3 San Juan 1

1Ya̱, tub yu bel nu zu riiñ ni Crisht, zeeda̱ gyicy ii lo ru Gayo, tub amig ne̱ nu dzi rca̱. Ya̱ rca̱ ru tub mod nu rishli. 2Ru, bicya̱ nu dzi rca̱, ya̱ diña̱ lo Ñgyoozh nu dub laa tiem gzac ru lo coz nap, nunu cyiiñ ruub cuerp nir. Gun bi rad lagya̱ nu nap zu lagy ru nañ lardoor. 3Tona' la bet lagya̱ ornu bri la be bicy na, gun byoo dey rishlo̱ nu ru dzi fert ricy paar nu de riidz rishli ni Ñgyoozh. 4Warusu ni tuuba' la coz nu gyicy ñi nu gyet lagya̱ gal nu yet lagya̱ ornu rad lagya̱ nu de mbecy nu na gal nu na i'ña̱ rded dey dub gal mod nu rnii de riidz nu rishli ni Ñgyoozh. 5Ru, bicya̱ nu dzi rca̱, ru dzi bicy paar ornu rzu bich ru nu nac de' zir de bicy na nu nac Crisht nunu yegar ornu rzu bich ru nu nac de mbecy nu druu reña' gyedz ornu dri dey lor. 6De yu ze', ornu biid dey lat de mbecy ni Crisht nu yu' par ii, orze' mnii dey lat dela de yu ze' nu dzi nap bicy ru nur dey nu nac nu rcar dey. Orze' por faboor locyuub ñuur dey ni de coz nu cyiiñ par byaj ni dey dub gal mod nu gyedzu' lagy Ñgyoozh. 7Ornu de yu ze' gush nez dey zay nu gyicy yu riiñ ni Jesucrisht, rila wanshet ic dey nu nlocyuub de mbecy nu a̱' yu' lo Ñgyoozh dey. 8Nde' nu rlagy ñi nu nap gyicy dun dey ornu ded yu yu'n, gun orze' locyuub na dey ornu tush las yu de riidz rishli ni Crisht. 9Ya̱ bzeeda̱ tub gyicy lo de mbecy ni Crisht, tees Diótrefes wangyicy cuen yu de riidz nu mne̱e̱, gun dzi gusht niy nu gyicy yu mandaar. 10Nde' nu ornu yapa̱, orze' rica̱ nu gad lagy der de mod nu ricy yu. Yu ze' rded yu nu rniiy rishcuen. Nunu rniiy riidz fals nu za contr ni de ub na. Nunu yu ze' wazuy conform nu de coz nu bi ricy yu, sinu rlagy zir yu gyicy yu. Orze' wacshet ic yu nu chu' de bicy na nañ yu'y ornu dri dey loy. Nunu benu ca na mbecy rlagy yu nu cuic yu yu'y chu' de yu ze', orze' wazaan Diótrefes nu ni gyicy nuy laab de yu ze'. Ze' benu ca na tub mbecy cuic yu yu' chu' de yu ze', orze' Diótrefes cyuu nuy mbecy nu cuic yu' ze' lat de mbecy ni Crisht. 11Ru, bicya̱ nu dzi rca̱, cue' sya'r lo de mod a̱' nap nu ricy mbecy, sinu sya'r de mod nap nu ricy dey. Gun mbecy nu ricy mod nap, yu ze' nac yu ni Ñgyoozh. Ze' de mbecy nu ricy mod a̱' nap, yu ze' a̱' yu' loy Ñgyoozh. 12Orze' dela mbecy rnii dey nu Demetr nac yu mbecy nap. Yu ze' ricy yu mod nu rlagy ñi, nunu nu nac nde' rabee nu nac yu mbecy nap. Nunu ni' zi'l de̱ ya̱ nap rne̱e̱ de̱ niy. Ru rad lagy ru nu rne̱e̱ de̱ coz rishli. 13Yu' zañ coz nu rlagya̱ ne̱e̱ lor, tees walagya̱ ca̱a̱ ñii lo gyicy, 14gun drish lo̱ nu gyiily la yap güi̱i̱ de ru, nunu ne̱e̱ du̱ de ru lo nu loo la. 15Ñgyoozh gyicy mi nu cheti ri añ nir. Dela de amig ni den zeed dey ñgyoozh nir. Tub ga la amig nin gab ruy shnuy.

will be added

X\