2 Tesalonicenses 3

1Ze' laab nii la stub coz nu ne̱e̱ lo der bicy na, nde' nu cyiñ der lo Ñgyoozh nu nac de̱ ya̱. Cyiñ der lom nu dzach grush las de riidz ni Shuaan den Jesuuz dela lugaar nunu cyiñ der lom nu ca lagy de mbecy loñ gal nu guc lat de ru. 2Ni' zi'l cyiñ der lom nu cue' zaan mi nu shiñ gyicy nu de mbecy a̱' nap de̱ ya̱. Gun walab dela mbecy ricy cup dey consuel lo de riidz ni Shuaan na. 3Tees Shuaan den Jesucrisht, mi ze' nac mi biñ nu ricy paa. Nunu mi ze' cuic mi fers ni der. Nunu co chum der lo nuras a̱' nap. 4Nunu mi ze' ricy mi nu gyicy cup de̱ consuel lo der, gun rad lagy de̱ nu ricy der de coz nu mne̱e̱ de̱, nunu segur la zaab gyicy la der ñii par lo. 5Na Shuaan den Jesuuz locyuub mi der nu ca der de mbecy, gal nu rca Ñgyoozh den, nunu cuic mi fers ni der par nu gagye der ornu gzac zir. 6Der bicy na, ya̱ rne̱e̱ lo der nu nac rishbeey ni Shuaan den Jesucrisht nu gruu chu der lo ca zi'l na bicy na nu walagy gyicy riiñ, gal nu lo de yu nu wagyicy gal nu rnii de riidz nu blyu̱u̱ de̱ ni der. 7De ru nap rad lagy der nu rlagy ñi gyicy der gal nu bicy de̱. Walab nu wangyicy de̱ riiñ lat nu pcyiiñ de̱ lat der. 8Nunu wanta̱w leew de̱ gyit, sinu brish de̱ gyi'ñ. Lugaar nu gazed de̱, ca nu bloo lo̱ de̱ nu bicy de̱ riiñ dzi rel la, gun wangalagy de̱ nu riiba̱ de nu nde' ic der. 9Yad ñi nu diñ de̱ nu da̱w lo der. Tees wantiñ de̱ gun rlagy de̱ nu gyicya̱ tub mod nap par nu zac der, gun orze' gyicy der gal nu bicy de̱ ya̱. 10Lat nu pcyiiñ de̱ lat der, i mod mne̱e̱ de̱ lo der: “Mbecy nu washet ic nu gyicy riiñ, orze' yu ze' cue' goy gyit.” 11Bi neñ de̱ nu yu' la be mbecy lat der nu wagyicy yu riiñ. Se la la coz ricy dey. Nomaas nu rne' zi'l ru' dey lat asunt ni mbecy. 12Orze' nu nac rishbeey ni Shuaan den Jesucrisht, ya̱ rne̱e̱ lo de mbecy ze' nunu rdu̱' riiñ yaa dey nu cue' nid ru' dey, sinu gyicy dey riiñ par nu gad coz nu gow dey. 13Der bicy na, cue' gazed der nu gyicy der de coz nap. 14Benu ca na tub mbecy walagy yu zuub gyidag yu de riidz nu rne̱e̱ lo der lo gyicy ii, orze' bdu' cuen der yu, nunu cue' gac nu der yu. Gun orze' gat loy. 15Tees cue' gyicy ruy par losa' yuur, sinu byoo rishloy gal nu ricy nur bicy ru. 16Orze' Shuaan den Jesuuz, biñ nu rbic gyel ri zu, zeed mi gyel ri zu lat der dub laa tiem nunu dela mod. Mi ze' gac num dela der. 17Ya̱ Baly, zeeda̱ ñgyoozh ni der nu letr nu rca̱a̱ nu ya̱a̱. Ni mod rca̱a̱ nu la̱ lo dela gyicy nu rzeeda̱ lo mbecy. Ni mod rca̱a̱. 18Shuaan den Jesucrisht gyicy mi faboor nu nap gyicy num dela der.

will be added

X\