2 Corintios 7

1Orze' der bicy na, como Ñgyoozh bi mniim zañ riidz nu segur la gyicy mi, nde' nu rlagy ñi nu chu' den nu gyel cacy. Rlagy ñi nu ruu chu den lo de coz nu gyicy ñi nu gabag cuerp nin nunu tant espiriit nin. Nunu rlagy ñi nu zu chu den ub na par nu gyicy na coz nu rlagy Ñgyoozh zi'l nu nac nu rca lagy den lom. 2¡“O” mnii der ne̱ de̱ nañ lardoor! Gun rila wangyicy de̱ coz a̱' nap nu ni tub la mbecy. Ni wangyicy de̱ nu gat lo ni tub la mbecy. Ni wanguu de̱ ni tub la mbecy. 3Walab nu ni rne̱e̱ lo der nu riiba̱ cyi ic der. Gun tona' la rca̱ de̱ ru. Nde' nu rlagya̱ cyiiña̱ tublaazh nu de ru, nunu ornu gat de ru, orze' ni' zi'l rlagya̱ gata̱ tublaazh nu de ru. 4Ya̱ tona' la ricy cupa̱ consuel lo der, nunu yet lagya̱ nu nac der. Lat dela gyel deet nu rzac de̱, ya̱ ricy cupa̱ baloor nunu dub gal rii la lagya̱ yet lagya̱. 5Nese lat nu bri̱ de̱ lo de yu ni Macedonia, rila wangad nu zu lagy de̱, sinu dela lugaar nu gua̱ de̱ yu' gyel deet. Yu' rucoo nu mbecy de̱ ya̱ dela ze' nu rdeda̱. Orze' yu' rdzib de̱ nañ lardo̱o̱. 6Tees Ñgyoozh, biñ nu rbic baloor ni mbecy nu a̱' ricy cup baloor, mi ze' briic mi baloor ne̱ de̱ nu nac nu biid Tito lo de̱. 7Nunu walab nu briic de̱ baloor nu nac nu bri zi'l yu lo̱ de̱, sinu ni' zi'l nu nac de coz nu mniiy lo̱. Mniiy nu tona' la briic der baloor niy. Nunu mniiy lo̱ nu tona' la rlagy der nu zac ru de̱ ya̱. Nunu mniiy nu ricy shni der nu nac de̱, nunu rsug ic der nu nac de̱. Nunu nu nac de nu nde' yet zir lagy de̱ na. 8Mas gyicy nu bzeeda̱ lo der bicy ñi nu bicy shni der, tees ya̱ yet lagya̱ nu bzeeda̱ ñii lo der. Gun ya̱ anzir wangyet lagya̱ nu bzeeda̱ ñii lo der, tees na yet lagya̱. Wangyet lagya̱, gun gud lagya̱ nu bicy shni der. Tees tub miiñ zi'l bicy shni der. 9Tees na dzi yet lagya̱. Walab nu yet lagya̱ nu bicya̱ nu bicy shni der, sinu yet lagya̱, gun mne' der dela cyir ornu bicy shni der. Gun de ru bicy shnir gal mod nu rlagy Ñgyoozh. Nde' nu walab nu shiñ bicy du̱ de̱ der. 10Gun benu tub mbecy gyicy shniy gal mod nu rlagy Ñgyoozh, orze' nde' ricy ñi nu dza mod nu gyicy yu. Nunu nde' gyicy ñi nu gruu mbañ yu. Orze' walagy ñi nu gyicy shni zir yu. Tees benu mbecy gyicy shniy, tees benu walab gal mod nu rlagy Ñgyoozh, orze' nde' gyicy ñi nu gat yu par lo Ñgyoozh. 11¡Tees de ru bicy shnir gal mod nu rlagy Ñgyoozh! Orze' na güii la guc. Nu nac nu bicy shni der nap gush der shcab nu nac asunt ze'. Nunu bzu fert der nu mnii der nu sac falt nir. Bicy ñi nu pcha' ic der. Nunu bicy ñi nu gudzib der. Orze' despuees ngulagy der nzac ru ya̱. Nunu nde' bicy ñi nu briic der cashtig ni mbecy nu shiñ bicy ze'. Nu nac de nu nde' bicy ñi nu rabee nu rila sac falt ni der nu nac asunt ze'. 12Orze' ornu bzeeda̱ gyicy ze' lo der, nde' walab par nu nac yu nu shiñ bicy, ni walab par nu nac de yu nu gutow ni. Sinu bzeeda̱ gyicy ze' lo der par nu gyicya̱ nu gabe par lo Ñgyoozh nu dzi rzu bich der nu nac de̱ ya̱. 13Nu nac nde' guud baloor ne̱ de̱. Nunu walab nu briic zi'l ñi baloor ne̱ de̱ ya̱, sinu ni' zi'l bet lagy de̱ nu nac nu bzaac de̱ nu ni' zi'l Tito bet lagy yu, gun dela der bicy ru nu guti ri añ niy. 14Gun ya̱ byabica̱ gyel mbecy ni der lo Tito. Nunu de ru wangyicy der nu gruu gyel mbecy ne̱ ya̱. Gal nu rishli rne̱e̱ de̱ lo der, ni' zi'l rishli rne̱e̱ de̱ lo Tito ornu byabica̱ gyel mbecy ni der. 15Nunu yu ze' dzi zir rcay de ru, ornu yeza' lagy yu nu dela der rzuub gyidag ru niy, nunu nap bicy nu der yu ornu biid yu lor. 16¡Orze' tona' la yet lagya̱ nu gac gyicy cup za' la̱ consuel lo der!

will be added

X\