2 Corintios 9

1Walagy ñi nu zeeda̱ gyicy lo der nu nac gun nu rte' der nu cuic ru ni de bicy na nu nac Crisht, 2gun ya̱ rad lagya̱ nu rlagy der locyuub ru dey. Gun ya̱ byabica̱ gyel mbecy ni der lo de mbecy Macedonia. Mne̱e̱ nu de ru, mbecy Acaya, bi mnii der nu locyuub ru nese ña'n bded. Orze' nu nac nu dzi nap bicy der, briic der fers ni zigy de mbecy Macedonia, gun orze' ni' zi'l gyicy dey yu ze'. 3Orze' na ya̱ zuu neza̱ de bicy na nu nac Crisht ii, gun orze' cue' nu leew la gyabica̱ gyel mbecy ni der. Gun orze' zu lily der gal nu mne̱e̱ lor. 4Gun dzi ga cyid de mbecy Macedonia nu de̱ ya̱ ornu yapa̱ lo der. Orze' benu zac dey nu a̱' zu lily der, orze' mas de̱ ya̱ tona' la gat lo̱ de̱, gun dzi bicy cup de̱ consuel lo der. Ze' yegar de ru dzi zir gat lo der. 5Nde' nu ya̱ mnii to̱o̱ nu nap zir nu ne̱e̱ lo de bicy na nu nac Crisht nu cyid ga dey lo, gun orze' locyuub dey de ru nu laazh der nu te'r gun nu mniir nu cuic ru. Gun orze' bi yu' lily ñii ni der. Nañ gal nu na tub gun nu dub gusht la cuic der, walab nu rzi der cuic ru. 6Pcaa ic der de riidz ii: Mbecy nu rnuuz coz miiñ mbigy, orze' coz miiña' rte'y. Mbecy nu rnuuz sheñ mbigy, sheña' rte'y. 7Tub ga la mbecy rlagy ñi nu cuic yu ca na nu gruu nañ lardooy. Nunu cue' gzi dey nu cuic yu. Ni cue' por fers la cuic yu. Gun Ñgyoozh yet lagy mi mbecy nu dub gal rii la lagy yu rbic yu nim. 8Nunu Ñgyoozh gac cuic za' lam de lo la coz nap nim ni der, gun orze' dub laa tiem gad coz nu cyiiñ ni der, nunu grusuba' lañ par nu gyicy nu der ñii de lo la riiñ nap. 9Gun lat de riidz ni Ñgyoozh rniiñ: Mbecy nap dub gal rii la lagy yu rbic yu ni mbecy zi. Nunu riiñ nap nu ricy yu, nde' gzuñ tub la, rniiñ. 10Ñgyoozh rbic mi de mbigy nu rnuuz mbecy. Nunu rbic mi coz nu gow dey. Orze' na de ru na der gal nu na mbecy nu rnuuz la coz nu nac gun nu rbic ru. Ñgyoozh cuic mi de mbigy nu galagy ñi nu nuuz der. Nunu gyicy mi nu galy ñi ni der. Nunu cuic mi tub cosech sheñ ni der nu nac nu sheñ tiñ cuic der nim. 11Ñgyoozh cuic mi sheñ ni der, gun orze' gad mod nu cuic der sheñ de tir la nu cuic der. Gun orze' zigy mbecy cuic dey gras ni Ñgyoozh nu nac gun nu zeed der ya̱a̱ de̱ ya̱. 12Gun ornu zeed der gun lo de bicy na nu nac Crisht, walab tub lo zi'l nu cuic ru coz nu cyiiñ ni mbecy nu ricy falt ñi ni, sinu ni' zi'l gyicy der nu zigy mbecy cuic yu gras ni Ñgyoozh nu nac gun nu zeed der. 13Orze' de yu ze' gyabic dey gyel mbecy ni Ñgyoozh, gun de coz nap nu gyicy der gyicy ñi nu gabe nu de ru rzuub gyidag der ni de riidz nu sac ni Crisht. Orze' ni' zi'l de yu ze' ca lagy dey lo Ñgyoozh nu nac de tiñ sheñ nu briic der ni dey gal nu ni dela mbecy. 14Orze' tona' la gyet lagy de yu ze' nii nu dey Ñgyoozh nu nac de ru, gun mi ze' tona' la nap bicy num der. 15¡Orze' rlagy ñi nu gric den gras ni Ñgyoozh! ¡Ni waca' la niin nu tanta' coz ily rbic mi ni den!

will be added

X\