh ni de mbecy Israeel pcuim de gyitoo bel ni den. Bicy mi nu byañ dey lat nu gabee rcyiiñ dey gal nu rcyiiñ mbecy yad lugaar nu la Egipto. Tona' la fert bicy num dey ornu bloom dey Egipto. 18Orze' nañ cyuu ña'n gugyeem lo dey lat nu shiñ bicy dey tub lugaar ub zi. 19Orze' mnit lom gagy nac mbecy nu pcyiiñ lo de yu nu la Canaán, nunu briic mi lugaar ze' nu gani de mbecy nim. 20Orze' nañ tap gaynal nu ña'n, briic mi mbecy nu gyub ic dey por cuen nim. De yu ze' byub ic yu gashtal pshuub la tiem ni Samueel, yu nu mnii por cuen nim. 21Orze' bdiiñ dey lom nu cuic mi tub mbecy nu gac rey ni dey. Orze' Ñgyoozh briic mi Sauul, i'ñ yu nu la Cis, nez Benjamiing, par nu gac rey ni dey nañ cyuu ña'n. 22Orze' despuees bloom Sauul nunu bicy mi nu byac Dabi rey ni dey. Ñgyoozh bzat mi Dabi ornu nam: “Ya̱ bzaaca̱ nu mod nu na Dabi i'ñ Isaí nañ lardooy, nde' mod nu tona' la yet lagya̱. Yu ze' gyicy yu dela coz nu rlagya̱”, nam. 23Ñgyoozh bicy mi nu Jesuuz, biñ nu bruu lat famil ni Dabi, byac mi biñ nu co mbañ de mbecy Israeel. Gulas mnii Ñgyoozh nu segur la ni gyicy mi. 24Anzir nu cyid Jesuuz, Waa pshaal yu de coz ni Ñgyoozh lo de mbecy Israeel. Mniiy nu ne' dey dela coz cyi nu ricy yu, nunu zu nis dey. 25Ornu sñuu ga lazh de riiñ nu briic Ñgyoozh nu gyicy Waa, orze' nay rab yu de mbecy: “Ya̱ a̱' naca̱ biñ nu rnii too de ru nu naca̱, tees ornu lazh de coz nu ricya̱, orze' cyid tuuba' mbecy. Ni gyid lab mi wangyapa̱ lo̱o̱”, nay. 26’Der bicy na nu nac nez Abraham, nunu de ru mbecy nu rca lagy lo Ñgyoozh nu yu' lat ii, par de ub na bzeed Ñgyoozh riidz nu lac mod co mbañ mi den. 27Tees de yu nu yu' Jerusaleeng nu de yu nu riib ic dey wangad lagy dey cyu nac Jesuuz. Ni' zi'l wangyet lag dey cuen de riidz nu bzeeñ de mbecy nu mnii por cuen ni Ñgyoozh, de riidz nu rlab dey de sab la, dzi nu rzu lagy mbecy Israeel, nañ yu' nu rsya' de mbecy Israeel riidz ni Ñgyoozh. Nde' nu mnii dey nu gat mi par nu byu' niñ gal nu pcaa de yu nu mnii por cuen ni Ñgyoozh ornu mnii dey nu rlagy ñi gat mi. 28Mas wangyap dey ni tub la falt nim nu gyicy ñi nu gat mi, tees mnishbaa dey lo Pilato nu gyicy yu mandaar lo de mbecy nu cut dey mi. 29Orze' bicy nu dey mi dela coz nu bi cañ nu gyicy nu dey mi, gal nu rniiñ lat de riidz ni Ñgyoozh. Gaze' nu pshet dey mi lo cruuz. Orze' pcach dey mi nañ tub blyuu. 30Tees Ñgyoozh bicy mi nu byabañ mi. 31Orze' zañ dzi bruu zac mi lo de yu nu gusa num ornu bruum Galilea guam par Jerusaleeng. Na de yu ze' mnii dey lo de mbecy Israeel nu bzaac dey nu byabañ mi. 32’Orze' de̱ ya̱ yap ne̱e̱ de̱ lo de ru tub riidz nu tona' la cyit na. Riidz ze', nde' coz nu mnii Ñgyoozh lo de gyitoo bel ni den nu segur la gyicy mi. 33Coz ze' bicy mi nu byu' niñ par de ub na, gun laab nez den de gyitoo bel ze'. Ni bicy mi ornu bicy mi nu byabañ Jesuuz. Ni rniiñ lo salmo cyup ornu Ñgyoozh nam: “Ru nac ru I'ña̱. Dzi na ya̱ gyicya̱ nu cui mbañ ru”, nam. 34Ni' zi'l mnii Ñgyoozh lat de riidz nim, ornu mniim nu gyicy mi nu gyabañ Jesuuz, nunu wazaan mi nu gadz cuerp nim. Orze' nam rab mi biñ nu pcuim: “Ya̱ tona' la nap gyicy du̱ ru gal nu mne̱e̱ lo Dabi nu segur la gyicya̱”, nam. 35Ze' tuuba' lugaar mnii yu nu mnii por cuen nim rab yum: “Ru wazaan ru nu gadz cuerp ni biñ Yon nir”, nay. 36Tees tiem nu pcyiiñ Dabi gyishlombecy, bicy yu de coz nu rlagy Ñgyoozh nu gyicy yu. Gaze' nu gut yu. Pcach dey yu lat de baa ni gyitoo bel ni den. Orze' byayu cuerp niy. 37Tees biñ nu bicy Ñgyoozh nu byabañ, mi ze' wangadz cuerp nim. 38Orze' na der bicy na, ya̱ rne̱e̱ lo der coz nu rlagy ñi nu gad lagy der nu Ñgyoozh gyicy sulagy mi ni mbecy nu nac Jesuuz. 39Nunu rlagy ñi gad lagy der nu dela mbecy nu gyicy cup consuel lo Crisht gla dey ni dela cyi. Ze' leey nu bzeeñ Moisees wancyiiñ ñi nu gyicy ñi nu la de mbecy ni de cyi nu ricy yu. 40Orze' bicy cuidad der nis zac ru coz nu mnii de yu nu mnii por cuen ni Ñgyoozh gulas, 41ornu pcaa dey gal nu Ñgyoozh mniim: De ru mbecy rgubdzaa, güii der. Gua nu ic der, nunu gat der, gun coz nu gyicya̱ tiem nu cyiiñ ru gyishlombecy ii, nde' tub coz nu rila wayeña lagy ru. Mas shaal mbecy coz ze' lo der, tees wayeña lagy ru, nam ―na Baly rab yu de mbecy nu nguaa nañ yu' ze'. 42Na lat nu bruu Baly nu Bernabee nañ yu' nu rsya' de mbecy Israeel riidz ni Ñgyoozh, orze' de mbecy nu walab mbecy Israeel nese nu gul yu mniiy nu cha ga' dey nañ yu' ze' tuuba' sab, dzi nu zu lagy dey, nunu nii zir dey de coz ze' lat dey. 43Na ornu blaazh brush las de mbecy, orze' zañ mbecy Israeel, nunu zañ mbecy nu gush leey ni de mbecy Israeel guaca dey ich Baly nu Bernabee. Orze' Baly briic yu consef ni dey, nunu mniiy nu zaab gash la dey de coz nap nu rbic Ñgyoozh niy. 44Orze' tuuba' sab, dzi nu rzu lagy mbecy, tona' la mbecy zigy byatublaazh yu. Sñuu ga zi'l mbecy ricy falt par nu lazh dela mbecy gyedz ze'. Byatublaazh dey par nu zuub gyidag yu de riidz ni Shuaan den. 45Na ornu de mbecy Israeel bzaac dey de mbecy zigy ze', orze' tona' la bicy saap lagy dey ich Baly nu Bernabee. Orze' mnii dey riidz nu za contr ni riidz nu mnii Baly, nunu gugy zi dey yu. 46Orze' Baly nu Bernabee fert zir mnii dey. Orze' na dey: ―Rlagy ñi nu nu loga la shaal de̱ riidz ni Ñgyoozh lo de ru. Tees como de ru rzu chu der de riidz ze', nunu como de ru ricy der ub ru par mbecy nu wangyap nu cui mbañ tub la, orze' de̱ ya̱ zaan de̱ de ru. Na cha̱ de̱ lat de mbecy nu walab mbecy Israeel, 47gun ni bicy Shuaan den mandaar ornu nam: Ya̱ bicya̱ nu nar gal nu na tub yaa par nu zac de mbecy nu walab mbecy Israeel. Ya̱ gyicya̱ nu dela mbecy nu yu' gal nu blaazha' zir ze' nu zet ni gyishlombecy cui mbañ dey nu nac ru, nam ―na dey. 48Na ornu güeñ de mbecy nu walab mbecy Israeel de riidz ze', orze' tona' la bet lagy dey, nunu bicy zily dey riidz ni Ñgyoozh. Nunu de yu nu bi pcui Ñgyoozh par nu cui mbañ yu tub la, brugyi' ricy cup dey consuel lom. 49Orze' brush las riidz ni Ñgyoozh par dutuub la lugaar gaab ga ni Antioquía ni Pisidia. 50Tees de mbecy Israeel pcha' dey ic de mbecy zub lo gyedz ze', nunu pcha' dey ic de biñ mñaa lily nu walab mbecy Israeel, de biñ mñaa nu driib zily Ñgyoozh. Orze' de mbecy ze' brugyi' ricy dey nu rsheed zi dey Baly nu Bernabee. Orze' pcyuu nu dey yu lo de yu ni dey. 51Orze' Baly nu Bernabee bdib dey gyid lab yu par tub muesht nu gabe nu wangash de mbecy gyedz ze' dey. Orze' bruu dey lugaar ze', zay tub gyedz nu la Iconio. 52Tees de mbecy Antioquía ni Pisidia nu ricy cup consuel lo Crisht tona' la zu cyit lagy dey, nunu riib ic za' la Espiriit Yon ni Ñgyoozh nañ lardoo dey.

will be added

X\