2 Corintios 2

1Nde' nu ya̱ bdu' ica̱ nu wayap güi̱i̱ de ru nis gyicya̱ nu gyicy shni der. 2Gun benu ya̱ gyicya̱ nu gyicy shni der, orze' ¿ca grusu mbecy nu gyicy yu nu gyet lagya̱? Gun ¿a walab de ru nde'? Como laab de ru mbecy nu gyicy shni nu nac coz nu gyicya̱. 3Nde' nu ni mod pca̱a̱ lo gyicy nu zeeda̱ lo der, gun cue' nu gyicy der nu gyicy shni̱ ornu yapa̱ lat der. Gun de ru lagy ñi nu gyicy der nu gyet lagya̱. Gun ya̱ rad lagya̱ nu segur la gal nu ya̱ gyet lagya̱, ni' zi'l gyeta' lagy de ru. 4Tees ornu pca̱a̱ gyicy ii nu zeeda̱ lo der, tona' la guc deet nañ lardo̱o̱, nunu gashtal nis urlo̱ pca̱a̱ ñii. Tees pca̱a̱ ñii walab par nu gyicya̱ nu gyicy shni der, sinu par nu drica̱ nu gad lagy der nu ya̱ tona' la rca̱ de ru. 5Benu ca na tub mbecy bicy yu nu bicy shni losa'y, walab ya̱ zi'l bicy yu nu bicy shni̱, sinu bicy yu nu bicy shni dela de ru ñuu ga. “Ñuu ga” rne̱e̱ par nu cue' gyicy zilya̱ de coz ze'. 6Orze' lo dela de ru bded cyaal der briic der cashtig ni mbecy ze'. Orze' beñ bee ni zi'l. 7Orze' na rlagy ñi nu gyicy sulagy der niy, nunu cuic der baloor niy, gun orze' cue' ga' gyicy shniy. Gun nis laa yaay de coz ni Crisht. 8Nde' nu ya̱ rnishba̱a̱ lo der nu cuic der nu gad lagy yu nu rca der yu tuuba' tir. 9Gun anzir bzeeda̱ gyicy ze' lo der nu nac de coz ze', par nu gyicya̱ preb der ben a wazuub gyidag der de riidz nu ne̱e̱. 10Na ornu de ru gyicy sulagy der ni mbecy nu nac coz nu bicy yu, orze' ni' ya̱ gyicy sulagya̱ niy. Nunu benu yu' cyi nu gyicy sulagya̱, orze' gyicy sulagya̱ ñii nu nac de ru par lo Crisht, 11gun orze' nuras wagyicy yu gan de ub na, gun bi neñ na la na may nu ricy cup yu. 12Na ornu bri̱ gyedz nu la Troas par nu shaala̱ de riidz ni Crisht lo de mbecy nu yu' gyedz ze', orze' Shuaan den tona' la blocyuub mi ya̱ nu guud tub mod nu bicya̱ riiñ nim. 13Tees rila wanganap lagya̱ par nu wancheela̱ biicy na Tito. Nde' nu mne̱e̱ du̱ dey ñgyoozh. Orze' bru̱u̱ lugaar ze' gua̱ par lo de yu ni Macedonia. 14Gric den gras ni Ñgyoozh, gun ricy mi nu gyicy den gan nu nac Crisht. Orze' de ub na dric na nu gad lagy de mbecy de coz nim. De coz ze' nañ gal nu na tub coz zguul nu tush las den. 15Nunu laab de ub na na den gal nu na tub dzeeñ zguul ni yaal nu rbic Crisht par lo Ñgyoozh. Orze' nu zguul ti' ze' zaab ti'ñ lat de mbecy nu gruu mbañ, gal nu lat de mbecy nu nit lo. 16Par de mbecy nu dune', ti' zguul ze' gyicy ñi nu gad lagy yu nu gat yu. Ze' par de yu nu gruu mbañ, nu zguul ze' gyicy ñi nu gad lagy dey nu cui mbañ yu. Orze' ¿ca na mbecy nu cyiiñ yu gyicy yu riiñ ni Ñgyoozh? 17De̱ ya̱ cyiiñ de̱, gun wagyicy du̱ de̱ de riidz ni Ñgyoozh gal nu ricy de mbecy nu ricy dalje̱z nu la coz, gun yu' zigy mbecy nu ni ricy yu. De̱ ya̱, lugaar nu ni gyicy de̱, lo la Ñgyoozh li rshaal de̱ de riidz nim. Gun mi ze' bzuu nez mi de̱ ya̱, nunu de̱ ya̱ nac du̱ de̱ Crisht nunu mi ze' nac num de̱ ya̱.

will be added

X\