Hechos 1

1Shi Tioj, gyicy nu pca̱a̱ loga la, lo gyicy ze' pca̱a̱ dela coz nu bicy Jesuuz gal nu de coz nu blyuum nese nu bzuub mi gyi' de riiñ nu bicy mi 2gal pshuub la dzi nu gup mi gyibaa. Anzir nu gyam gyibaa, orze' nu nac Espiriit Yon ni Ñgyoozh mniim lo de yu nu pcuim nu gac aposht de coz nu gyicy dey. 3Lat cyuu dzi despuees ornu bi byabañ mi nu gut mi, zañ tir bruu zac mi lo dey. Nu mod ze' briic mi nu gad lagy dey nu mbañ mi. Lat nu bruu zac mi, orze' bzat mi gyel gubier ni Ñgyoozh lo dey. 4Ornu gabee rded nu ru'm dey, orze' mniim lo dey nu cue' ruuy Jerusaleeng. Gaze' nu nam rab mi dey: ―Cuez der gashtal cuic la Ñgyoozh biñ nu bi mniim nu segur la cuic mi ni der. Ya̱ bi mne̱e̱ lo der nu ni gyicy mi, gun 5Waa rishli nu nis zi'l briib nis yu mbecy, tees na de ru gal nu bgo nis too der ornu bzu' nis ru nu nis, ni' zi'l sñuu ga gyet Espiriit Yon ni Ñgyoozh lat der nu cyiiñ num espiriit ni der ―nam. 6Na lat nu yu' tublaazh dey nuy mi, orze' bdugyi' dey lom. Gaze' nu na dey: ―Shuaan de̱, ¿a na pshuub tiem nu gzu nap ru lat de mbecy Israeel gal nu bzuuñ gulas? ―na dey. 7Gaze' nu na Jesuuz rab mi dey: ―Walab cuen ni de ru nu gad lagy ru ca dzi o ca tiem nu gyicy Ñgyoozh de coz nu bzeeñ mi nu gac cuen ni ub zi'l mi. 8Tees ornu Espiriit Yon nim gyet mi lat der, orze' gyicy mi nu cyiiñ der nu gzat ru ya̱ lat de mbecy nu yu' Jerusaleeng, lat de mbecy nu yu' dutuub la lo yu ni Judea, lat de mbecy nu yu' dutuub la lo yu ni Samaria, nunu dela lugaar nu byazet zir ni gyishlombecy ―nam. 9Despuees ornu blazh mnii Jesuuz de nde', orze' lo rgüii la dey wes nañ mi yam gyibaa. Byoow mi lat tub nac za yam. Orze' wangaca' zac dey mi. 10Lat nu yu' dey ta' loy baa rgüiiy nu yam, orze' bruu zac cyup mbecy shab caacy gusuy lo dey. 11Gaze' nu nay rab yu dey: ―Der mbecy Galilea, ¿lagu ni yu' der rgüiir baa? Laab Jesuuz bruum lat der yaam gyibaa. Tees ni' zi'l mod gal nu bzaac der yam ni' zi'l mod zac der ornu cyid mi tuuba' tir ―na de anc ze'. 12Bicy nu la Bicy ni Ya Oliva, ze' yu' dey. Bicy ze' gaab ga byeeñ ñi nu Jerusaleeng, tub la be metr nu ca lo cuen ni leey ni dey nu rac rza mbecy sab dzi nu rzu lagy mbecy Israeel. Gaze' nu gush nez dey yay par lat gyedz Jerusaleeng. 13Ornu bri dey lat gyedz, orze' gup dey gal shily cyup ni yu' ze', ze' nu rzu' dey. Ze' ri Bed, Santiag, Waa, Ndrees, Lip, Bartol, Mateo, Santiag i'ñ Alfeo, Simo̱o̱, yu nu nash leey Caneneo, nu Judas, bicy Santiag. Dela de yu ze' yu'y ze'. 14Nunu zaab rnii nu laa dey Ñgyoozh nu tub zi'l shcab: gaza' de biñ mñaa yu'm lat ze', gaza' Li ñaa Jesuuz, nunu gaza' de bicy Jesuuz. 15Na ornu bded la be dzi, orze' byatublaazh dey. Byatublaazh nu rnii tub gaynal zub gal de mbecy ni Crisht. Orze' wes su Bed. Gaze' nu nay rab yu dey: 16―Der bicy na, Espiriit Yon ni Ñgyoozh bi mniim lo Dabi nu caay de coz nu bicy Judas, yu nu blyuu Jesuuz lo de yu nu gua num pres. Rlagy ñi gac ñii gal nu bi cañ. 17Ni' Judas guc yu tub losa' de aposht. Gaza'y bdugyiy riiñ, laab riiñ nu bdugyi de̱ ya̱. 18Tees despuees nu bicy yu coz cyi nu bgu'y Jesuuz yaa de yu nu rzi lagy lom, orze' laab nu tiñ nu byash niy ze' wiiy tub lugaar ze' nu biit yu ub yu. Orze' bet lag yu tub lugaar gya. Bzu tooy lo yu. Orze' briich ñi nañ yu. Orze' bruu za dela coz nu yu' nañ yu. 19Orze' ornu dela de mbecy nu yu' Jerusaleeng gud lagy dey coz nu guc lugaar ze', orze' bloo la dey ñi Lugaar ni Reñ. Benu nu riidz dey, orze' Acéldama lañ. 20Gun Dabi bi pcaay coz nu gac lugaar ni Judas lo libr ni Salmo, ze' nu mniiy: Yu'y gyac ñi gal nu na tub lugaar ub zi nu sac la mbecy. Orze' waruu su ga' la mbecy nu cyiiñ yu nañ ñi, nay. Orze' nay tuuba' lugaar ni libr ze': Orze' tuuba' mbecy gyub ic yu riiñ nu bdugyiy, na Dabi. 21’Na lat na ii yu' mbecy nu gusa nu de ub na dub laa lat nu gusa dun Shuaan na Jesuuz. 22Brugyi' rded nu dey de ub na nese dzi nu briic Waa nu zu nis mi, gashtal dzi nu yaa lam gyibaa. Na rlagy ñi nu chu' ca na tub dey lat na par nu niiy nu bzaac den nu byabañ mi ―na Bed. 23Orze' bloo su dey cyup mbecy. Tub yu lay See, laab yu ze' lay Barsabás, nunu laab yu lay Jusht. Bloo su dey yu ze' nu tuuba' mbecy nu la Matías. 24Gaze' nu brugyi' rnii nu dey Ñgyoozh. Orze' na dey: ―Ñgyoozh, ru rad lagy ru la na lardoo dela mbecy. Na lo cyup de yu ii, blyuu lo̱ de̱ ca na dey bi pcuiir 25par nu gac yu aposht. Chu'y lo Judas. Gun Judas nu nac nu bicy yu coz a̱' nap, orze' bzeeñ yu riiñ nu zuy par nu yay lugaar ze' nu byap yu gyay ―na dey. 26Gaze' nu bloo dey suert ben ca na de yu ze' chu'y. Orze' Matías bruu suert niy nu chu'y lat de trotub aposht ze'. Yu ze' gu'y lugaar ni Judas.

will be added

X\