2 Corintios 10

1Ya̱ Baly. Yu' mbecy nu rniiy nu ornu zu̱ lat dey, orze' naca̱ mbecy gyidz. Ze' ornu saca̱ lat dey, orze' dzi balienta̱, rnii dey. Orze' ya̱ do̱o̱ rishlo der, nu nac nu Crisht dzi gugy nam nunu dzi nap mi, 2orze' cue' gyicy der nu gyicya̱ gyel balient ne̱ ornu yap güi̱i̱ der. Gun ni gyicy du̱ la be mbecy nu rnii nu ricya̱ riiñ nu nac shcab ni mbecy zi'l, rnii dey. 3Rishli gaal nac de̱ mbecy zi'l. Tees wachuco̱o̱ de̱ gal nu rucoo mbecy ni gyishlombecy ii ornu rza̱ de̱ contr ni nuras. 4Gun de su̱u̱ de̱ nu rza du̱ gyel yuu, nde' walab coz ni gyishlombecy ii, sinu nde' de coz ni Ñgyoozh. Nunu cyiiñ ñi par nu tiily ñi de lugaar nu rsoow de losa' yu̱u̱ de̱. Orze' ni mod gyicy de̱ par nu nit lo de cyi fals nu driib mbecy ica̱. 5Nunu gyicy de̱ nu nit lo la zi'l coz nu rsoow lo de coz rishli nu rad lagy de̱ ni Ñgyoozh. Orze' ricy de̱ tub mod nu zuub gyidag de̱ ni Crisht nu dela shcab nu drush de̱. 6Bi zu̱ la̱ de̱ nu rica̱ cashtig ni dela mbecy nu wacsuub gyidag ni Crisht ornu bi byanap la rzuub gyidag der nim. 7De ru nu rgüii zi'l der lo tub mbecy, orze' rnii too der la nay. Orze' benu tub mbecy rad lagy yu nu rishli nac yu mbecy ni Crisht, orze' ni' zi'l rlagy ñi nu gad lagy yu nu de̱ ya̱ naca̱ mbecy ni Crisht. 8Mas ya̱ gyabica̱ gyel mbecy ni uba̱ nu nac riiñ nu bdu' Shuaan den Jesucrisht ya̱a̱, tees rila wagat lo̱. Gun mi ze' bdu'm riiñ ze' ya̱a̱ par nu gyicya̱ nu gyafert zir gyicy cup der consuel lom, walab par nu gyicya̱ nu nit lo der. 9Walab nu rlagya̱ nu rlyu nu rchiiba̱ de ru nu nac gyicy nu bzeeda̱ lo der. 10Yu' mbecy nu rnii dey nu dzi fert za de riidz nu bzeeda̱ lo der. Tees rnii dey nu ornu zu̱ lat dey, orze' wacabee ti lily na̱. Nunu de riidz nu rne̱e̱ se la la sac ñi, rnii dey. 11Tees de mbecy nu ni rnii rlagy ñi nu gad lagy dey gal nu rne̱e̱ de̱ lo de gyicy nu rzeeda̱ lo dey ornu saca̱ lat dey, orze' ni' zi'l gyicy de̱ ornu yapa̱ lat dey. 12De̱ ya̱ walab nu rne̱e̱ nu gal gaal la zu̱ nu de mbecy nu ryabic gyel mbecy ni ub zi'l ze'. Ni wasaap de̱ uba̱ gal nu na de mbecy ze'. Tees de yu ze' ricy ton dey ornu rgüii dey nu la na ub yu nu nac shcab ni ub zi'l yu, nunu ornu rsaap dey ub yu nu de losa'y. 13Walab nu ricy zily de̱ uba̱ tub mod nu walab se'ñ. Tees ricy zily de̱ uba̱ nu nac riiñ nu bdu' Ñgyoozh ya̱a̱ de̱. Nu nac nde' zi'l ricy zily de̱ uba̱. Nunu bdu'm riiñ ya̱a̱ de̱ nu gyicya̱ riiñ mas gashtal lat de ru mbecy Corinto. 14Nde' nu walab nu bicy de̱ tub mod nu walab se'ñ ornu byap de̱ nu loga la lat de ru nu pshaal de̱ de riidz ni Crisht. Gun bdu'm riiñ yaa de̱ nu gyicya̱ riiñ ze' lat de ru. 15Nunu wagyicy le̱' de̱ nu nac riiñ nu ricy reña' mbecy, gun benu ni ñgyicy de̱, orze' ruu chu̱ de̱ lo riiñ nu bdu' Ñgyoozh ya̱a̱. Lugaar nu ñgyicy de̱ nde', orze' drish lo̱ de̱ nu gad zir riiñ nu gyicy de̱ lat de ru dub gal nu yafert zir ricy cup der consuel lom. Tees dub laa tiem riiñ nu bdu' zi'l Ñgyoozh yaa de̱, nde' zi'l riiñ nu ricy de̱. 16Ni' zi'l drish lo̱ de̱ nu gad zir riiñ nu gyicy de̱ nu cha shaal de̱ de riidz nu cuic gyel mbañ de lugaar nu zet zir gaze' de ze' nu yu' de ru, gun orze' cue' nu gyicy de̱ riiñ ze' nu ricy reña' mbecy riiñ, gun orze' cue' nu gyicy le̱' de̱ nu nac riiñ nu bicy reña' mbecy. 17Orze' benu ca na tub mbecy rlagy yu riib zily yu tub coz, orze' rlagy ñi riib zily yu Ñgyoozh, Shuaan den. 18Gun benu mbecy riib zily yu ub yu, orze' wacyiiñ ñi. Tees benu Ñgyoozh riib zily mi yu, orze' gaze' nu cyiiñ ñi.

will be added

X\