Hechos 12

1Tiem ze' Herodes, tub yu nu riib ic de mbecy Israeel, brugyi' rsheed ziy la be mbecy ni Crisht. 2Pcaay mbecy nu cut yu Santiag bicy Waa, nu mandzicy. 3Na ornu bzaac yu nu tona' la bet lagy mbecy Israeel nu biit yu Santiag, orze' psheta' yaay Bed. Ni guc tub sa' nu row dey gyishtily nu sac lebadur. 4Na ornu bded nu bdu' yaay Bed, mne'y yu nañ yu' gyiib. Ze' bgu' dey yu yaa tap nac soldad. Tap ga soldad lo tub nac yu. De yu ze' mña dey yu. Herodes mnii tooy nu cha nuy Bed lo de mbecy zigy, de mbecy Israeel or ded sa' ze'. 5Orze' guti Bed yu' gyiib, tees de mbecy ni Crisht fert la mnii nu dey Ñgyoozh nu nac yu. 6Tub dzi anzir nu co ic Herodes nu cha nuy Bed lo de mbecy, na or guzeel rel, orze' nas la Bed lat cyup soldad nu rñay ze'. Nag yu nu cyup caden. Nunu zu cyupa' soldad ro' gyiib ze'. 7Orze' derepent la bruu zac tub anc ni Ñgyoozh lo Bed. Orze' dutuub la nañ yu' ze' bzu yaa. Orze' gul yaa anc ze' cuit yu. Orze' brish yu yaa. Orze' nay rab yuy: ―¡Bicy lal! ¡Weshte! ―nay. Orze' lueg la bet lag caden nu nag yeñ yaa Bed. 8Orze' na anc rab yuy: ―Bicy nicy sinch nir, nunu pcaa gyi' gyid lab ru ―nay. Orze' ni bicy Bed. Orze' na anc: ―Bzuu yeñ shab ru. Orze' cyid car icha̱ ―nay. 9Orze' za ca Bed ich yu. Orze' bruuy nañ yu' gyiib. Par wangad lagy yu ti coz nu ricy anc ze' nde' coz rishli. Psa' lagy yu nu Ñgyoozh ricy num yu mod ni pcaal. 10Orze' bded dey lugaar loga la nu rña soldad. Niga bdeda' dey lugaar cyup. Niga byap dey tub ro' nu byaa nu gyiib. Ro' ze' benu shaal nañ, orze' gac ruun nañ yu' gyiib chu'n lat cay. Orze' ro' ze' byaal ub lañ. Orze' bruu dey nañ yu' gyiib ze'. Bza dey lat tub cay. Orze' derepent la bzeeñ anc yu ub zi lay. 11Orze' gud lagy yu la coz guc. Orze' mnii tooy: ―Na gaal gud lagya̱ nu rishli Ñgyoozh bzuu nez mi tub anc nu blooy ya̱ yaa Herodes, nunu bloo chuy ya̱ lo dela coz nu ricy pee de mbecy Israeel gyicy nuy ya̱ ―nay. 12Na ornu gud lagy yu nde', orze' zay par yu' Li, ñaa Waa, laab yu ze' yu nu la Marc. Zigy mbecy byatublaazh dey ze' nu rnii nu dey Ñgyoozh. 13Orze' psiigy yu lo yaro' ni loli'. Orze' tub fiñ feñ nu la Rode bruuñ za güiiñ ben cyu nde'. 14Tees ornu güeñ ñi nu zaab ti' Bed, orze' byu' loñ nu laab yu. Orze' par nu tanta' la bet lagy ñi wanshaala'ñ ro' ze' sinu carer la gush ñi zañ par lat de mbecy. Mniiñ nu zu Bed ich yu'. 15Orze' na dey: ―¡Ru tub mbecy ton! ―na dey. Tees bzu fert ñi nu laab rishli rniiñ. Orze' na' dey: ―Par walab yu nde', sinu yu ze' tub anc nu nac nuy ―na dey. 16Lat nu za fiñ mñaa ze', orze' fert la ca Bed rsiigy yu lo yaro' ni loli' ze'. Orze' or guchi pshaal dey ro'. Na ornu bzaac dey Bed, tona' la za nu ic dey. 17Orze' bicy Bed yaay par nu checa dey nu ricy yu zu redz. Orze' byooy rishlo dey lac bzac yu ornu Ñgyoozh bloom yu nañ yu' gyiib. Orze' nay: ―Niir lo Santiag, gal nu lo de' zir de bicy na de coz nu guc ze' ―nay. Orze' bruuy zay tuuba' lugaar. 18Na or bza' yu tuuba' dzi, orze' tona' la pcan shcab ni de soldad. Orze' na dey rab yu losa'y: ―¿La bzac Bed? ―na dey. 19Orze' Herodes pcaay de mbecy nu yub yu Bed par wangyad yu. Orze' bdugyi'y lo de soldad nu rña ze'. Orze' pcaay mbecy nu cut yu de soldad ze'. Despuees ni de nu nde', Herodes bruuy lo de yu ni Judea zay cyiiñ yu Cesarea. 20Orze' Herodes tona' la guzi lagy yu lo de mbecy Tiro nu Sidón. Orze' tublaazh la gua güii dey yu. Nu loga la bicy dey Blasto par amig. Yu ze' zuy riiñ nu riib ic yu nañ yu' ni Herodes. Orze' mnishbaa dey lo Herodes nu cue' chucoo nuy dey, gun de coz nu row dey druuñ de lugaar nu riib ic yu. 21Orze' Herodes bzuy tub dzi nu nii nuy de mbecy zigy. Dzi ze' bzuy negy nu rzu mbecy nu riib ic. Orze' gusub yu lo yashily, ze' nu riib ic yu. Orze' mniiy riidz lo de mbecy. 22Orze' de mbecy brish ti dey. Orze' na dey: ―¡Yu nu rnii nu de ub na, yu re walab mbecy, sinu tub ñgyoozh! ―na dey. 23Orze' tub anc ni Ñgyoozh lueg la pshet yaay Herodes. Bicy yu nu gush güiiy. Ni bicy anc ze', gun wangyicy zily yu Ñgyoozh. Orze' bdow bya'y gut yu. 24Niga niga güeñ zir mbecy de riidz ni Ñgyoozh, nunu bicy cup zir dey consuel lo Crisht. 25Orze' blazh riiñ ni Bernabee nu Saulo Jerusaleeng. Gaze' nu bish cya ga' dey zay par Antioquía tuuba' tir. Za nuy Waa. Laab yu ze' yu nu la Marc.

will be added

X\