2 Timoteo 4

1Lo Ñgyoozh nu lo Jesucrisht, ya̱ du' riiñ yaar nu shaal ru de riidz nim. Nunu Jesucrisht cyid mi tuuba' tir nu gac mi rey, gun gri beem ni de mbecy mbañ gal nu de mbecy nu bi gut. Orze' lo de mi ze' ya̱ nap tona' la rdu̱' riiñ yaar nu 2shaal ru de riidz nim. La zi'l tiem nu gad mod pshaal de riidz ze' nim. Mas rlyu nu wad mod, tees ru bicy lañ. Pcuugy lardoo dey. Nunu pshuu nu dey. Nunu briic baloor ni dey. Nuu blyuu ni dey. Dela de nde' bicy nu pase̱z. 3Gun shuub tiem nu de mbecy wazuub gyidaga' dey ni de riidz ni Ñgyoozh nu rdulyuu. Lugaar nu zuub gyidag dey ni de riidz nim, ca nu yub dey zañ moscuel nu lyuuy ni dey de coz nu rlagy ub zi'l dey gyeñ yu. 4Orze' de yu ze' zu chuy de riidz rishli par nu gzuub gyidag dey ni de lo la rishtoo. 5Tees ru dub laa tiem bicy cuidad par nu cuir ca na coz nu gyicy ru. Gugyee ornu rzac zir. Bzu shcab ni se tub lo zi'l nu shaal ru de riidz nu sac ni Crisht. Nap bicy paa nu de riiñ nu bi ricy ru. 6Ya̱ bi zu̱ la̱ nu gata̱. Gaca̱ gal nu na tub gun nu cha lo Ñgyoozh, gun sñuu ga shuub or nu gata̱. 7Ya̱ na gal nu na tub soldad nu nap gucoo lat gyel yuu. Nunu ya̱ na gal nu na tub yu nu gush carer. Ze' na bi bri̱ gal ze' nu ca lo cuen nu gri̱. Gun ya̱ bicy pa̱a̱ nu Jesuuz. 8Orze' na bi ri lily tub i̱ nu yad ñi nu gyad ne̱ nu nac nu bicy pa̱a̱. Shuaan den Jesuuz, biñ nu gri bee ni mbecy, mi ze' gyabic mi ñii ne̱ ornu shuub dzi nu cyid mi tuuba' tir. Nunu walab ne̱ ya̱ zi'l gyabic mi, sinu ni' zi'l gyabic mi ni dela mbecy nu se nu ca zi'l lo nez nim nu cyid mi tuuba' tir nu nac nu rcay mi. 9Bicy tub fers nu cyid güiir ya̱ lueg la benu gac nir. 10Gun Demas, yu nu dzi rca de coz nu yu' gyishlombecy ii, yu ze' bi blaa yaay ya̱, nunu zay par gyedz Tesalónica. Crescente zay par lo de yu ni Galacia. Ze' Tit, yu ze' zay lo de yu ni Dalmacia. 11Se Luc zi'l byeeñ nuy ya̱. Yub ru Marc cyid nur yu, gun yu ze' cyiiñ yu nu locyuub yu ya̱ nu nac de riiñ ni Jesuuz. 12Ya̱ bzuu neza̱ Tíquico nu zay Éfeso. 13Ornu cyid ru, orze' cyid nur chacyet ne̱ nu bzeeña̱ Troas yu' Carpo. Nunu ni' zi'l cyid nur de libr ne̱. Nunu ricy zir ñi presis nu cyid nur gyicy pergamino nu ta' riidz lo ze'. 14Alejandro, yu nu nac birgyiib, tona' la shiñ bicy nuy ya̱. Shuaan den Jesuuz cyish mi niy dub gal na coz nu bicy nuy ya̱. 15Ru bzu cuidad nu nac yu ze', gun tona' la zay contr ni de riidz nu rshaal den. 16Tir loga la nu gua̱ lo de fushtiz, ni tub la mbecy wanlocyuub dey ya̱. Dela dey blaa yaay ya̱. Ya̱ drish lo̱ lo Ñgyoozh nu cue' gyicy cuen mi de coz nu bicy dey. 17Tees Shuaan den Jesuuz blocyuub mi ya̱, nunu briic mi fers ne̱, gun orze' guud mod nu shaala̱ de riidz nu sac ni Jesuuz, nunu bicya̱ nu güeñ de mbecy nu a̱' yu' lo Ñgyoozh de riidz ze'. Nde' nañ gal nu na nu Shuaan den Jesuuz bloo nap mi ya̱ ru' biidz. 18Nde' nu rad lagya̱ nu co nap mi ya̱ nu nac dela coz a̱' nap, nunu gya num ya̱ par lugaar ze' nu riib ic mi. ¡Rlagy ñi nu gyabic den gyel mbecy nim dub laa tiem! ¡Laab ni gac ñii! 19Ya̱ zeeda̱ ñgyoozh ni Prisca gal nu ni Aquila, gal nu de famil ni Onesíforo. 20Ze' Erasto, yu ze' byeeñ yu Corinto. Ze' Trófimo, yu ze' bzeeña̱ yu Mileto, gun rat yu. 21Bicy tub fers nu grir anzir nu gyap tiem rag. Eubulo, gal nu Pudente, nu Lino, nu Claudia, gal nu dela de bicy na nu yu' ii zeed dey ñgyoozh nir. 22Orze' Shuaan den Jesucrisht gac num ru. Nunu Ñgyoozh gyicy mi faboor nu nap gyicy num dela der.

will be added

X\