2 San Pedro 1

1Ya̱ Simo̱o̱ Bed naca̱ tub aposht ni Jesucrisht nunu ricya̱ de coz nu rlagy mi. Orze' ya̱ ca̱a̱ gyicy ii nu zeeda̱ ñii lo der. Bi byac der mbecy nu ricy cup consuel nu na gal nu na consuel nu ricy cup ya̱. Nunu consuel ze' tona' la sac ñi. Ni' zi'l na consuel nu ricy cup de ru nu nac nu Jesucrisht ricy mi mod nu se'ñ. Mi ze' nac mi Ñgyoozh ni den, nunu nac mi biñ nu co mbañ de ub na. 2Orze' Ñgyoozh gyicy mi faboor num der, nunu bded ru' ga' la nap gyicy num der. Nunu gyicy mi nu cheti ri añ ni der. Ni gyicy num der nu nac nu yu' lor mi, nunu nu nac nu yu' lo der Shuaan den Jesuuz. 3Orze' Ñgyoozh, nu nac nu dzi rcyiiñ mi, briic mi dela coz nu galagy ñi ni den par nu cyiiñ na gal mod nu rlagy ñi, nunu par nu gyicy na de coz nu bi ca lo cuen nu gyicy na lom. Ni bicy mi nu nac nu yu' lon mi. Nunu laab mi blosum de ub na nu gyac den mbecy lily na gal nu lily na' ub mi, nunu blosum de ub na nu gyac den mbecy nap gal nu napa' ub mi. 4Nu nac nde', orze' Ñgyoozh rbic mi dela coz nu bi mniim nu segur la cuic mi ni den. Nunu de coz ze', nde' tona' la coz ily, nunu tona' la coz nu dzi sac. Gun par nu nac de nu nde', orze' de ru gyac der gal nu na Ñgyoozh. Orze' de ru wanur gal nu rnu de mbecy nu yu' gyishlombecy ii nu nac de shcab shiñ na nu ricy cup dey. 5Nde' nu rlagy ñi nu gyicy der tub fers nu cue' nu tub lo zi'l nu gyicy cup der consuel lo Jesuuz, sinu ni' zi'l rlagy ñi nu gyicy der coz nap. Nunu cue' nu tub lo zi'l nu gyicy der coz nap, sinu ni' zi'l bicy der nu gad lagy ru ca na coz nu rlagy Ñgyoozh. 6Nunu cue' nu tub lo zi'l nu gad lagy der ca na coz nu rlagy Ñgyoozh, sinu ni' zi'l rlagy ñi nu nap gyub ic der ub ru. Nunu cue' nu tub lo zi'l nu nap gyub ic der ub ru, sinu ni' zi'l rlagy ñi nu pase̱z gagye der ca na la coz nu yad. Nunu cue' nu tub lo zi'l nu pase̱z gagye der, sinu ni' zi'l rlagy ñi nu gyicy der dela coz nu ca lo cuen nu gyicy der par lo Ñgyoozh. 7Nunu cue' nu tub lo zi'l nu gyicy der de coz nu ca lo cuen nu gyicy der par lo Ñgyoozh, sinu ni' zi'l rlagy ñi nu gazañ lagy der losa'r. Nunu cue' nu tub lo zi'l nu gazañ lagy der losa'r, sinu ni' zi'l rlagy ñi nu ca der dey. 8Benu de ru zaab ricy lar de coz ze', orze' cyiiñ der nim lat nu rded ru gyishlombecy ii, nunu walab nu leew la bdu' lo der Shuaan den Jesucrisht. 9Tees de mbecy nu wayicy de coz ze', de yu ze' na dey gal nu na lo ca', o na dey gal nu na mbecy nu wacsac nap. Mnit lagy dey nu bi byecy de cyi nu bicy yu gulas. 10Nde' nu de ru, bicy na, bloo lo der nu gyicy ru nu gabe nu rishli gaal Ñgyoozh blosum der nunu pcuim der nu gac ru nim. Benu ni gyicy der, orze' rila walaa yaar de coz nim. 11Nunu benu ni gyicy der, orze' nde' nañ gal nu na nu gyal ro' ni nez nu chu' der ze' nu riib ic Shuaan den Jesucrisht, biñ nu co mbañ de ub na, tub la. 12Nde' nu ya̱ zaab rne̱e̱ la̱ nu gyeza' lagy der dela nde', mas bi rad lagy der, bzu fert der nu nac de riidz rishli nu bdulyuu ni der. 13Orze' lat nu ya̱ mbaña̱, orze' ya̱ rnii to̱o̱ nu rlagy ñi nu do̱o̱ rishlo der nu nac de consef nu mne̱e̱ ze'. 14Orze' Shuaan den Jesucrisht bi briic mi nu gad lagya̱ nu sñuu ga ru̱u̱ gyishlombecy ii. 15Nde' nu ya̱ gyicya̱ ca na la coz nu gac gyicya̱ par nu gyeza' lagy der de coz ze' despuees ornu bi guta̱. 16Ornu blyu̱u̱ de̱ ni der nu Shuaan den Jesucrisht dzi coz ily ricy mi, gal nu de riidz nu rzat nu cyid mi tuuba' tir, walab nu blyu̱u̱ ni der nu rishtoo nu bloo ic zi'l de̱. Gun bzaac urlo̱ la̱ de̱ Shuaan den Jesucrisht nu gyel lily nim. 17Bzaac de̱ ornu Ñgyoozh Uz den byabic mi gyel mbecy nim, nunu ornu bicy Ñgyoozh nu rabee nu dzi lily na laab mi ze'. Ni bicy Ñgyoozh ornu bzab ti'm nu mniim tub mod nu tona' la cyit na. Orze' nam: “Mi ii I'ña̱ nu tona' la rca̱. Nunu tona' la yet lagya̱”, nam. 18Ub la de̱ güeña̱ de riidz nu mniim ze'. Nunu gashtal gyibaa la bruuñ. Lat ze' yu̱' de̱ nu Shuaan den Jesuuz too bicy ze' nu bruu zac gyel lily ni Ñgyoozh. 19Orze' nu nac de coz nu bzaac de̱, ricy ñi nu rabee nu rishli de riidz nu bzeeñ de yu nu mnii por cuen ni Ñgyoozh. Nunu nap ricy der benu ricy cuen der ñii. Gun de riidz ze' nañ gal nu na tub yaa gyi gyegy nu rbic yaa ze' nu cow. Orze' bicy cuen der de riidz ze' gashtal za' yu la ornu cyid Jesuuz tuuba' tir, biñ nu na gal nu na bel rza' yu. Orze' mi ze' cuic mi nu gad lagy der dela coz. 20Tees coz nu ricy zir ñi presis, nde' nu caa ic der de riidz ii: Ni tub la mbecy a̱' ricy cup yu rishbeey nu niiy lac yaruu de riidz nu bzeeñ de yu nu mnii por cuen ni Ñgyoozh nu shcab ni ub zi'l yu. 21Gun ni tub la yu nu bzeeñ riidz ni Ñgyoozh wanseeñ dey ni tub la riidz nu bruu nañ lardoo ub zi'l dey, sinu de yu ze' guc dey mbecy nu mnii por cuen ni Ñgyoozh. Orze' Espiriit Yon nim byub ic mi nañ lardoo dey.

will be added

X\