2 Corintios 11

1¡Dzi ga nap benu gyicy cup der pase̱z ne̱ nu nac coz ton nu ricya̱! 2Ya̱ dzi drusha̱ shcab nu nac de ru. Tees Ñgyoozh bicy mi nu ni gyicya̱. Orze' de ru nar gal nu na tub fiñ feñ. Ze' ya̱ na̱ gal nu na de uz der. Ya̱ bi brica̱ rishnii nu chelaa der tub zi yu gyeey. Mi ze' Crisht. Orze' ya̱ rlagya̱ rica̱ der gal nu na tub fiñ feñ yon nu sac la falt ni nu chelaa der Crisht. 3Tees ya̱ rdziba̱ nu gzac der gal nu bzac Eva. Orze' bily ze', nu nac nu dzi lily na ma par nu guu ma, bicy ma gan bguu ma Eva. Orze' rdziba̱ nu ni' zi'l gyicy nuras nu gadza shcab ni de ru. Orze' checa der nu rcar Crisht nu rishli gal nu mod nu rlagy ñi. 4Gun de ru dub gal rii la lagy der “O” rniir ni cyu zi'l mbecy nu ryiid nu rzat reña' Jesuuz, walab Jesuuz biñ nu rzat de̱ ya̱. Nunu dub gal rii la lagy der “O” rniir ni tuuba' espiriit nu walab Espiriit Yon ni Ñgyoozh biñ nu guud ni der nu nac de̱ ya̱. Nunu “O” rnii der ni tuuba' riidz nu rniiñ lac mod gruu mbañ mbecy ze' walab gal nu na de riidz nu pshaal de̱ ya̱. 5Tees ya̱ rze̱e̱ nu walab ich zab de̱ par de aposht lily nu za ca der ich ze'. 6Mas a̱' cyit za riidz nu rne̱e̱, tees yu' shcab ne̱. De mod la bicy de̱ nu gad lagy der nu yu' shcab ne̱ dub laa tiem nu nac de coz nu bicy de̱ lat der. 7Ya̱ wanlo̱o̱ i̱ ornu pshaala̱ de riidz nu sac ni Ñgyoozh lat der, sinu bicya̱ gyel gyidz ne̱, gun orze' ya̱ bicy lilya̱ de ru. ¿A shiñ bicya̱ rzii der? 8Ya̱ blo̱o̱ tiñ lo reña' mbecy ni Crisht par nu gad mod nu gyicya̱ riiñ ni Ñgyoozh lat de ru. Nde' nañ gal nu na nu bicy gubaana̱ ñii par nu locyuuba̱ de ru. 9Lat nu gusa̱ lat der, orze' wantiña̱ tiñ lo ni tub la der ornu ñgyalagy ñi. Tees de bicy na nu nac Crisht nu yu' gashtal Macedonia briic dey de coz nu ricy falt ne̱. Orze' ya̱ bicya̱ tub mod nu cue' nu gyicy der gasht nu nac ya̱. Nunu zaab gyicy la̱ mod ze' par lo. 10Gal nu rad lagya̱ de coz ni Crisht, orze' rishli gaal washet ica̱ nu soow ni tub la mbecy Acaya ru̱' nu nac coz nu mne̱e̱ ze'. 11¿Lagu ni rne̱e̱? ¿A nde' gun ya̱ walab nu rca̱ de ru? ¡Walab! Ñgyoozh rad lagy mi nu rca̱ de ru. 12Orze' ya̱ zaab gyicy la̱ de coz nu bi ricya̱, gun orze' cue' nu grica̱ mod ni de mbecy ze' nu gnii dey nu gal gaa la zuy nu de̱ ya̱. 13Tees de yu ze' a̱' nac dey aposht nu rishli, sinu nac dey aposht fals. Nac dey mbecy rguu. Nu ricy zi'l dey nu nac yu aposht ni Crisht. 14Tees cue' cha du ic den nu nac nde', gun gaza' nuras ricy yu nu nac yu anc nu rlyuu yaa. 15Orze' nde' walab la coz ily, benu de moz ni nuras gyicya' dey nu nac yu mbecy nu ricy mod nu se'ñ. ¡Tees ornu lazh shup dey laz yu, orze' gyad i dey gal nu yad ñi! 16Ne̱e̱ lo der tuuba' tir: ni tub la mbecy cue' nii too dey nu naca̱ mbecy ton. Tees benu de ru ni rnii too der, orze' bzaan la der nu ne̱e̱ gal nu rnii mbecy ton, gun orze' ya̱ gyicy zilya̱ uba̱ gal nu ricy de yu ze'. 17Riidz nu rne̱e̱ na, walab nu rne̱e̱ ñii por mandaar ni Shuaan den, Jesuuz, sinu ornu driib zilya̱ uba̱, orze' rne̱e̱ mod nu rnii mbecy ton. 18Tees como yu' zigy mbecy nu ricy zily yu ub yu nu nac mod ni mbecy gyishlombecy ii, orze' ni' zi'l ya̱ gyicy zilya̱ uba̱. 19De ru rzii der nu nac der mbecy siñ too, orze' nde' nu bicy cup der pase̱z nu tub mbecy ton. 20Ricy cup der pase̱z nu mbecy, benu gyicy yu de ru par moz niy. Ricy cup der pase̱z nu mbecy, benu gyicy yu gan de ru. Ricy cup der pase̱z nu mbecy benu guuy de ru. Ricy cup der pase̱z nu mbecy benu gyicy ñgyay lo der. Ricy cup der pase̱z nu mbecy mas cyich la yaay ya lo der. 21Ya̱ rat lo̱ nu ne̱e̱ lo der, ¡tees a̱' ricy cup de̱ baloor nu ni gyicy de̱ gal nu ricy de yu ze'! Tees benu ca na tub mbecy cuic yu baloor nu riib zily yu ub yu, orze' ni' zi'l ya̱ rica̱ baloor nu gyicy zilya̱ uba̱, nomaas na rne̱e̱ mod nu rnii mbecy ton. 22De yu ze', ¿a nac dey mbecy hebreo? Ni' zi'l ya̱ naca̱ mbecy hebreo. De yu ze', ¿a nac dey mbecy Israeel? Ni' zi'l ya̱ naca̱ mbecy Israeel. De yu ze', ¿a nac dey nez Abraham? Ni' zi'l ya̱ naca̱ nez Abraham. 23¿A ricy dey coz nu rnii Crisht? Ya̱ dzi zir ricya̱ de coz nu rniim, mas rlyu nu naca̱ mbecy ton ornu ni rne̱e̱. Ya̱ fert zir bicya̱ riiñ ni Crisht gaze' de yu ze'. Zañ zir tir mne' mbecy ya̱ nañ yu' gyiib. Zañ zir tir bgaaz dey ya̱ nu cuart. Nunu zañ zir tir nu bi zu la̱ lo rishdzidz nu ñgyata̱. 24Gaay poras de mbecy Israeel pshet dey cuart icha̱. Gal rub tiiñ zu tap yaa pshet dey icha̱ tub ga poras lo gaay tir ze'. 25Chon poras de mbecy bgaaz dey ya̱ nu yag. Ze' tub tir bgoow gyita' dey ya̱ nu bicy pee dey nu ñgyut yu ya̱. Chon tir ri̱ nañ barc ornu wes tiñ lo nis. Se nu ñgyat zi'la̱ nu nac nis. Tub tir bzaba̱ lo nisyudoo tub dzi nu tub rel. 26Lo zañ byaj nu gusa̱ zaab zu̱ la̱ lo rishdzidz nu nac gyoow ily. Zaab zu̱ la̱ lo rishdzidz nu nac gubaan. Zaab zu̱ la̱ lo rishdzidz nu nac de losa̱' mbecy Israeel. Zaab zu̱ la̱ lo rishdzidz nu nac mbecy nu walab mbecy Israeel. Bzu̱ la̱ lo rishdzidz lat gyedz. Nunu bzu̱ la̱ lo rishdzidz ngush. Bzu lo lo rishdzidz lo nisyudoo. Bzu̱ la̱ lo rishdzidz nu nac amig fals ne̱. 27Tona' la fers bicya̱ riiñ. Yu' gashtal gut ziñ la̱. Zañ tir guch pcaala̱. Yu' nu byana̱. Yu' nu wangad nis do̱'. Zañ tir wangad coz nu da̱w. Yu' nu guzilya̱. Yu' nu bicy falt shaba̱. 28Yu' zañ coz nu wansata̱ lo der. Tees de dzi la deet rac nañ lardo̱o̱ nu nac nu rsug ica̱ nu nac dela mbecy ni Crisht. 29Benu tub mbecy rat yu, orze' ni' zi'l nañ gal nu na nu rat ya̱. Benu cyi gyicy ni gan tub mbecy, orze' dzi rac nañ lardo̱o̱. 30Tees benu rlagy ñi nu gyicy zilya̱ uba̱, orze' nap zir nu zata̱ de coz nu gyicy ñi nu gabe nu naca̱ mbecy wacyiiñ. 31Ñgyoozh, Uz Shuaan den Jesucrisht, rlagy ñi nu gyabic den gyel mbecy nim dub laa tiem. Mi ze' rad lagy mi nu ya̱ rishli rne̱e̱. 32Orze' tub tiem lat nu pcyiiña̱ gyedz Damasco, orze' yu nu riib ic por cuen ni rey Aretas mniiy lo de mbecy nu ña dey dela ro' ni lo' nu zu dub yub la ru' gyedz ze', gun orze' cub dey ya̱ nu cha nuy ya̱ pres. 33Tees bruu su la be mbecy gua nu dey ya̱ ze' nu ca tub bentan ni lo' ze'. Orze' ze' bloo dey ya̱ par ich. Nañ tub chicyiw pshet dey ya̱ tub la' ga' ich lo' ni gyedz ze'. Orze' ni mod briib dze̱ lo yu nu riib ic ze'.

will be added

X\