2 San Juan 1

1Ya̱, tub yu bel nu zu riiñ ni Crisht, zeeda̱ gyicy ii lo ru tub biñ mñaa nu pcui Ñgyoozh nu gac nim gal nu lo de i'ñ ru. Ya̱ rishli rca̱ de ru, nunu walab ya̱ zi'l, sinu ni' zi'l dela mbecy nu rad lagy de coz rishli, rca dey de ru. 2Ya̱ rca̱ de ru nu nac nu rad lagya̱ de coz rishli ni Crisht nañ lardo̱o̱ tiem na gal nu par tub la. 3Orze' Ñgyoozh Uz den nunu Jesucrisht I'ñ mi gyicy dem faboor nu nap gyicy num der, nunu gashni lagy mi de ru, nunu gyicy mi nu cheti ri añ ni der. Ni gyicy num den nu nac nu rad lagy na de coz rishli ni Crisht, nunu nu nac nu rca den losa'n. 4Ya̱ tona' la bet lagya̱ ornu bdzeela̱ la be de i'ñ ru. Nunu bzaaca̱ nu rded dey gal mod nu rlagy ñi gal nu mnii Ñgyoozh uz den nu gyicy na. 5Orze' na ya̱ rnishba̱a̱ lor zan na, nu rlagy ñi nu ca tub ca tub zi'l den losa'n. De riidz nu ca̱a̱ lo gyicy ii, nii walab tub mod cub nu ne̱e̱ nu gyicy ru, sinu laab nii mod nu bi güeñ der nese nu loga la. 6Benu ca den Ñgyoozh, orze' ricy na de coz nu rniim. Orze' de riidz nu güeñ der nu mniim nese nu loga la, nde' nu ca tub ca tub zi'l den losa'n. 7Tees gyishlombecy ii tona' la zigy de mbecy rguu chesa dey. Wagnii dey nu Jesucrisht biid mi gyishlombecy ii nu rishli byac mi mbecy. De mbecy nu ni ricy ze', yu ze' nac yu mbecy rguu, nunu zay contr ni Crisht. 8Bzu der cuidad nis nit lo de ir nu gyad nu nac de riiñ nu bicy ru, sinu gyad za' la i der. 9Cyu zi'l mbecy nu rlagy ded lo par lo de coz nu blyuu Crisht, yu ze' a̱' yu' loy Ñgyoozh. Tees mbecy nu tub lo zi'l coz blyuu Crisht caa ic yu, de yu ze' nac nuy Ñgyoozh Uz den gal nu I'ñ mi Jesuuz. 10Benu tub mbecy cyid yu lat der, ze' walab nu rlyuuy coz nu blyuu Crisht, orze' cue' niir nu chu'y nañ yu'. Ni cue' nii nur yu ñgyoozh. 11Gun cyu zi'l mbecy nu nii nuy mbecy ze' ñgyoozh, orze' gal gaa la nay nu mbecy nu shiñ ricy ze'. 12Yu' zañ coz nu rlagya̱ ne̱e̱ lo der, tees walagya̱ ne̱e̱ lo der lo gyicy. Ya̱ drish lo̱ nu gad mod nu yap güi̱i̱ der. Orze' ne̱e̱ du̱ de ru lo nu loo la, gun orze' nu blaazha' zir gyet lagy den. 13Ni' zi'l de i'ñ bily ru, de yu nu pcui Ñgyoozh nu gac nim, de yu ze' zeed dey ñgyoozh ni der.

will be added

X\