2 Corintios 6

1Orze' como tublaazh la ricy den riiñ ni Ñgyoozh, de̱ ya̱ rnishba̱a̱ de̱ lo der nu cue' zaan der nu leew la nap gyicy nu Ñgyoozh der. 2Gun lat de riidz nim nam: Tiem nu rlagy ñi zuub gyidaga̱ ni der. Nunu dzi nu gruu mbañ der, ya̱ locyuuba̱ der, nam. Na na la, tiem nu bzat mi ze'. ¡Dzi na la dzi nu gruu mbañ der ze'! 3Wagyicy de̱ ni tub la coz nu gyicy ñi nu gadza mbecy, gun orze' cue' nu gnii zi mbecy ni riiñ nu ricy de̱, 4sinu gyicy de̱ tub mod par nu gabe nu nac de̱ mbecy nu ricy coz nu rlagy Ñgyoozh. Gun ornu rzac zi̱ de̱, nu pase̱z ragye̱e̱ de̱. Ornu ricy falt la coz ne̱ de̱, orze' ragye̱e̱ de̱. Ornu deet rac, orze' ni' zi'l ragye̱e̱ de̱. 5Ornu rgaaz dey de̱ ya̱, orze' ragye̱e̱ de̱. Ornu yet lag de̱ nañ yu' gyiib, orze' ragye̱e̱ de̱. Ornu ryach mbecy, orze' ragye̱e̱ de̱. Ornu fers ricy de̱ riiñ, orze' ragye̱e̱ de̱. Ornu rach pcaal de̱, orze' ragye̱e̱ de̱. Ornu ran de̱, orze' ragye̱e̱ de̱. 6Ricy de̱ nu gabe nu nac de̱ mbecy nu ricy coz nu rlagy Ñgyoozh nu nac de coz nu ricy de̱. Rded de̱ nu gyel cacy. Nap yet lag de̱ cuen de coz rishli ni Ñgyoozh. Ricy cup de̱ pase̱z nu losa̱'. Yet lagy de̱ losa̱'. Nac du̱ de̱ Espiriit Yon ni Ñgyoozh. Nunu rishli rca̱ de̱ losa̱'. 7Rshaal de̱ de riidz rishli ni Ñgyoozh. Nunu Ñgyoozh coz ily ricy mi nu nac de̱ ya̱. Nu nac nu byanap de̱ par lo Ñgyoozh, cyiiñ de̱ nu chuco̱o̱ nu de losa' yuum. Gac shet ya̱a̱ de̱ yu. Nunu gac ca̱ de̱ uba̱. 8Yu' nu rca lagy mbecy lo de̱. Ze' yu' ga' nu rgüii tañ dey lo de̱. Yu' nu nap rnii dey nu nac de̱. Ze' yu' ga' nu shiñ rnii dey nu nac de̱. Ricy dey de̱ ya̱ par mbecy rguu, mas rne̱e̱ de̱ coz rishli. 9Mas nap yu' lo dey de̱ ya̱, tees ricy dey de̱ ya̱ par mbecy nu a̱' yu' lo dey. Mas bi yu' de̱ nu gata̱, tees gabee mbañ de̱. Mas rbic dey cashtig ne̱ de̱, tees wacut dey de̱ ya̱. 10Rlyu nu ricy shni de̱, tees dub laa tiem nap zu lagy de̱. Rlyu nu gyel zi zu̱ de̱, tees ricy de̱ nu yaguani'ñ zig mbecy nu nac coz ni Ñgyoozh. Rlyu nu saca' la coz ne̱ de̱, tees ricy cup de̱ dela coz nu ricy ñi presis. 11Orze' de ru bicy na nu yu' Corinto, de̱ ya̱ naal la mne̱e̱ lo der. Pshaal de̱ dela coz nu yu' nañ lardo̱o̱ lo der. 12Rila wagyicy zet lagy de̱ lo der, sinu de ru ricy zet lagy der lo̱ de̱ ya̱. 13Orze' ya̱ rne̱e̱ lo der gal nu rnii tub mbecy nuy i'ñ yu. “O” nii der ne̱ de̱ ya̱, gal nu de̱ ya̱ “O” ne̱e̱ de̱ ni de ru. 14Cue' gyicy losa' der mbecy nu wayicy cup consuel lo Crisht. Gun mbecy nu nap ricy, wac gac losa'y mbecy nu shiñ ricy. Nunu tub ze' nu yu' yaa wac gac losa'ñ ze' nu cow. 15Gun Crisht walab tub zi'l shcab ricy cup mi nu nuras. Ni' zi'l de mbecy nu ricy cup consuel lom reña' na shcab ricy cup yu par mbecy nu a̱' ricy cup consuel lom. 16Nunu yu' wedz ni Ñgyoozh wangyap ñi nu gyicy cup ñi nab. Gun de ub na nac naa yu' wedz ni Ñgyoozh, biñ nu rbic gyel mbañ. Gal nu ub mi mniim: Ya̱ zu̱ lat dey, nunu chesa̱ du̱ dey. Ya̱ naca̱ Ñgyoozh ni dey. Nunu de yu ze' gac dey mbecy ne̱. 17Orze' bruu der lat mbecy cyi, nunu bruu chu der lat dey, na Ñgyoozh, Shuaan den. Cue' gyicy cuen der cushtom ni mbecy cyi. Orze' ya shet ica̱ nu gyecha' der lo̱. 18Nunu ya̱ gaca̱ uz der. Ze' de ru gac der i'ñ gyeeya̱ nu i'ñ fiñ mña̱a̱. Ni na Ñgyoozh Shuaan den, biñ nu gac gyicy dela coz.

will be added

X\