2 Timoteo 2

1Orze' ru, yu feñ ne̱, “O” mnii nu cuic Ñgyoozh fers nir nu nac faboor nu bi bicy mi num ru nu nac Jesucrisht. 2Orze' de riidz nu bi güeñ ru nu pshaala̱ lat zigy de mbecy, bgu' de nu nde' yaa mbecy nu ricy paa, mbecy nu rabee nu cyiiñ nu lyuu ni losa'. 3Rlagy ñi nu gagyer nu zac zir gal nu de̱ ya̱ rzac zi̱ gal nu ricy tub soldad nu ricy paa ni Jesucrisht. 4Gun ni tub la mbecy, lat nu nac yu soldad, wagne' ic yu lat reña' asunt, gun rlagy ñi nu gyicy yu nu ganap lagy de soldad nu gya zir zu par ub yu. 5Orze' ni' zi'l mod ricy de yu nu rgyit. Wayicy dey gan iy benu wayit yu gal mod nu rlagy ñi. 6Rlagy ñi nu fert gyicy ru riiñ gal nu ricy mbecy nu ricy riiñ ngush, gun yu ze' yad ñi niy nu gyash yaay coz nu gow yu lo cosech loga. 7Gush ñuu shcab nu nac de coz nu rne̱e̱ ii. Orze' Shuaan den Jesuuz gyicy mi nu gyet lag ru cuen delañ. 8Bicy nu gyeza' lagy ru Jesucrisht. Mi ze' byabañ mi ornu gut mi. Nunu mi ze' bruum lat nez rey Dabi. De nde' riidz nu sac nim nu rshaala̱ lo de mbecy. 9Nunu par nu nac de riidz ze', nde' nu ya̱ rzac zi̱. Mas gashtal nañ yu' gyiib la ri̱ gal nu rbi tub mbecy a̱' nap. Ya̱ ri noowa̱, tees riidz ni Ñgyoozh a̱' ri noow ñi. Suelt la rded ñi. 10Nde' nu ya̱ ragye̱e̱ lo dela coz nu rzaca̱, gun nde' coz nap par de mbecy nu pcui Ñgyoozh nu gac nim, gun orze' ni' de yu ze' gruu mbañ dey nu nac Jesucrisht, nunu cyiiñ nu dey mi tub la lugaar cyit zu, ze' nu rcyiiñ mi. 11Nii tub riidz nu segur la rishli: Como ornu gut mi, orze' nde' nañ gal nu na nu guta' de ub na par nu nac de coz nu bicy den gulas. Orze' na rcyiiñ den dun mi tublaazh la. 12Nunu como gagye den nu zac zin, orze' nde' nu gad nu gyub ic den dun mi ze' nu gyub ic mi par lo. Benu nii den nu walab mbecy nim nac naa, orze' ni' zi'l mi ze' niim nu de ub na a̱' nac naa mbecy nim. 13Mas de ub na wagyicy paan, tees mi ze' zaab ricy paa lam, gun wac cham contr ni mod nu na ub mi. Dela nde' riidz nu segur la rishli. 14Bicy nu gyeza' lagy mbecy de riidz ze'. Nunu bdu' riiñ yaa dey nu cue' tub su dey losa'y nu nac reñ ga la riidz nu rnii tub ga dey. Orze' nde' gyicy cuidad dey ñi par lo Ñgyoozh. Gun benu nid ru' dey lo losa'y, nde' se la la cyiiñ ñi. Tub zi la coz nu gyicy nu rnid ru' dey, nde' par nu gnu zi'l dey de mbecy nu rzuub gyidag. 15Bicy ca na la coz nu gac gyicy ru par nu ganap lagy Ñgyoozh lor ornu gyar lom. Bicy gal nu ricy tub moz nu wat lo nu nac riiñ nu bicy yu. Blyuu de riidz rishli ni Crisht ni de mbecy gal mod nu rlagy ñi. 16Bruu chu lo de riidz wacyiiñ, riidz nu wayet lagy Ñgyoozh, gun de mbecy nu ni mod ro riidz dzi zir gnu dey ub yu par lo coz ni Ñgyoozh. 17Orze' de coz nu rlyuu dey ni mbecy gyicy ñi gal nu ricy tub güii ily nu de mbecy ze'. Himeneo nu Fileto nac yu mbecy nu ni bicy nu reña' mbecy. 18De yu ze' gudza dey lo de riidz rishli ni Crisht, gun rnii dey nu bi bded tiem nu gyabañ de mbecy nu bi gut. Orze' nu nac nde' ricy dey nu rcan shcab ni la be mbecy nu nac de coz ni Crisht. 19Tees de riidz rishli ni Ñgyoozh, nde' nañ gal nu na simient ni tub yu' nu tona' la fert zu. Ze' lo simient ze' ca de riidz ii: “Shuaan den yu' lom ca na mbecy nu nac nim.” Ze' tuuba' riidz ze' rniiñ: “Dela mbecy nu rnii nu Jesuuz nac mi Shuaan yu, dela de yu ze' rlagy ñi nu gruu chu dey lo de cyi.” Ni rnii riidz nu ca lo gyita' ni simient ze'. 20Nañ yu' ni tub yu lily, orze' ze' nguaa coz nu byaa nu or nu plat. Tees walab nde' zi'l, sinu ni' zi'l nguaa coz nu byaa nu yag nu yu biigy. Yu' coz nu rcyiiñ rabee zi tiem. Ze' yu' ga'ñ rcyiiñ ñi la zi'l tiem. 21Orze' benu tub mbecy gruu chuy lo cyi, orze' yu ze' nay gal na tub coz nu cyiiñ nu gyicy coz nap. Nay gal na tub coz nu zu chu par riiñ ni Ñgyoozh zi'l. Orze' mi ze' gac gyicy mi riiñ nap nu nac yu. 22Cue' shet ic ru nu gyicy ru de coz nu yu' nañ lardoo yu feñ, sinu pcyiiñ tub mod nu se'ñ, nunu bicy cup consuel lo Jesuuz, nunu pca Ñgyoozh gal nu de losa'r, nunu nap pcyiiñ nu de losa'r. Dela de mbecy nu bi byacaacy nañ lardoo, rgyiiñ dey lo Shuaan den Jesuuz nu locyuub mi dey nu ni gyicy yu. 23Cue' gyicy cuen ru de riidz ton nu se la la cyiiñ nu ro mbecy. Nunu ru rad lagy ru nu de riidz ze' ricy ñi nu ro zi dey riidz nu losa'y. 24Nunu de mbecy nu nac moz ni Shuaan na Jesucrisht, yu ze' walagy ñi nu go zi dey riidz nu losa'y, sinu rlagy ñi nu nap chu' nuy dela mbecy. Rlagy ñi nu cyiiñ yu par nu nap lyuuy ni de mbecy. Nunu rlagy ñi nu gyicy cup yu pase̱z ni dey. 25Nunu rlagy ñi nu gyicy nap yu de mbecy rnid ru' nu mod raso̱o̱, nunu cyish loy nu Ñgyoozh gyicy mi nu cush cya mbecy rnid ru' ze' lom. Orze' gad lagy dey de coz rishli nim. 26Gun orze' cyish dey yaa nunu gla dey ni caa nu rzu nuras. Gun na dey gal nu na pres ni nuras, par nu gyicy nuy dey ca na la nu yad ic yu.

will be added

X\