2 San Pedro 3

1Orze' der bicy na nu dzi rca̱, nii gyicy cyup nu zeeda̱ lor. Orze' lo ruplaa gyicy ze' rlagya̱ gyicya̱ nu nap gash der shcab nu nac de consef nu drica̱ ni der. 2Bicy der nu gyeza' lagy ru ni de coz nu mnii de yu nu mnii por cuen ni Ñgyoozh gulas, gal nu ni de coz nu mnii Shuaan den Jesuuz, biñ nu co mbañ de ub na, nu gyicy den, de coz nu blyuu de aposht nim ni der. 3Nu loga la rlagy ñi caa ic der tub coz nu ne̱e̱ ii: ornu bi yad shuub dzi nu ded ni gyishlombecy, orze' gruu zac mbecy nu gyicy ca na la coz a̱' nap nu yu' nañ lardooy lat nu rcyiiñ yu gyishlombecy ii. Nunu de yu ze' gubdzaa dey de ru. 4Orze' nii dey: “Beni, ¿la zi coz rac? ¿Lagu wacyiid Crisht gal nu mniim nu cyid mi tuuba' tir? Na bi blazh de gyitoo bel ni den gut yu. Ze' dela coz ni gyishlombecy ni zi'l zuñ gaal zi nese nu bzub gyi'ñ.” Ni mod gnii de mbecy rgubdzaa ze'. 5Orze' de mbecy ze' ricy go̱' la dey ub yu nu walagy yu gad lagy yu nu tona' la gulas psa' lagy Ñgyoozh baa nu nac riidz nim. Nunu lugaar ze' nu yu' nis, laab ze' psa' lagy mi yu wach. Nunu nu nis psa' lagy mi ñii. 6Nunu ni' zi'l despuees Ñgyoozh mnit lom gyishlombecy nu nac nis gyey nu bet tiem ni Noé. 7Ze' baa nu gyishlombecy nu zu na, bi zuu lañ nu chañ lo gyi laaba' par nu nac riidz ni Ñgyoozh. Orze' de mbecy a̱' nap cha dey lo gyi ze' ornu shuub dzi nu ri bee Ñgyoozh ni de mbecy. Dzi ze' niim nu yu' falt ni dey. Orze' rlagy ñi cha dey lo cashtig. 8Tees der bicy na nu dzi rca̱, cue' nit lagy der nu par Ñgyoozh, biñ nu nac Shuaan den, par mi ze' tub dzi, nde' nañ gal nu na tub miily ña'n par de ub na. Ze' tub miily ña'n, nde' tub dzi zi par mi ze'. 9Walab nu dzi ricy gul lagy mi nu gyicy mi de coz nu mniim nu gyicy mi, gal nu rnii too la be mbecy, sinu mi ze' dzi pase̱z mi nu de ru. Gun mi ze' walagy mi nu nit lo ni tub mbecy, sinu rlagy mi nu ne' dela mbecy de cyi nu ricy yu. 10Tees shuub dzi nu cyid Shuaan den Jesuuz tuuba' tir, tub tiem nu rila wagad lagy na, gal nu dru'ña tub gubaan. Orze' nu tub nu zu redz ily, orze' nit baa. Orze' nit lo dela coz nu ta' baa nu nac gyi. Orze' ca gyi gyishlombecy gal nu dela coz nu yu' loñ. 11Orze' benu ni mod nit lo dela coz, ricy ñi presis nu chu' der gal mod nu rlagy Ñgyoozh, nunu rlagy ñi nu gyicy der gal mod nu yad ñi nu ricy de mbecy nim. 12Orze' blez der gal ornu shuub dzi nu cyid Jesuuz, biñ nu nac Ñgyoozh ni den. Nunu gyicy der ca na la coz nu gac gyicy ru par nu dzach shuub tiem ze'. Orze' tiem ze' nit lo baa nu nac gyi. Nunu dela coz nu ta' baa gzun ñi nu nac gyi ze'. 13Tees de ub na rlez naa gal or gruu zac tub baa cub nu tub gyishlombecy cub, dub gal mod nu mnii Ñgyoozh. Orze' lugaar ze' chu' dela mbecy nap, de yu nu ricy gal mod nu rlagy ñi. 14Nde' nu der bicy na nu dzi rca̱, lat nu rbez der de coz ze', orze' bicy der dela coz ca na la nu gac nir, gun ornu Ñgyoozh gyap mi der, orze' lat ze' nap yu' nu der losa'r, nunu sac ni tub la falt ni der. 15Rlagy ñi nu gad lagy der nu Ñgyoozh, biñ nu nac Shuaan den, dzi pase̱z mi num den par nu gad mod nu gruu mbañ den. Orze' bicy na Baly, yu nu dzi rca den, ni' zi'l bi bzeed yu gyicy lo der nu rniiñ laaba' de riidz ii. Pcaay lo gyicy ze' dub gal nu na shcab nu briic Ñgyoozh niy. 16Lo tub ga la gyicy nu pcaay mniiy de riidz ii. Mas yu' lugaar lo de gyicy ze', ze' nu ta' de riidz nu dzi biigy par nu gyet lag na cuen. Orze' de mbecy nu a̱' nap na shcab ni gal nu de mbecy a̱' fert pcan dey de riidz nu pcaa Baly, gal nu ricy dey nu reña' riidz ni Ñgyoozh. Orze' nu nac nde' nit lo dey. 17Nde' nu der bicy na nu dzi rca̱, como de ru bi gud lagy ru de coz ze' anzir nu gac ñii, nde' nu bicy cuidad der ub ru nis gruu chur lo Crisht nu nac de riidz rguu nu nii mbecy a̱' nap lo der. Gun orze' cue' nu checa der nu gzu fert ru nu nac de coz ni Crisht, 18sinu nap zir bdu' lo der Shuaan den Jesucrisht, biñ nu co mbañ de ub na, nunu zaab gyicy zir mi faboor nu nap gyicy num der. ¡Rlagy ñi nu gyabic den gyel mbecy nim par dub laa tiem! ¡Laab ni gac ñii!

will be added

X\