2 Corintios 4

1Nde' nu de̱ ya̱ wanshi'ñ de̱ baloor. Gun Ñgyoozh bdu'm riiñ nim ya̱a̱ de̱ nu nac nu gushni lagy mi de̱. 2Nde' nu rzu chu̱ de̱ de coz to' lo nu ricy de̱ ngach. Nunu wachesa̱ de̱ nu gyel rguu. Ni wagne̱e̱ de̱ nu de riidz ni Ñgyoozh nde' walab coz rishli, sinu rne̱e̱ de̱ du uub la mod nu rishli. Nunu nu mod ze' gric de̱ nu gad lagy de mbecy nañ lardooy nu nap ricy de̱ par lo Ñgyoozh. 3Nunu benu noow rshaal de̱ de riidz nu rbic gyel mbañ rlyu, orze' noow zañ par de mbecy nu dune' zi'l. 4Gun nuras, yu nu nac ñgyoozh ni gyishlombecy ii, bicy yu nu byoow nañ shcab de mbecy nu wagyicy cup consuel, gun orze' cue' gyet lag dey cuen de riidz nu sac nim, de riidz nu rzat gyel lily ni Crisht. Nunu mi ze' rbic mi nu gad lagy den la na Ñgyoozh, nu nac mod nu na ub mi. 5Ornu rshaal de̱ de riidz ni Ñgyoozh, walab nu rzat de̱ uba̱, sinu rne̱e̱ de̱ nu Jesucrisht nac mi Shuaan den. Nunu rne̱e̱ de̱ nu de̱ ya̱ naca̱ mbecy nu ricy coz nu rlagy ñi ni de ru nu nac Jesuuz. Nde' zi'l riiñ nu ricy de̱. 6Nunu laab Ñgyoozh, biñ nu psa' lagy yaa lugaar ze' nu cow, mi ze' bzeed mi yaa nañ lardo̱o̱ de̱, gun orze' gad lagy de̱ la na gyel lily nim nu gruu lo Jesucrisht. 7Tees gyel nap ni Ñgyoozh nu ricy cup de̱ nañ cuerp ne̱, nde' nañ gal nu na tub gyel nap nu bdu' choow mbecy nañ tub gyis yu, gun orze' gabe nu tona' la coz ily druu lo Ñgyoozh. Walab nu druuñ lo de̱ ya̱. 8Mas cya' la rzac de̱ coz deet, tees walab nu nit loñ de̱. Yu' nu dzi drush de̱ shcab, tees waglazh la consuel ne̱ de̱. 9Yu' tiem nu rzab mbecy ich de̱, tees Ñgyoozh wacsaan yaam de̱. Yu' nu shiñ ricy nu mbecy de̱, tees wagnit lo̱ de̱. 10Ca zi'l lugaar nu rded de̱, dub laa tiem zu̱ de̱ lo rishdzidz nu gat de̱ gal nu bzac Jesuuz, gun orze' rabee nu Jesuuz mbañ mi nu nac de̱ ya̱. 11Gun lat nu gabee mbañ de̱ ya̱, dub laa tiem rded de̱ lo rishdzidz nu gat de̱ nu nac Jesuuz, gun orze' nu nac de̱ ya̱ mbecy nu ca lo cuen nu gat, rabee nu Jesuuz zum. 12Ni mod rded de̱ ya̱ lo rishdzidz nu gata̱. Ze' de ru gad nu cui mbañ der. 13Nunu rshaal de̱ de riidz ni Ñgyoozh, gun ricy cup de̱ consuel lom, gal nu rniiñ lat de riidz nim. Orze' rniiñ: “Ya̱ bicy cupa̱ consuel, nunu nu nac nde' mne̱e̱”, rniiñ. 14Gun rad lagy de̱ nu Ñgyoozh, biñ nu bicy nu byabañ Shuaan den Jesuuz, ni' zi'l gyicy mi nu gyabañ de̱ ya̱ nu Jesuuz. Nunu gyicy mi nu tublaazh la gyecha̱' de̱ gal nu de ru lom. 15Orze' dela coz nu rzac de̱, nde' par de ru, gun orze' dub gal nu nap ricy nu Ñgyoozh mbecy, orze' ni' yu' mbecy nu cuic yu gras nim, gun orze' rabee nu dzi zily nac mi. 16Nde' nu washi'ñ de̱ baloor. Gun mas cuerp ne̱ de̱ dzach ded niñ, tees tub dzi ga gyafert zir de̱ nañ lardo̱o̱. 17Coz nu rzac zi̱ de̱ gyishlombecy ii na, nii walab coz nu dzi biigy. Nunu dzach ded niñ. Tees nu nac nu rzac zi̱ de̱, nde' nu gad gyel lily ne̱ de̱ nu rila walazh. Nunu gyel lily nu gad ne̱ de̱, nde' tona' la coz ily par de coz nu rzac zi̱ de̱. 18Gun wagyicy cuen de̱ de coz nu rzac urlo de̱ gyishlombecy ii, sinu ca lo̱ de̱ lo de coz nu wacsaca̱. Gun coz nu rzac de̱, nde' coz nu ded ni. Tees coz nu wasac de̱, nde' coz nu gzu tub la.

will be added

X\