2 Corintios 8

1Na der bicy na, rlagya̱ nu gad lagy der la coz guc lat de mbecy ni Crisht nu yu' de gyedz ni Macedonia nu nac nu Ñgyoozh nap bicy num dey. 2Mas tona' la deet bzac dey nu nac de preb, tees tona' la nap zu lagy dey. Nunu mas tona' la gyel zi zu dey, tees wansi laa dey briic yu gun. Bicy dey gal nu ricy mbecy guani'ñ. 3Ya̱ rishli rne̱e̱ lo der nu dub gal rii la lagy dey briic yu ca na la nu gac cuic yu. Nunu sheñ zir briic dey par nu tanta' bloo lo dey. 4Nunu tona' la mnishbaa dey lo de̱ nu grica̱ rishbeey nu locyuub dey de' zir yu nu rbic gun ni de mbecy ni Ñgyoozh. 5Nap zir bicy dey par mod nu brish lo̱ lo dey. Nu loga la briic dey ub yu par nu gyicy yu de coz nu rlagy Shuaan den Jesuuz. Nu cyup briic dey ub yu par nu gyicy yu de coz nu rlagy de̱ ya̱. Ni bicy dey gun nde' coz nu rlagy Ñgyoozh. 6Nde' nu bdu̱' de̱ riiñ yaa Tito nu te'y gun ze' lat de ru, gun nu rbic der nu nac nu dzi rcar losa'r, como laab Tito, yu ze' yu nu bzuub gyi' riiñ ze'. 7Gun de ru nap ricy der nu dela coz nu ricy ru. Nap ricy cup der consuel lo Crisht. Nap rshaal der de riidz nim. Nap rad lagy der de coz nim. Dub gal rii la lagy der ricy ru riiñ nim. Nunu nap rca der de̱ ya̱. Orze' ni' zi'l rlagy ñi nu nap gyicy der riiñ ni gun ze' nu nac nu rca der losa'r. 8Walab nu ricya̱ mandaar lo der nu ni gyicy ru. Nomaas nu ya̱ rlagya̱ rlyu̱u̱ ni der de mod nap nu ricy de' zir mbecy, gun orze' rica̱ tub mod nu gyicy der nu gabe nu rishli rca der losa'r. 9Gun de ru rad lagy der de coz nap nu bicy Shuaan den Jesucrisht. Mi ze' guani'ñ mi nu nac de coz ni Ñgyoozh, tees byac mi mbecy zi nu nac de ru. Gun nu nac nu byac mi mbecy zi, orze' de ru byaguani'ñ der nu nac de coz ni Ñgyoozh. 10Orze' na rica̱ consef ni der nu nac gun ze'. Ña'n bded de ru mbecy loga la nu pte' de gun ze'. Tees walab nu tub lo zi'l nu de ru nac der mbecy loga nu briic, sinu ni' zi'l nu dub gusht la briic der ñii. 11Orze' na bza' lo der riiñ nu bzuub der gyi' ze' dub gal nu gac ni der. Nunu dub gusht la bza' lo der ñii gal nu bicy der nu loga la ornu mnii too der nu gyicy ruñ. 12Gun benu tub mbecy rishli gaal rlagy yu cuic yu tub gun, orze' Ñgyoozh “O” niim gyash mi ñii dub gal nu gac cuic yu. Gun Ñgyoozh rniim nu cuic der coz nu yu' nir, walab nu rniim nu cuic der de coz nu sac nir. 13Walab nu rlagya̱ nu nu zac zi der par nu cuic der coz nu cyiiñ ni reña' mbecy. 14Sinu rlagya̱ nu gal gaa la chu' nu der de' zir mbecy. Na na la ricy cup der coz nu ricy falt ni dey. Orze' gac locyuub der dey. Ze' ornu ruu su tuuba' tir, orze' de yu ze' gyicy cup dey coz nu gyicy falt ni de ru. Orze' gac locyuub dey de ru. Orze' benu locyuub der losa'r, orze' tub zi'l mod zu der nu de yu ze'. 15Gun i mod za de riidz ni Ñgyoozh: Mbecy nu pte' sheñ, wanrusub sheñ niy. Nunu mbecy nu pte' ñumiiñ, wangyicy falt ñi niy. Ni rniiñ lat de riidz ni Ñgyoozh. 16Ya̱ drica̱ gras ni Ñgyoozh, gun bicy mi nu ca ic Tito de ru gal nu ya̱ ca ica̱ der. 17Gun walab nu tub lo zi'l nu bet lagy yu ornu bdu̱' riiñ yaay nu cyid güiiy de ru, sinu ni' zi'l bi bruu lardooy nu cha güiiy der, como nil ca ic yu de ru. 18Nunu gzuu nez de̱ Tito tublaazh la nu tub mbecy nu nap yu' lo dela mbecy ni Crisht nu nac de riiñ nu bicy yu nu ptush las yu de riidz nu sac ni Crisht. 19Nunu yu ze' tub mbecy nu pcui dela de mbecy ni Crisht nu cha nuy de̱ ya̱ byaj ornu cha zeeña̱ de gun ze'. Gun orze' nu nac nde' ca lagy mbecy lo Shuaan den Jesuuz, nunu gabe nu yet lagy den nu rlocyuub na losa'n. 20De̱ ya̱ rlagy de̱ yub de̱ tub mod nu cue' nii zi mbecy ne̱ de̱ nu nac mod nu rte̱' de̱ de gun zañ ze'. 21Gun ryub de̱ mod nu nap, walab tub lo zi'l par lo Shuaan na Jesuuz, sinu ni' zi'l par lo de mbecy. 22Nunu tublaazh la zuu neza̱ de yu ze' nu tuuba' bicy na nu nac Crisht. Bicy de̱ preb yu zañ tir, nunu zañ mod bicy yu nu rabee nu nac yu mbecy nu zu fert. Nunu fert zir zuy nu nac nu tona' la ricy cup yu consuel lo der. 23Ze' benu grusu tub mbecy nu cugyi' Tito, ben cyu nac yu, orze' mnii loy nu yu ze' losa̱'. Ricy nuy ya̱ riiñ ornu ricy de̱ coz nu cyiiñ par de ru. Ze' benu grusu tuuba'y nu cugyi' cyu nac de' zir de bicy na ze', orze' mnii lo dey nu de yu ze' mbecy nu bzuu nez de mbecy ni Crisht. Nunu ca lagy mbecy lo Crisht nu nac de yu ze'. 24Orze' gyicy der tub mod nu gad lagy de mbecy ni Crisht nu rishli rca der de yu ze'. Orze' gad lagy dey nu nap ricy de̱ ornu driib zily de̱ de ru.

will be added

X\