2 Timoteo 3

1Ni' zi'l rlagy ñi nu gad lagy ru nu ornu bi yad lazh tiem, orze' deet gac. 2Tiem ze' de mbecy ze' gac yu mbecy bigy lagy. Nunu gyet lagy dey tiñ. Nunu le' dey. Nunu ñgya dey. Nii zi dey ni Ñgyoozh. Wazuub gyidag dey ni de mbel niy. Gac dey mbecy nu sac graseer. Waca lagy yu lo de coz ni Ñgyoozh. 3Ni waca dey mbecy, ni washni lagy dey mbecy. Gnii dey rishcuen. Wac gyicy dey mandaar ub yu ornu galagy yu gyicy yu de coz a̱' nap nu rnii tooy. Nunu gyet lagy dey nu shiñ gyicy nuy losa'y. Gazi lagy dey lo dela coz nap. 4Cush cya dey ich losa'y. Gac dey mbecy balient. Tona' la gyañgya dey. Nunu yub dey coz nu rlagy ub zi'l yu lugaar nu yub dey coz ni Ñgyoozh. 5Gyicy dey tub mod nu dzi nap ricy dey par lo Ñgyoozh, tees washet ic dey nu gyicy nap Ñgyoozh yu. Rila cue' gyatublaazh ru nu de mbecy nu ni na ze'. 6Gun lat de yu ze' yu' la be mbecy nu rza yu' reña' mbecy. Orze' ricy dey gan rguuy de biñ mñaa nu sac shcab ni, de biñ nu dzi rzu shcab nu nac cyi. De mi ze' dzi rlagy mi gyicy mi de lo la cyi. 7De biñ mñaa ze' dub laa tiem rsya'm de riidz ni mbecy, tees rila wagyet lag dem cuen de coz rishli ni Ñgyoozh. 8Orze' gal nu Janes nu Jambres gua dey contr ni Moisees, orze' ni' zi'l de mbecy nu rzu' ngach ze' rza dey contr ni de coz rishli ni Ñgyoozh. De yu ze' nac yu mbecy nu mnu shcab ni. Nunu ricy cup dey tub consuel nu wacyiiñ. 9Tees wayicy dey gan zigy mbecy, gun dela mbecy rad lagy dey nu coz ton zi'l ricy de yu ze', laaba' gal nu gud lagy mbecy nu nac cyup de yu nu gua contr ni Moisees gulas. 10Ru zaab reñ lar raso̱o̱ ni de coz nu ricya̱. Rad lagy ru de riidz nu rlyu̱u̱. Rad lagy ru lac mod rcyiiña̱. Nunu rad lagy ru de coz nu bdu' ica̱ nu gyicya̱. Rad lagy ru nu ricy cupa̱ consuel lo Crisht. Rad lagy ru nu ricy cupa̱ pase̱z ni de mbecy. Nunu rad lagy ru nu rca̱ de mbecy. Nunu rad lagy ru nu ragye̱e̱ 11ornu rzab mbecy icha̱ gal nu ornu rzac zi̱. Ru rad lagy ru dela coz nu bzaca̱ Antioquía, nu Iconio, gal nu Listra. Nunu rad lagy ru lac bzac zi̱ ornu bzab mbecy icha̱. Tees Shuaan den Jesuuz bloo nap mi ya̱ yaa dela dey. 12Nunu rishli gaal dela mbecy nu rlagy gyicy dela coz nu rlagy Ñgyoozh nu nac nu nac nuy Jesucrisht zi'l, orze' de yu ze' segur la zac zi dey nu nac mbecy. 13Tees de mbecy a̱' nap gal nu de mbecy rguu, de yu ze' tub dzi ga ya a̱' nap zir dey. Rded dey rguuy. Nunu rguu ga' nuras dey. 14Ze' ru, bzu fert nu dela coz nu bi guc ru. Bi gud lagy ru nu de nde' coz rishli. Gun ru bi rad lagy ru nu cyu blyuu nir. 15Ca ic ru nu nese miiñ lar bi rad lagy ru de riidz nap ni Ñgyoozh. Riidz ze', nde' cyiiñ ñi nu gu' liñ ru, nunu gyicy ñi nu gruu mbañ ru nu nac nu ricy cup ru consuel lo Jesucrisht. 16Ñgyoozh byub ic mi nañ shcab ni mbecy ornu pcaa dey dela riidz nim. Nunu de riidz ze', nde' cyiiñ ñi par nu lyuuñ ni de mbecy, nunu shuu nuñ dey, nunu gu' liñ dey, nunu cuic ñi nu gad lagy dey nu cyiiñ yu gal mod nu rlagy ñi. 17Gun orze' de mbecy ni Ñgyoozh de lo la mod nap cyiiñ dey nu gyicy yu. Gun orze' bi bzu lily dey nu gyicy yu de lo la coz nap.

will be added

X\