2 San Pedro 2

1Tees ni' zi'l gu' mbecy nu mnii fals de coz ni Ñgyoozh lat de mbecy Israeel, nunu ni' zi'l chu' mbecy nu glyuu coz fals lat de ru. De yu ze' ngach lyuu dey de coz fals nu gruu nañ shcab ni ub zi'l dey. Orze' nde' gyicy ñi nu gnu de mbecy. Orze' ni mod gyicy dey par nu gabe nu a̱' nac dey mbecy ni Shuaan den Jesuuz, biñ nu briish cyi dey. Orze' nu nac nu nde' dzi dzach cha dey lo cashtig. 2Orze' zigy mbecy gyicy dey de coz nu ricy de yu ze'. Ricy cup dey de lo la bis. Nunu nu nac de yu ze' shiñ rnii mbecy ni de coz rishli nu ricy de mbecy ni Crisht. 3Nu nac nu dzi zaab dey ich tiñ, nde' nu ricy dey gan de ru nu nac de coz fals nu rlyuu dey ni der. Orze' bi gulas tona' la Ñgyoozh bi mniim nu cha dey lo cashtig, nunu tona' la bi rac tiem bi ca lo cuen nu nit lo dey. 4Gun Ñgyoozh wangyicy sulagy mi ni de anc ornu bicy dey cyi, sinu pshet lag mi dey gabily. Orze' bzeeñ mi dey tub ze' nu cow. Nañ gal nu na nu cacuñ dey par nu bi yu' choow dey gashtal ornu shuub dzi nu gri beem ni dey. 5Ni' zi'l Ñgyoozh wangyicy sulagy mi ni de mbecy nu gu' gulas, sinu pshet mi gyey too de mbecy a̱' nap ze'. Nomaas Noé zi'l bloo nap mi yu, gal nu se gagy mbecy, gun yu ze' mniiy lo de mbecy nu chu' dey tub mod nu nap. 6Orze' ni' zi'l Ñgyoozh mniim nu cuic mi cashtig ni de mbecy Sodoma gal nu de mbecy Gomorra nu nit lo dey. Orze' pca gyi de gyedz ze' gal byadi'ñ lañ, gun nde' cuic ñi nu gad lagy de mbecy a̱' nap nu chu' par lo nu gyicy cuidad dey ub yu. 7Tees Lot guc yu tub mbecy nap. Orze' tona' la deet guc nañ lardooy nu nac de bis bag nu bicy cup de mbecy a̱' nap ze'. Nde' nu Ñgyoozh bicy mi nu bruu nap yu ni cashtig ily ze'. 8Orze' yu ze' mbecy nap nu pcyiiñ lat de mbecy a̱' nap ze'. Orze' bzac ziy nañ lardooy ornu bzaac yu nunu güeñ yu de coz a̱' nap nu bicy de yu ze' de dzi la. Bzac ziy nañ lardooy par nu nac de mbecy a̱' nap. 9Orze' Ñgyoozh Shuaan den rad lagy mi lac mod co nap mi de mbecy nu ricy mod nu rlagy ub mi lat nu rzac deet dey. Nunu rad lagy mi lac mod gyicy mi par nu cue' gruu de mbecy a̱' nap lo cashtig gashtal shuub la dzi nu gri beem ni dey. 10Nunu cuic mi cashtig ni dela mbecy nu shet ic nu gyicy la zi'l coz a̱' nap nu rgyiiñ lagy yu lo, gal nu dela mbecy nu walagy zuub gyidag nim. Nac dey mbecy nu ricy cyigy ic. Nac dey mbecy nu wacha lagy. Ni wacchib dey nu nii ziy ni de anc nu yu' gyibaa. 11Tees de anc ni Ñgyoozh, mas fert zir dey nunu ruub zir dey par de mbecy a̱' nap ze', tees par lo Shuaan den Jesuuz, rila wagnii dey nu yu' falt ni de mbecy a̱' nap ze'. 12De mbecy a̱' nap ze' na dey gal nu na bañ gyish. Sac la shcab ni ma, sinu ricy ma coz nu druu nañ lardoo zi'l ma. Bruu zac ma gyishlombecy tub lo zi'l par nu cub mbecy ma, nunu cut dey ma. Orze' de mbecy a̱' nap ze' rnii zi dey ni coz nu wagyet lag dey cuen. Orze' de yu ze' nit loy laaba' gal mod nu nit lo de bañ gyish ze'. 13Rzac zi dey nu nac nu ricy dey nu rzac zi reña' mbecy. De yu ze' rzu bich dey nu nac de gusht nu ricy dey tiem na zi'l. ¡Tona' la to' lo ornu yatublaazh dey nu de ru lat sa' ni der, gun lat ze' ricy dey gusht niy nu rguuy de ru! 14Wac la zac dey tub biñ mñaa, orze' lueg la shiñ rnii too dey lom. Nunu wacheca la dey nu ricy yu cyi. Ricy dey gan mbecy nu a̱' fert ricy cup consuel lo Crisht. Bi gubee nañ lardoo dey nu ye rzac yu lo la coz. Nac dey mbecy byanduu. 15Gudza dey. Wangyicy dey coz nu rlagy Ñgyoozh, gun bruu chu dey nez rishli nim. Ricy dey gal nu bicy Balaam, i'ñ Beor. Yu ze' bicy yu coz a̱' nap par nu gyicy yu gan tiñ. 16Tees tub bur, mas wagac nii ma, tees mnii ma riidz nu rnii mbecy. Orze' mnii ma nu yu' falt niy. Orze' wansaan ma nu gyicy yu coz ton nu mnii tooy nu gyicy yu. 17De mbecy nu rlyuu coz a̱' nap ze' na dey gal nu na tub zo wach nu sac nis nañ. Na dey gal nu na za nu ta' baa, lugaar nu cuic ñi gyey, canu za nu biñ. Ñgyoozh bi mniim nu chu' dey ze' nu blaazha' zir cow par tub la. 18Gya ga la rnii dey riidz le', riidz nu wacyiiñ. Orze' de yu ze' ricy dey gan de mbecy nu sa druu chu lat de mbecy nu gudza. Ricy dey gan de mbecy ze' nu nac nu rsaap dey lagy yu. 19Rnii dey nu sac patro̱o̱ ni de mbecy ze'. Orze' gac gyicy de mbecy ze' la zi'l coz nu rlagy yu. Ze' ub la dey zu patro̱o̱ niy, gun de cyi nu ricy nu rnu dey, nde' nac ñii patro̱o̱ ni dey. Gun dela coz nu zetib ic nañ lardoo mbecy, nde' yac ñii patro̱o̱ ni dey. 20Benu mbecy bi bicy yu gan gucay nu ricy yu de coz cyi nu riib ic de mbecy nu yu' gyishlombecy ii nu nac nu gu' loy Shuaan den Jesucrisht, biñ nu co mbañ de ub na, ze' benu cush cyay nu gyicy yu cyi ze' tuuba' tir, nunu benu cyi ze' chetib ic ñi nañ lardooy, orze' shiñ zir na nañ lardoo dey gyac gaze' gal nu na dey nu loga. 21Na ornu bi gud lagy dey lac mod gyanap dey lo Ñgyoozh, ze' benu laa yaa dey de riidz nim nu mnii mbecy lo dey, orze' nap zir benu cue' la ñgyad lagy dey. 22Tees nu nac de yu ze', orze' byu' niñ gal nu rnii tub nac riidz nu rishli nu nil rnii mbecy. Orze' rnii dey: “Che̱' rab ma coz nu row ma. Gaze' nu cush cya ga' ma gow ma ñii tuuba' tir. Ze' cuch gus nu sa blaagy lo nis cacy, orze' cush cya ga' ma nu dudub ma lo biñ tuuba' tir”, rnii dey.

will be added

X\