2 Corintios 3

1Ornu ni rne̱e̱ de̱, ¿a rlyu nu tuuba' tir brugyi' nu ryabic de̱ gyel mbecy ni uba̱? ¿Walab gaal rlagy ñi nu rlyu̱u̱ de̱ tub gyicy lo der nu rniiñ cyu nac de̱, gal nu ricy la be mbecy? ¿O walab gaal rlagy ñi nu cuic der gyicy nu rnii cyu nac de̱ nu lyu̱u̱ lo reña' mbecy? 2Walagy ñi nu ni, gun de ru na der gal nu na tub gyicy nu rniiñ cyu nac de̱ ya̱. De ru na der gal nu na tub gyicy nu bi ca nañ lardo̱o̱ de̱. Orze' dela mbecy gac gad lagy dey coz nu rnii gyicy ze', nunu gac sya' dey ñi. 3Nunu rabee nu laab Crisht pcaam lo gyicy ze', nunu bzeed mi ñii nu nac de̱ ya̱. Nunu wancaam lo gyicy ze' nu tint, sinu pcaam looñ nu nac Espiriit Yon ni Ñgyoozh, tub biñ nu mbañ. Nunu wancañ lo tub gyita' she, sinu gyicy ze' cañ nañ lardoo mbecy. 4Orze' segur la rad lagy de̱ de nu nde', gun ricy cup de̱ consuel lo Ñgyoozh nu nac Crisht. 5Gun walab nu nil cyiiñ de̱ nu gyicya̱ la coz, sinu benu gac gyicy de̱ ñii, orze' Ñgyoozh bicy mi nu gac gyicy de̱ ñii. 6Mi ze' bicy mi nu cyiiñ de̱ gyicya̱ de riiñ ni tub trat cub. Nde' walab trat nu ca lo gyicy. Sinu nde' trat nu bruu lo Espiriit Yon ni Ñgyoozh. Gun trat ni leey nu ca lo gyicy, nde' rniiñ nu rlagy ñi nu gat den. Tees Espiriit Yon ni Ñgyoozh rbic mi gyel mbañ ni den. 7Leey ni Moisees pcañ nu letr lo gyita'. Nunu bruu zac gyel lily ni Ñgyoozh, ornu briic mi ñii. Orze' de mbecy Israeel wangagyee dey nu ngüiiy lo Moisees par nu tona' la byaryal loy, mas nu ryal ze' byagash yaa niñ. Tees benu rabee gyel lily ni Ñgyoozh ornu bruu zac leey nu rniiñ nu rlagy ñi nu gat na, 8¡dzi zir rabee gyel lily nim nu nac nu gusu tub trat cub nu riib ic Espiriit Yon nim! 9Gun benu rabee gyel lily nim ornu bruu zac leey nu rñii nu rlagy ñi nu gat na, ¡orze' dzi zir nap rabee gyel lily nim nu nac tub trat nu rniiñ lac mod gyanap mbecy lom! 10Gun gyel lily ni Ñgyoozh nu bruu zac gulas wasaap ñi gyel lily nim nu rabee tiem na. 11Benu bruu zac gyel lily ni Ñgyoozh ornu biid leey ni Moisees, tub leey nu bi bded ni, orze' dzi zir nap rabee gyel lily nim na nu nac nu zu tub trat cub, tub trat nu zu par tub la. 12Par nu nac nu drish lo̱ de̱ lo trat cub ze', wacchib la de̱ rne̱e̱. 13Wagyicy de̱ gal nu bicy Moisees. Gun yu ze' psoow yu loy par nu cue' zac de mbecy Israeel nu gyu nu ryal nu ca loy. 14Tees gal nu byoow lo Moisees, ni' zi'l byoow nañ shcab ni de mbecy Israeel. Nunu mas gashtal dzi na noow nañ shcab ni dey lat nu rsya' dey de gyicy ni trat gush. Gun tub zi la nu “O” nii mbecy ni Crisht, orze' gyal nañ shcab niy. 15Mas gashtal dzi na noow nañ shcab ni dey ornu rsya' dey de riidz ni Moisees. 16Tees ornu tub mbecy “O” niiy ni Crisht, orze' gyal nañ shcab niy. 17Gun Shuaan den, Jesucrisht, mi ze' nac mi Espiriit ni Ñgyoozh. Nunu ze' nu rcyiiñ Espiriit ni Shuaan den Jesucrisht, ze' sac reña' shuaan den. 18Nde' nu dela den saca' negy nu rsoow lon. Na den gal nu na tub guan nu rlyuu gyel lily ni Shuaan na Jesucrisht. Nunu gac den gal nu na ub mi. Orze' tub dzi ga rabee zir gyel lily nim loon. De nde' coz nu ricy Shuaan den Jesucrisht, biñ nu nac Espiriit ni Ñgyoozh.

will be added

X\