Hechos 10

1Zu tub mbecy nu rcyiiñ Cesarea, yu nu la Cornelio. Yu ze' yu nu riib ic tub gaynal soldad Rom. Byub ic yu tub nac soldad nu la Mbecy Italia. 2Yu ze' tona' la pcaa ic yu de coz ni Ñgyoozh. Pca lagy yu lom nu dela famil niy. Zañ gun briic yu ni de mbecy zi lat de mbecy Israeel, nunu zaab rnii nu laay Ñgyoozh. 3Orze' tub dzi, tub gyiib chon or gudze, bruu zac tub anc ni Ñgyoozh loy. Orze' nay rab yuy: ―¡Cornelio! ―nay. 4Orze' mbi la bgüii Cornelio lo anc ze' gun gudzib yu. Orze' nay: ―¿La coz rac shuaana̱? ―nay rab yu anc. Orze' na anc rab yu Cornelio: ―Ñgyoozh mniim nu nap ornu güeñ mi nu rnii nur mi, nunu ornu rzac mi de gun nu rbic ru ni de mbecy zi. 5Orze' na zuu nez ru la be mbecy chay Jope nu cyid nuy tub mbecy nu la Simo̱o̱. Laab yu ze' yu nu la Bed. 6Yu ze' rcyiiñ yu nu tub mbecy nu la laaba' Simo̱o̱, tub yu nu rcuugy gyid bañcyug. Rcyiiñ yu ru' nisyudoo ―na anc ze'. 7Na ornu bruu chu anc lo Cornelio. Orze' bredz Cornelio cyup yu nu ricy riiñ nañ yu'y nu tub soldad. Soldad ze' tub yu nu dzi rcaa ic de coz ni Ñgyoozh, nunu nac yu mbecy nu ricy zi'l coz nu rlagy Cornelio. 8Orze' mniiy lo dey de coz nu guc. Gaze' nu bzuu nez yu dey zay par Jope. 9Na tuuba' dzi, lat nu de mbecy ze' zaab zay nez, sñuu ga zi'l ri dey Jope, orze' Bed gup yu too yu' tub or wi doo par nu nii nuy Ñgyoozh. 10Orze' brugyi' ran yu. Rlagy yu goy gyit. Na lat nu rduzu ye de coz nu goy, Ñgyoozh bicy mi nu bruu zac tub coz loy mod ni pcaal. 11Bzaac yu nu byaal baa. Orze' bet tub coz nu na gal nu na tub negy cuadrad nag se' tap la scyiñ niñ yet ñi par lo yu. 12Orze' lo negy ze' nguaa de lo la bañcyug nu ricy cup tap gyi': gaza' de lo la nez bily nu de lo la chigyiñ. 13Orze' na Ñgyoozh rab mi Bed: ―Bed, wes su. Biit de bañcyug ze' gow ru ―nam. 14Orze' na Bed: ―Cue' Shuaana̱. Ya̱ rila wada̱w de coz bag nu rlyuu leey ni Moisees, nunu rila wada̱w coz nu a̱' yad ñi nu da̱w ―nay. 15Orze' na ga' Ñgyoozh rab mi yu tuuba' tir: ―Benu ya̱ Ñgyoozh bicy caacya̱ la coz, orze' cue' niir nu nde' bag nañ ―nam. 16Chon tir guc de coz ze'. Orze' lueg la negy ze' gupa'ñ baa. 17Orze' Bed gush yu shcab nañ lardooy ben lac yaruu de coz nu bruu zac loy. Laab or la ze' byad yu' ni Simo̱o̱ ni de mbecy nu bzuu nez Cornelio. Guchu' dey ro'. 18Orze' rbish ti dey nu bdugyi'y ben a zu tub yu nu la Simo̱o̱, laab yu ze' yu nu la Bed, lo de mbecy nu yu' ze'. 19Na Bed gabee rash yu shcab par nu gyet lag yu cuen lac yaruu de coz nu bruu zac loy. Orze' Espiriit Yon ni Ñgyoozh nam rab mi yu: ―Bzuub gyidag. Zu chon mbecy nu ryub dey ru. 20Orze' na bzu lily laa. Bet la. Cue' gyicy cyup ic ru nu cha nur dey, gun ya̱ bzuu neza̱ dey ―nam. 21Orze' Bed bet yu. Zay lo de yu ze'. Orze' nay rab yu dey: ―Ya̱ yu nu ryub der ze'. ¿La riñ yad der lo̱? ―nay. 22Gaze' nu na dey: ―Cornelio, yu nu riib ic tub gaynal soldad, bzuu nez yu de̱ ya̱ yapa̱. Yu ze' tub mbecy nap. Rca lagy yu lo Ñgyoozh. Nunu dela de mbecy Israeel nap rnii dey niy. Tub anc ni Ñgyoozh mniiy loy nu cuedz yu ru char yu'y, gun orze' gac gyeñ yu coz nu rlagy ru niir ―na dey. 23Orze' Bed mniiy nu chu' dey nañ yu', nunu mniiy nu gyeche dey ze'. Orze' tuuba' dzi bzu lily Bed nu za nuy dey, nunu la be de bicy na nu yu' Jope za nuy yu. 24Orze' gal tuuba' dzi bri dey Cesarea. Ze' blez Cornelio, nu de famil niy, nu de yu nu tona' la amig niy. Tub nac laa de yu ze' bredz yu. 25Na ornu Bed bru'ñay ro' Cornelio, orze' Cornelio za cheel yuy. Orze' gusu tib yu loy nu driib zily yuy. 26Tees Bed pshes suy yu. Orze' nay: ―Wes su gun ni' ya̱ naca̱ mbecy gal nu na ru ―nay. 27Orze' Bed zaab ro lay riidz nu Cornelio lat nu ya dey nañ yu'. Ornu gu'y nañ yu', orze' bzaac yu nu yu' zigy mbecy nu byatublaazh nañ yu' ze'. 28Orze' na Bed rab yu dey: ―De ru nap rad lagy der nu leey ni de mbecy Israeel wazaan ñi nu gac nu dey mbecy nu walab mbecy Israeel. Nunu wac nu cha zaab lo dey loy. Tees Ñgyoozh blyuum ne̱ nu cue' ne̱e̱ lo ni tub mbecy nu nac yu mbecy bdune' o nu nac yu mbecy nu a̱' yad ñi nu cha zaab lo̱ lo. 29Orze' ornu bredz ru ya̱, wanne̱e̱ deeta̱, sinu lueg la yapa̱. Tees na rlagya̱ gad lagya̱ la gyi' bredz ru ya̱ ―nay. 30Orze' na Cornelio rab yu Bed: ―Gutap dzi ya̱ zu̱ yu̱'. Orze' i la or pca̱ uba̱ nu cue' da̱w gyit lat nu mne̱e̱ du̱ Ñgyoozh. Orze' bruu zac tub mbecy shab ryal lo̱. 31Orze' nay rab yu ya̱: “Cornelio, Ñgyoozh reñ mi coz nu rniir lom, nunu mniim nu dzi nap ornu rzac mi de gun nu rbic ru ni de mbecy zi. 32Nde' nu na zuu nez ru moz chay Jope nu cha teey tub mbecy nu la Simo̱o̱, laab yu ze' yu la Bed. Yu ze' rcyiiñ yu yu' tub mbecy nu la laaba' Simo̱o̱, tub yu nu rcuugy gyid bañcyug. Rcyiiñ yu ru' nisyudoo”, na anc ze'. 33Orze' ya̱ lueg la bzuu neza̱ dey nu biid teey ru. Nunu nap ñuu bicy ru nu yad ru. Na byatublaazh de̱ ii, nunu Ñgyoozh zum lat de̱, nunu rlagy de̱ gyeña̱ dela coz nu pcaa Shuaan den ru nu niir lo de̱ ―nay. 34Orze' brugyi' rnii Bed. Orze' nay: ―Na gaal bet laga̱ cuen nu rishli Ñgyoozh tub zi'l mod ricy num dela mbecy. 35Tees Ñgyoozh gyash mi mbecy mas cyu zi'l nez yu benu ca lagy dey lom, nunu gyicy dey coz nu se'ñ. 36De ru rad lagy der nu Ñgyoozh bzeed mi raso̱o̱ ni de nez mbecy Israeel. Mniim nu nu nac Jesucrisht, biñ nu nac Shuaan dela mbecy, chu' gyel ri zu nañ lardoo dey. 37De ru rad lagy ru la coz guc dutuub la lugaar nu yu' de mbecy Israeel. Coz ze' brugyi'ñ lo de yu ni Galilea, despuees nu briib nis Waa de mbecy, nunu pshaal yu de riidz ni Ñgyoozh. 38De ru rad lagy ru de coz ni Jesuuz, biñ nu pcyiiñ Nazaret. Rad lagy de ru nu pcui Ñgyoozh mi, nunu briic Ñgyoozh Espiriit Yon nim ni Jesuuz. Ñgyoozh bicy mi nu cyiiñ mi nu gyicy mi coz ily dela lugaar nu gusam. Bicy mi coz nap, nunu bicy yac mi de mbecy nu bicy ras nu nuras. De nde' bicy mi gun Ñgyoozh nac num mi. 39Nunu de̱ ya̱ rne̱e̱ de̱ nu bzaac de̱ dela coz nu bicy mi ledz mbecy Israeel, nunu dela coz nu bicy mi Jerusaleeng. Pcaa dey mi lo cruuz. Ni mod biit dey mi. 40Tees ornu bza' dzi chon nu gut mi, orze' Ñgyoozh bicy mi nu byabañ mi, nunu bicy mi nu bruu zac mi lat de̱ ya̱. 41Walab dela mbecy bzaac dey mi, sinu de̱ ya̱ zi'l, yu nu bi pcui Ñgyoozh nu gne̱e̱ de̱ lo de mbecy de coz nu guc, de̱ ya̱ bzaac de̱m. Bda̱w du̱ de̱m gyit, nunu bdo̱' de̱ nis du̱m despuees ornu byabañ mi. 42Orze' pcaam de̱ ya̱ nu shaal de̱ de riidz nu sac nu bruu lo Ñgyoozh lo de mbecy, nunu pcaam de̱ ya̱ nu ne̱e̱ de̱ nu segur la mi ze' nac mi biñ nu bloo su Ñgyoozh par nu ri beem ni dela mbecy mbañ, nunu par nu ri beem ni dela mbecy nu bi gut. 43Dela yu nu mnii por cuen ni Ñgyoozh bi bzat dey mi. Mnii dey nu dela mbecy, de yu nu gyicy cup consuel lom, gyicy sulagy Ñgyoozh de cyi nu bicy dey. Par nu nac Jesucrisht gyicy sulagy mi ni dey ―na Bed. 44Lat nu gabee rnii Bed de riidz ze', orze' Espiriit Yon ni Ñgyoozh bicy nim tub ga la de yu nu rzuub gyidag de riidz nu rniiy. 45De mbecy Israeel nu ricy cup consuel lo Crisht, de yu nu za nu Bed, tona' la za nu ic dey ornu bzaac dey nu Espiriit Yon ni Ñgyoozh ni' bicy nim de mbecy nu walab mbecy Israeel. 46Gud lagy dey nu bicy ni Espiriit Yon ni Ñgyoozh dey, gun mnii dey riidz reña' mbecy, nunu ryabic dey gyel mbecy ni Ñgyoozh. 47Orze' na Bed: ―De mbecy nu yu' ii byac ni Espiriit Yon ni Ñgyoozh gal nu guca' zi'l nu de ub na. Orze' ¿cyu gac ca ni dey nu cue' zu nis dey? ―nay. 48Orze' Bed pcaay mbecy nu griib nis yu dey par nu gabe nu nac dey mbecy ni Jesucrisht. Orze' de mbecy ze' mnishbaa dey lo Bed nu gyiyeeñ nuy dey la be dzi.

will be added

X\