Hechos 11

1Orze' de aposht nu de' zir bicy na nu yu' lo yu ni Judea güeñ dey nu ni' yu' mbecy nu walab mbecy Israeel nu guña lagy dey de riidz nu bruu lo Ñgyoozh. 2Orze' ornu bri Bed Jerusaleeng, de yu nu rlagy caa beey sircunsision cuerp ni mbecy nu walab mbecy Israeel mnii zi dey niy. 3Orze' na dey rab yuy: ―¿Lagu gua güiir de mbecy nu walab mbecy Israeel? ¿Lagu bdow nur dey gyit? ―na dey. 4Orze' Bed pshaal yu dela coz nu guc gal ze' nu bzub la gyi' de coz nu bzac yu. 5Orze' nay: ―Ya̱ bri̱ Jope. Orze' lat nu mne̱e̱ du̱ Ñgyoozh, orze' bicy mi nu bde' tub coz lo̱. Ya̱ bzaaca̱ nu yet tub coz nu na gal na negy cuadrad ily. Za' tap la scyiñ niñ nag yet ñi. Bruuñ baa bet ñi gashtal lo̱. 6Orze' mbi la bgüi̱i̱ nañ ñi. Orze' bzaaca̱ de bañcyug nu zub tap gyi'. Bzaaca̱ de bañ gyish. Bzaaca̱ de lo la mni bily. Nunu bzaaca̱ de chigyiñ. 7Orze' güeña̱ nu mnii Ñgyoozh. Orze' nam rab mi ya̱: “Bed, wes su. Biit de ma ze' gow ru”, nam. 8Orze' Mne̱e̱ lom: “Cue' Shuaana̱. Rila wagda̱w de coz bag nu rlyuu leey ni Moisees, nunu rila wagda̱w coz nu a̱' yad ñi nu da̱w”, rugya̱m. 9Orze' Ñgyoozh mnii ga'm tuuba' tir gal gyibaa. Orze' nam: “Benu ya̱, Ñgyoozh, bicy caacya̱ la coz, orze' ru cue' niir nu nde' coz bag”, nam. 10Ni bicy mi chon tir. Orze' despuees bish cya ga' negy ze' gup ñi baa tuuba' tir. 11Orze' lueg la bru'ña chon mbecy yu' ze' nu rcyiiña̱. Mbecy nu rcyiiñ gal Cesarea bzuu nez yu de mbecy ze' nu yad yub dey ya̱. 12Orze' Espiriit Yon ni Ñgyoozh mniim lo̱ nu cue' gyicy cyup ica̱ nu waya̱ du̱ dey. Ni' shuup de bicy na nu yu' ii gua nu dey ya̱ par Cesarea. Orze' dela de̱ gu̱' nañ yu' ni Cornelio. 13Mniiy nu bzaac yu tub anc nañ yu'y. Orze' anc ze' mniiy loy: “Bzuu nez tub mbecy chay Jope cha tey tub mbecy nu la Simo̱o̱. Laab yu ze' yu nu la Bed. 14Yu ze' gniiy de riidz lor. Nu nac riidz ze' gruu mbañ ru nu dela famil nir”, nay. 15Orze' na ornu brugyi' rne̱e̱ lo dey, orze' Espiriit Yon ni Ñgyoozh bicy nim dey gal nu bicy mi nu de ub na nu loga. 16Orze' byeza' lagya̱ tub coz nu mnii Shuaan den ornu nam: “Waa briib nis yu de ru nu nis, tees ya̱ zeeda̱ Espiriit Yon nu gyicy nim der”, nam. 17Orze' benu Ñgyoozh rbic mi ni de mbecy nu walab mbecy Israeel laaba' coz nu briic mi ni de ub na ornu bicy cup na consuel lo Shuaan den, orze' ¿cyu guc ya̱ nu ca̱ ni Ñgyoozh nu cue' ni gyicy mi? ―na Bed. 18Na ornu güeñ de mbecy nde', orze' guca dey nu rnii ziy ni Bed, nunu byabic dey gyel mbecy ni Ñgyoozh. Orze' na dey: ―Orze' beni ni' zi'l briic Ñgyoozh ni de mbecy nu walab mbecy Israeel mod nu ne' dey dela coz cyi nu ricy yu gun orze' cui mbañ dey tub la ―na dey. 19De mbecy nu ricy cup consuel lo Crisht brush las dey ornu bzac ziy tiem nu gut Shteb. Yu'y zay gashtal Fenicia. Yu'y zay gashtal Chipre. Yu' ga'y zay gashtal Antioquía. Pshaal dey de riidz nu bruu lo Ñgyoozh lo de mbecy Israeel zi'l. 20Ze' la be mbecy Chipre, nu la be mbecy Cirene, de yu nu ricy cup consuel lo Crisht, bri dey tub gyedz nu la Antioquía. Ze' pshaal dey de riidz nu sac ni Shuaan den Jesuuz lo gaza' de mbecy nu walab mbecy Israeel. 21Tona' la blocyuub Ñgyoozh dey, nunu tona' la mbecy zigy bicy cup dey consuel lo Shuaan den, nunu guc nu dey mi. 22Na ornu güeñ de mbecy nu ricy cup consuel lo Crisht nu yu' Jerusaleeng de coz nu guc, orze' bzeed dey Bernabee gal Antioquía. 23Na ornu briy, orze' bzaac yu nu tona' la nap bicy nu Ñgyoozh de mbecy ze'. Orze' tona' la bet lagy yu, nunu fert la mniiy lo dey nu gyicy paay nu Shuaan den nu dutuub la lardoo dey. 24Na Bernabee nac yu mbecy nap. Espiriit Yon ni Ñgyoozh briib ic za' lam nañ lardooy. Nunu fert la bicy cup yu consuel lo Ñgyoozh. Orze' zigy mbecy ze' brugyi' nu ricy cup dey consuel lo Shuaan na. 25Orze' Bernabee guay Tarso nu yub yu Saulo. 26Na ornu byad yu na, orze' gua nuy yu par Antioquía. Nañ tub ña'n rup laa dey byatublaazh yu nu de mbecy nu ricy cup consuel lo Crisht nunu blyuu dey ni tub nac mbecy zigy. Antioquía, ze' bzub gyi'ñ nu rnii dey “Mbecy ni Crisht” de yu nu ricy cup consuel lo Crisht. 27Tiem ze' bruu la be mbecy nu mnii por cuen ni Ñgyoozh Jerusaleeng. Za dey par Antioquía. 28Tub mbecy nu la Agabo wes suy lat de mbecy zigy. Orze' Espiriit Yon ni Ñgyoozh blocyuub mi yu, nunu mniiy nu sñuu ga cyid tub cubiñ ily dutuub la gyishlombecy. Cubiñ ze' biid ñi, ornu Clau byub ic yu de nasyoong. 29Orze' dela de mbecy ni Crisht mne' ic dey nu zeed yu ñuu tiñ nu locyuub yu de bicy yu nu yu' lo de yu ni Judea. Dub gal lac nu gagye tub ga dey, dub ni bzeed dey. 30Orze' ni bicy dey. Orze' bzuu nez dey Bernabee nu Saulo nu byazeñ yu gun ze' yaa de yu bel nu riib ic de mbecy ni Crisht nu yu' lo de yu ni Judea.

will be added

X\