2 Corintios 13

1Na tir chon nu yap güii der. Orze' benu tub mbecy riib yu cyi too losa'y, orze' rlagy ñi cyup o chon teshtig. 2Na rne̱e̱ ga̱' lo de yu nu bicy cyi gulas gal nu lo de' zir mbecy, gal nu mne̱e̱ byaj cyup nu byap güi̱i̱ de ru. Nunu rne̱e̱ ga̱' nu gyicy cuidad der, gun benu yapa̱ tuuba' tir, orze' segur la wazaana̱ ded ligaañ ni dey, 3gun de ru rlagy der nu lyu̱u̱ ni der nu ya̱ ne̱e̱ por cuen ni Crisht. Gun Crisht walab nu a̱' fert ricy num der, sinu ricy mi nu nap rabee nu dzi fert mi nu nac coz nu ricy num de ru. 4Gun mas a̱' fert mi ornu biit mbecy mi lo cruuz, tees mbañ mi nu nac nu dzi fert Ñgyoozh. Orze' ni' zi'l de̱ ya̱ a̱' ferta̱, tees lat nu nac de̱ mbecy nim, gac gyicy de̱ de coz nu rlagy ñi ni de ru nu nac nu Ñgyoozh dzi fert mi. 5Orze' bgüii der lac na ub ru, gun orze' gad lagy der ben a rzu fert der nu nac de coz ni Crisht. Orze' bicy der preb ub ru. ¿A wagad lagy der nu Jesucrisht cyiiñ mi nañ lardoo der? ¡Benu wagad lagy der nde', orze' wangyicy der gan preb ze'! 6Tees drish lo̱ lo der nu yad lo orze' gad lagy der nu walab nu wangyicy de̱ gan nu nac coz ni Crisht. 7Orze' de̱ ya̱ diñ de̱ lo Ñgyoozh nu cue' gyicy der ni tub la coz a̱' nap. Walab ti gun ni rne̱e̱ de̱ par nu gabe nu bicya̱ gan nu nac riiñ ni Crisht, sinu ni rne̱e̱ de̱ gun orze' de coz nap zi'l, nde' gyicy der. Wagyicy ñi presis ti gabe nu bicy de̱ gan. 8Gun de̱ ya̱ rila wacha̱ contr ni coz rishli, sinu tub lo zi'l nu rza̱ de̱ faboor ni coz rishli. 9Nde' nu yet lagy de̱ ornu wacyiiña̱. Ni' zi'l yeta' lagy de̱ ornu de ru dzi fert der. Orze' zaab rne̱e̱ du̱ la̱ de̱ Ñgyoozh nu nac de ru gun orze' gyanap der. 10Ya̱ pca̱a̱ gyicy ii anzir nu yap güi̱i̱ de ru, gun ornu yapa̱ lo der, orze' walagy ñi nu dzi fert gyicy du̱ der ornu gyicya̱ riiñ ni Shuaan den Jesuuz. Gun mi ze' bdu'm riiñ ze' ya̱a̱ nu locyuuba̱ de ru nu gal shcab ni der. Walab nu bdu'm riiñ ya̱a̱ de̱ par nu nit lo̱ de ru. 11Na der bicy na, ya̱ rlagya̱ nu dub gusht la cyiiñ der. Bloo lo der nu gac der mbecy gal nu rlagy Ñgyoozh. Bzuub gyidag der ni de consuel nu drica̱ ni der. Bicy der tub zi'l shcab. Nunu gu' der nu gyel ri zu. Orze' Ñgyoozh, biñ nu rca de mbecy, nunu biñ nu zeed gyel ri zu lat dey, mi ze' gac num de ru. 12Mnii der ñgyoozh nu losa'r gal mod nu rlagy ñi. 13Dela de mbecy ni Ñgyoozh zeed dey ñgyoozh ni der. 14Orze' Shuaan na Jesucrisht gyicy mi faboor nu nap gyicy num de ru. Nunu Ñgyoozh rcam der. Nunu Espiriit Yon nim gac num de ru.

will be added

X\