2 Corintios 5

1Gun cuerp ni de ub na gyishlombecy ii nañ gal nu na tub yu' negy. Wazu tuuñ ñi. Orze' dudily ñi. Tees rad lagy na nu benu nit lo yu' negy ze', orze' se la la nde', gun Ñgyoozh bi bzu lily mi tuuba' yu' gyibaa nu wanit lo nu cuic mi ni den. Nunu yu' ze' walab nu yaa mbecy byaañ. 2Nde' nu lat nu rcyiiñ na nañ yu' negy ze', orze' ric la añ nin nu gad yu' nu zub gyibaa, ze' nu cyiiñ den nañ ñi. 3Gun yu' nu zub gyibaa, nde' cuerp nu cuic Ñgyoozh ni den par lo. Nde' nañ gal nu na tub negy nu gzun, gun orze' cue' nu gyid yaagy la den chesan nu nac nu sac cuerp ni den. 4Lat nu rcyiiñ den nu cuerp nin gyishlombecy ii, orze' gyi la ryeed añ ni den nu deet rac nañ lardoon. Orze' walab nu rlagy den nu chesan nu sac cuerp nin, sinu rlagy den nu gzun tuuba' cuerp nu gad ni den gyibaa, gun orze' gad gyel mbañ ni cuerp nu gat ni den. Orze' nde' rila wata'ñ. 5Ñgyoozh nac mi biñ nu bzu lily de ub na par de nu nde'. Nunu briic mi Espiriit Yon nim ni den par nu gabe nu gad de nu nde' nin. 6Nde' nu dub laa tiem rzu fert den. Gun rad lagy den nu lat nu rcyiiñ na nañ cuerp ni gyishlombecy ii, orze' walab nu rcyiiñ den lo Shuaan na. 7Nde' walab coz nu zac den na na la, sinu nde' gad lagy den nu nac nu zeña lagy na de riidz nim. 8Nde' nu na rzu fert den, nunu yet zir lagy den benu gat na, gun orze' gruun nañ cuerp ii. Orze' gyan cyiiñ dun Shuaan na Jesuuz. 9Nde' nu dub laa tiem rzu bich den nu nac coz nu yet lagy Shuaan na. Ni gyicy den mas gabee rcyiiñ den nañ cuerp nin, o mas nu saca'n. 10Gun dela den rlagy ñi gyecha'n lo Crisht par nu gri beem ni den, gun orze' tub ga la den gad coz nu yad ñi nu gad nin dub gal nu na coz nu bicy den lat nu pcyiiñ den nañ cuerp nin: benu bicy den coz nap o coz a̱' nap. 11Orze' como rad lagy de̱ nu rca lagya̱ lo Shuaan na, nde' nu ricy pe̱e̱ de̱ nu rcuugya̱ nañ lardoo de mbecy. Ñgyoozh nap yu' lom de̱ ya̱, nunu drish lo̱ de̱ nu ni' zi'l de ru nap yu' lo der de̱ ya̱. 12Walab nu ryabic de̱ gyel mbecy ne̱ de̱ tuuba' tir, sinu dric de̱ lugaar nu gyet lagy der nu nac de̱, gun orze' gad mod nu tush cya der riidz nu rnii de mbecy nu rcui. Gun de yu ze' rgüiiy la na losa'y par ich yu, par wagyicy cuen la dey la nay nañ lardooy. 13Tees benu de̱ ya̱ naca̱ mbecy ton, nde' par Ñgyoozh. Nunu benu walab, orze' nde' par de ru. 14Orze' la zi'l coz nu ricy de̱, nde' nu nac nu Crisht rcam de̱ ya̱. Gun na bi gud lagy de̱ nu tub zi Crisht gut mi lugaar ni dela mbecy. Orze' nde' nañ gal nu na nu gut dela mbecy. 15Nunu Crisht gut mi par dela mbecy, gun orze' de mbecy nu gabee mbañ, cue' ga' cyiiñ dey par nu nac coz nu rlagy ub yu, sinu cyiiñ dey par Crisht, biñ nu gut nunu biñ nu byabañ nu nac dey. 16Nde' nu warush den shcab ben la na tub mbecy mod ni gyishlombecy ii. Mas gulas mnii too den nu nac Crisht mod ni gyishlombecy, tees na walaba' nu ni mod ricy den. 17Gun benu tub mbecy nac nuy Crisht, orze' byac yu tub mbecy cub. Orze' dela mod nu nay gulas, bi bded niñ. Mod nu nay na, nde' tub mod cub. 18Dela nde' coz nu bicy Ñgyoozh. Coz nu bicy mi ze' bicy ñi nu byanap riidz ni den dun mi nu nac Crisht. Nunu bdu'm riiñ yaa den nu locyuub na de mbecy nu gyanap riidz ni dey nuy mi. 19Mod nu rne̱e̱, nde' nu Ñgyoozh ricy mi nu gyanap riidz ni de mbecy gyishlombecy nuy mi nu nac Crisht. Mi ze' wariib cuena'm de cyi nu ricy dey. Nunu bdu'm riiñ yaa den nu shaala̱ de riidz ze' nim lo de mbecy. 20Orze' de̱ ya̱ naca̱ mbecy nu bzuu nez Crisht nu cha̱ por cuen nim. Nañ gal nu na nu Ñgyoozh rniim lo der nu nac de̱ ya̱. Nde' nu rnishba̱a̱ de̱ lo der nu gyanap riidz nir nur mi ze'. 21Gun Crisht rila wangyicy mi ni tub cyi. Tees par nu nac de ub na, Ñgyoozh bicy mim par tub mbecy cyi. Gun orze' nu nac mi ze', gyacaacy den lo Ñgyoozh.

will be added

X\