2 Timoteo 1

1Ya̱ Baly tub aposht ni Jesucrisht nu nac nu nde' coz nu rlagy Ñgyoozh. Orze' mi ze' bzuu nez mi ya̱ nu cha shaala̱ riidz nu mniim nu cuic mi nu cui mbañ den nu nac nu nac du den Jesucrisht. 2Orze' ya̱ pca̱a̱ gyicy ii nu zeeda̱ ñii lo ru, Timoteo. Ru nar gal na tub yu feñ ne̱ nu dzi rca̱. Orze' Ñgyoozh Uz den gal nu Shuaan den Jesucrisht gyicy mi faboor nu nap gyicy num ru. Nunu gashni lagy mi ru. Nunu gyicy mi nu cheti ri añ nir. 3Cya' yeza' lagya̱ ru ornu rne̱e̱ du̱ Ñgyoozh or napor nu or gyeche. Orze' ya̱ drica̱ gras ni mi ze', biñ nu ricya̱ riiñ ni gal nu bicy de gyitoo bel ne̱. Nunu ya̱ rad lagya̱ nu mod nu ricya̱, nde' mod nu se'ñ. 4Zaab yeza' la lagya̱ nu biiñ ru tiem nu bla' losa'n. Nunu rlagya̱ yap güi̱i̱ ru, gun orze' ded ru' ga' la nu gyet lagya̱. 5Gun ya̱ yeza' lagya̱ nu ru rishli gaal ricy cup ru consuel lo Crisht. Nu loga la shus ru Loida bicy cup mi consuel lo Crisht. Nunu ni' zi'l ñaar Eunice ricy cup mi consuel lom. Nunu ya̱ rad lagya̱ nu segur la ni' zi'l na consuel ricy cup ru. 6Nde' nu ya̱ ne̱e̱ lor nu co lor nu nac riiñ nu briic Ñgyoozh nu gyicy ru ornu briib ya̱a̱ toor. 7Gac gyicy ru ñii gun Ñgyoozh briic mi Espiriit Yon nim ni den. Nunu mi ze' wagyicy mi nu dzib den, sinu bicy mi nu cyiiñ na nu gyicy na riiñ nim, nunu bicy mi nu caan Ñgyoozh gal nu de losa'n, nunu bicy mi nu gac gyicy na mandaar ub na. 8Orze' cue' gat lor ornu zat ru Shuaan na Jesuuz lo mbecy. Nunu ni' zi'l cue' gat lor nu nac ya̱, gun ya̱ ri̱ pres nu nac mi ze'. Tees nap zir nu shet ic ru nu zac zir nu de' zir mbecy ni Crisht nu nac de riidz nu sac nim. Gagyer de nu nde' nu nac fers nu rbic Ñgyoozh nir. 9Orze' Ñgyoozh bi bloo mbañ mi de ub na, nunu bloo sum den nu chu'n mod nu se'ñ. Walab nu nac coz nu ricy de ub na, nde' nu ni bicy mi, sinu bicy mi ñii par nu nde' coz nu rlagy ub mi, nunu par nu nac faboor nu bicy num den nu nac Jesucrisht. Orze' nese anzir nu gzub gyi' gyishlombecy, bi psa' lagy mi nu ni gyicy mi. 10Orze' na bi blyuum faboor ze' lo den lat nu biid Jesucrisht, biñ nu bloo mbañ de ub na. Orze' mi ze' bicy mi nu a̱' riiba' ic gyel gut de ub na. Nunu nu nac de riidz nu sac nim bicy mi nu gad lagy den nu cyiiñ na lo Ñgyoozh nu tub cuerp nu wata'. 11Orze' Ñgyoozh bdu'm riiñ ya̱a̱ nu shaala̱ de riidz nu sac nim ze', nunu briib mi riiñ ni aposht, gal nu riiñ ni moscuel ica̱ nu rlyu̱u̱ de riidz ze'. 12Nunu par nu nac nde' rzac zi̱ nu ri̱ pres. Tees rila wagat lo̱ nu nac de riidz ni Crisht ze', gun ya̱ bi rad lagya̱ cyu biñ nu ricy cupa̱ consuel lo. Nunu ya̱ rad lagya̱ nu segur la cyiiñ mi nu ñam riiñ nu bdu'm ya̱a̱ ze' gashtal shuub la dzi nu cyid mi tuuba' tir. 13Pshaal laab de riidz rishli nu güeñ ru nu pshaala̱. Nunu lat nu gyicy ru ñii bicy cup consuel lo Crisht, nunu car Ñgyoozh, gal nu de losa'r nu bi nac nu Jesucrisht. 14Bicy cuidad de riidz nap nu bdu' Ñgyoozh yaar. Nunu Espiriit Yon nim, biñ nu rcyiiñ nañ lardoo den, mi ze' locyuub mi ru nu gac gyicy ru de nde'. 15Ru bi rad lagy ru nu dela mbecy nu bruu lo de yu ni Asia blaa yaa dey ya̱. Gaza' Figelo nu Hermógenes blaa yaay ya̱. 16Tees Ñgyoozh nap gyicy num de famil ni Onesíforo, gun yu ze' zañ tir bicy yu nu guud baloor ne̱. Nunu wangat loy nu nac ya̱ mas ri̱ pres. 17Lugaar nu gat loy, laab bri lay Rom, orze' rila wanchecay nu byub yu ya̱ gashtal byad la̱ niy. 18Orze' Shuaan den Jesuuz nap gyicy num yu ornu shuub dzi nu gri beem ni de mbecy. Ru nap rad lagy ru lac gaal tant nu blocyuub yu de ub na gyedz Éfeso.

will be added

X\