2 Tesalonicenses 2

1Na ne̱e̱ lo der bicy na ni de riidz nu cyid Shuaan den Jesuuz tuuba' tir, gal nu de riidz ni nu gyatublaazh den dun mi. Rnishba̱a̱ de̱ lo der nu 2cue' gzaan der nu can mbecy shcab ni der. Ni cue' zaan der nu chiib dey de ru nu nac nu rnii dey nu bi biid Shuaan den Jesucrisht. Dzi ga ni nii tub mbecy nu rnii por cuen ni Ñgyoozh. O dzi ga ni mod za riidz ni tub mbecy nu rshaal riidz nim. O dzi ga nii mbecy lo der nu gyicy nu bzeed de̱ nu ni rniiñ. 3Tees cue' zaan der nu guu mbecy ru ni tub la mod. Gun anzir nu shuub dzi ze', orze' nid ru' mbecy lo Ñgyoozh, nunu gruu zac tub mbecy nu cha contr nim. Mbecy ze' bi ca lo cuen nu nit loy. 4Yu ze' chay contr ni dela coz nu gyicy mbecy par ñgyoozh. Dela coz nu driib zily mbecy chay contr niñ. Nunu gashtal nañ yu' nu driib zily mbecy Ñgyoozh ze' chesub yu. Gyicy yu nu nac yu ñgyoozh. 5¿A wagyeza' lagy der nu ya̱ bi bzata̱ mbecy ze' lo der lat nu pcyiiña̱ lat der? 6Na de ru bi rad lagy der nu cyu ricy nu gabee nigul cyuu zac yu ze'. Tees ornu shuub tiem niy, gaze' nu gruu zac yu. 7Orze' mas bi yu' zañ mbecy nu bi ricy coz a̱' nap, tees biñ nu ricy nu gabee nigul gruu zac mbecy a̱' nap ze', mi ze' zaab ricy lam riiñ nu cue' gruu zac yu gashtal co la Ñgyoozh mi gyishlombecy. 8Orze' dzi ze' gruu zac yu. Na ornu cyid Shuaan den Jesuuz tuuba' tir, orze' cut mi yu nu nac bi nu griib ru'm. Nit lom yu ornu cyid mi tuuba' tir nu gyel lily nim. 9Tees lat nu chesay gyishlombecy ii, orze' nuras locyuub yu mbecy ze' nu chay contr ni Ñgyoozh. Gyicy nuras nu cyiiñ mbecy ze' nu gyicy yu coz ily. Gyicy yu de lo la nusuriidz fals, gal nu de coz nu cha nu ic mbecy. 10Nunu de lo la mod guuy de mbecy nu bi ca lo cuen nu nit lo, gun de yu ze' wangalagy dey niiy “O” ni de coz rishli. Ni wangalagy dey nu ca dey ñi. Gun benu ñgyicy dey nde', orze' gruu mbañ dey. 11Nde' nu Ñgyoozh zaan mi nu gadza dey, gun orze' cheña lagy dey ni de coz rguu. 12Nde' nu Ñgyoozh niim nu yu' falt ni de mbecy nu wancheña lagy ni de coz rishli, de yu nu bet zir lagy coz a̱' nap. 13Der bicy na, dub laa tiem rlagy ñi nu gric de̱ gras ni Ñgyoozh nu nac de ru mbecy nu razañ lagy Shuaan den Jesuuz. Gun Ñgyoozh pcuim de ru nese nu loga la nu gruu mbañ der. Orze' Espiriit Yon nim bicy mi ñii, ornu bicy mi nu byac der mbecy nu bi zu chu par Ñgyoozh. Ni mod na der byac ru nu nac nu ricy cup der consuel lo de riidz rishli nim. 14Gun Ñgyoozh blo sum de ru nu ni gzac der, nunu ni bzac der nu nac de riidz nu sac nim nu pshaal de̱ lat der. Nunu blosum der par nu zac lor de gyel lily ni Shuaan den Jesucrisht. 15Nde' nu na, der bicy na, bzu fert der nu nac de riidz rishli nu blyu̱u̱ ni der, nunu cue' laa yaa der ñii. De nde' mne̱e̱ de̱ lat nu rcyiiña̱ lat der, nunu gal nu mne̱e̱ lo gyicy nu bzeeda̱ lo der. 16Orze' ub la Shuaan den Jesucrisht gal nu Ñgyoozh Uz den cuic mi consuel ni der. Gun mi ze' nac mi biñ nu rca de ub na. Nunu nu nac faboor nim, orze' cuic mi tub consuel nu rila walazh ni den. Nunu mi ze' gyicy mi nu grish lon nu gruu nap na. 17Orze' de mi ze' cuic za' lam consuel ni der. Nunu gyicy dem nu gyafert der, gun orze' dela coz nu gyicy der gal nu de coz nu gniir, nap gruuñ ni der.

will be added

X\