2 Corintios 12

1Se la la coz gyicy na gan benu riib zily na ub na. Mas ni, tees rlagy ñi nu ne̱e̱ de coz nu bicy Shuaan den Jesuuz nu mnii pcaala̱ gal nu de coz nu bicy mi nu bde' lo̱. 2Ya̱ yu' lo̱ tub mbecy ni Crisht nu bi bza' trotap ña'n byay gal gyibaa. Wagad lagya̱ ti ni gaal guc ñi, o ti pcaal zi'l bicy ñi nu bde' loy. Tub zi la Ñgyoozh rad lagy mi. 3Wagad lagya̱ ti nu cuerp la niy byay uti espiriit zi'l niy byañ. Nde' wagad lagya̱. Nomaas tub zi la Ñgyoozh rad lagy mi. 4Tees yu ze' byay gal gyibaa. Orze' güeñ yu coz nu wac gyañ nu riidz. Ni wad rishbeey nu gnii mbecy de coz ze'. 5Orze' ya̱ gac riib zilya̱ yu ze'. Tees ya̱ wariib zilya̱ uba̱. Nomaas ya̱ ne̱e̱ de coz nu gyicy ñi nu gabe nu wacyiiña̱. 6Nunu benu riib zilya̱ uba̱, orze' walab nu ricy tona̱, gun ya̱ rishli rne̱e̱. Par ya̱ wayicy zilya̱ uba̱, gun orze' cue' nu nii too mbecy nu ya̱ gya zir zu̱ gaze' mod nu bzac yu ze' nu zu̱ gal nu mod nu reñ dey nu rne̱e̱. 7Tees par nu tona' la coz ily bzaca̱, nde' nu Ñgyoozh briic mi tub güii ne̱ par nu cue' gyale̱'. Güii ze', nde' nañ gal na tub gyech nu ri nañ cuerp ne̱. Nde' nañ gal na tub coz nu ricy nuras par nu ricy ras yu nuy ya̱. 8Orze' chon tir bdiña̱ lo Shuaan den Jesuuz nu com güii nu ricy cupa̱ ze'. 9Orze' nam rab mi ya̱: “Ya̱ nap ricy du̱ ru. Orze' beñ nu nde'. Gun nap zir rabee nu ya̱ dzi ferta̱ nu nac nu ru wacyiiñ ru”, nam. Nde' nu yet zir lagya̱ nu naca̱ mbecy wacyiiñ, gun orze' gabe nu Crisht dzi fert mi nu nac ya̱. 10Nde' nu yet lagya̱ nu nac nu wacyiiña̱. Yet lagya̱ benu gab zi mbecy ya̱. Yet lagya̱ benu wagad de coz cyiiñ ne̱. Yet lagya̱ benu shet zi mbecy ya̱. Yet lagya̱ benu deet zaca̱ nu nac Crisht. Gun ornu ya̱ dzi zir wacyiiña̱, orze' naca̱ mbecy nu fert zir. 11Ya̱ bicya̱ gal nu ricy mbecy ton ornu bicy zilya̱ uba̱, tees de ru bicy ru nu bicya̱ ñii. Gun de ru yad ñi ni der nu gyicy zily ru ya̱. Gun walab nu sac zir de aposht lily nu za ca der ich ze' gaze' ya̱, mas ya̱ se la la saca̱. 12Gun ya̱ nu pase̱z bicya̱ riiñ lat der. Orze' bicya̱ coz ily. Nunu bicya̱ nusuriidz. Nunu bicya̱ coz nu cha nu ic mbecy. Orze' de nu nde' ricy ñi nu rabee nu rishli naca̱ tub aposht. 13Orze' bicy sulagy der ne̱ benu a̱' nap bicy du̱ de ru. Gun de ru gash zir zu der gaze' de' zir mbecy ni Crisht nu nac tub zi coz. Coz ze', nde' nu wantiña̱ coz nu cyiiñ ne̱ lo der. Orze' bicy sulagy der ne̱. 14Na bi zu lilya̱ nu yap güi̱i̱ de ru byaj chon. Nunu ni' zi'l wadiña̱ coz nu cyiiñ ne̱ lo der. Gun coz nu rlagya̱, nde' ub la de ru. Walagya̱ coz nu yu' ni der. Gun yu nguzh wacuic dey coz cyiiñ ni de mbel niy, sinu de mbel, yu ze' rbic yu de coz nu cyiiñ ni i'ñ yu. 15Ya̱ “O” ne̱e̱ laazha̱ dela coz nu yu' ne̱, nunu mas gashtal glaazha̱ uba̱ par nu locyuuba̱ de ru. Rlyu nu ornu ya̱ dzi zir rca̱ de ru, orze' de ru dzi zir waca der ya̱. 16Orze' ya̱ walab nu byub la̱ too der. Mas ni, tees yu' mbecy nu rniiy nu bgu̱u̱ de ru par nu gyicya̱ gan der. 17¿Walab gaal nu bgu̱u̱ de ru nu nac tub mbecy nu bzuu neza̱ nu biid yu lo der? 18Mnishba̱a̱ lo Tito nu cyid güiiy de ru. Nunu bzuu neza̱ tuuba' bicy na nu nac Crisht ze' nu cyid nu dey yu. ¿Walab gaal bguu Tito de ru? ¿Walab gaal rup la̱a̱ nu Tito ricy de̱ tub zi'l mod, nunu zu̱ de̱ tub zi'l shcab? 19Cyup riidz de ru rnii too der nu de̱ ya̱ zaab ryuub la de̱ mod par nu gabe nu sac falt ne̱. Tees walab ni, sinu rne̱e̱ de̱ de coz nu rlagy Crisht par lo Ñgyoozh. Nunu de ru bicy de̱ nu dzi rca̱, dela coz nu ricy de̱ ricy de̱ ñii par nu locyuuba̱ de ru. 20Ya̱ rdziba̱ ornu yap güi̱i̱ der, orze' zaca̱ der nu reña' mod ricy der gaze' mod nu rlagya̱. Rdziba̱ nu zac der ya̱ nu reña' mod na̱ gaze' mod nu rlagy de ru. Rdziba̱ nu zaca̱ nu deet yu' der nu losa'r. Zaca̱ nu rasaap lagy der. Zaca̱ nu rcha' ic der. Zaca̱ nu bigy lagy der. Zaca̱ nu rnii der rishcuen. Zaca̱ nu rnii zi der ni losa'r. Zaca̱ nu nac der mbecy le'. Zaca̱ nu wagyicy der gal mod nu rlagy ñi. Ni' zi'l rdziba̱. 21Rdziba̱ ornu yapa̱ tuuba' tir, orze' Ñgyoozh gyicy mi nu gat lo̱ nu nac de ru. Nunu gyicya̱ sentiir nu nac de mbecy nu bicy coz cyi, ze' wanne' dey cyi nu bicy yu. Gul dey biñ mñaa nu wanchelaay. Bicy dey de cyi ni biñ mñaa.

will be added

X\