2 Tesalonicenses 1

1Ya̱ Baly, nu Silvano, gal nu Timoteo tublaazh la zeed de̱ gyicy ii lo de ru bicy na nu nac Crisht nu yu' gyedz Tesalónica. De ru mbecy ni Ñgyoozh, Uz den, gal nu Shuaan den Jesucrisht. 2Ñgyoozh Uz den nunu Shuaan den Jesucrisht gyicy mi faboor nu nap gyicy num de ru, nunu gyicy mi nu cheti ri añ ni der. 3Der bicy na, rlagy ñi nu dub laa tiem gric de̱ gras ni Ñgyoozh nu nac de ru gal nu yad ñi, gun tub dzi ga zaab gyicy cup zir der consuel lo Crisht, nunu zaab ca zir der de losa'r. 4Nde' nu de̱ ya̱ ryabica̱ gyel mbecy ni der ornu rdo̱ riidz nu de mbecy ni Crisht nu yu' gal reña' lugaar. Ryabic de̱ gyel mbecy ni der nu nac nu rzu fert der, nunu nu nac nu ricy cup der consuel lo Crisht lat nu rshet zi mbecy de ru nunu lat nu rzac deet der. 5Nu nac de nu nde', rabee nu Ñgyoozh dzi se'ñ ricy mi ornu ri beem ni dela mbecy, gun orze' niim nu yad ñi ni der nu chu'r lat de mbecy nu riib ic mi, gun de ru rzac zi der nu nac nu riib ic mi der naa la. 6Gun Ñgyoozh dzi se'ñ ricy mi. Nde' nu gyicy mi nu gzac zi de mbecy nu rshet zi de ru, 7nunu gyicy mi nu nap chesu nap lagy de ru, de mbecy nu rzac deet. Ni' zi'l gyicy num de̱ ya̱. Nde' gyicy mi ornu shuub dzi nu gruu zac Shuaan den Jesuuz. Gruum gal gyibaa lat lyush gyi nu cyid mi. Nunu cyid mi lat de anc nu dzi rcyiiñ nim. 8Orze' cyid mi par nu cuic mi cashtig ni de mbecy nu a̱' yu' lo Ñgyoozh, gal nu ni de yu nu wacsuub gyidag de riidz nu sac ni Shuaan den Jesuuz. 9Ze' cashtig nu cuic mi ze', nde' nu shiñ gzac dey tub la. Orze' chu' dey reña' lugaar. Wayu' dey ze' nu rcyiiñ Shuaan den Jesuuz. Ni wayu' dey ze' nu yu' gyel lily nim. Ni wayu' dey ze' nu ricy mi coz ily. 10Cuic mi cashtig ni dey ornu cyid mi gal dzi nu blosu Ñgyoozh. Gun orze' dela mbecy ni Crisht gyabic dey gyel mbecy nim, nunu cha nu ic dey nu dzi zily nac mi. Ni' zi'l gyicy gaza' de ru, de mbecy nu guña lagy de riidz nu mne̱e̱ de̱. 11Nde' nu zaab rdiñ la̱ de̱ lo biñ nu nac Ñgyoozh ni den nu gyicy mi nu gyap der nu gac ru mbecy nu blosum nu gruu mbañ. Mi ze' gyicy mi nu gac za' lo der dela coz nap nu rlagy ru gyicy ru, gal nu de coz nu gyicy der nu nac nu ricy cup ru consuel lo Crisht. Ni gyicy mi nu nac nu dzi fert mi. 12Ni mod rne̱e̱ du̱ de̱ Ñgyoozh, gun orze' gyabic mbecy gyel mbecy nim nu nac de ru, nunu gyabica' dey gyel mbecy ni der nu nac mi ze'. Ni gyicy dey dub gal nu na faboor nu ricy Ñgyoozh gal nu Shuaan den Jesucrisht num de ru.

will be added

X\