2 Corintios 1

1Ya̱ Baly, yu nu bzu Ñgyoozh nu gac aposht ni Jesucrisht. Ni bicy mi, gun nde' coz nu rlagy mi. Ya̱ nu biicy na Timoteo zeed de̱ gyicy ii lo de mbecy ni Ñgyoozh nu yu' gyedz Corinto nunu lo dela de mbecy ni Ñgyoozh nu yu' lo de yu ni Acaya. 2Ñgyoozh Uz na nu Shuaan den Jesucrisht gyicy dem faboor nu nap gyicy num de ru, nunu gyicy mi nu cheti ri añ ni der. 3Orze' gyabic den gyel mbecy ni Ñgyoozh, Uz Shuaan den Jesucrisht. Mi ze' Uz na, biñ nu gushni lagy de ub na. Mi ze' Ñgyoozh nu rbic consuel ni den. 4Dela lat tiem nu deet rzac na, orze' Ñgyoozh rbic mi consuel nin. Orze' nu nac consuel ze' cyiiñ den nu gric na consuel ni mbecy nu rzac de lo la coz deet. Gun laaba' consuel nu briic mi ni den, laaba' nde' gric na ni de mbecy. 5Gun gal nu Crisht bzac zim, ni' zi'l zac zi ga' den nu nac mi. Tees ni' zi'l Ñgyoozh cuic zir mi consuel ni den nu nac Crisht. 6Gun benu de̱ ya̱ zac deet de̱, nde' cyiiñ ñi par de ru, gun orze' Ñgyoozh cuic mi consuel ni der, nunu co mbañ mi der. Como Ñgyoozh rbic mi consuel ne̱ de̱ ya̱, ni' zi'l cuic mi consuel ni de ru. Locyuub mi der nu gagyer nu pase̱z ornu gzac deet der gal nu bzac de̱ ya̱. 7Orze' de̱ ya̱ tona' la drish lo̱ de̱ lo der nu waya' ich der, gun nap rad lagy de̱ nu gal nu bzac deet de̱ ya̱, ni' rzac deeta' de ru. Orze' ni' zi'l gal nu briic Ñgyoozh consuel ni de̱ ya̱, ni' zi'l cuica'm consuel ni de ru. 8Na der bicy na, rlagy de̱ gyicya̱ nu gyeza' lagy der de coz deet nu bzaac de̱ lat nu gusa̱ de̱ lo de yu ni Asia. Par nu tona' la coz ily bzac de̱, orze' blazh consuel ne̱ de̱ par nu cyiiña̱ gyishlombecy ii. 9Guze̱e̱ de̱ nu na̱ gal nu na tub pres nu bi zuu la nu gat. Orze' ni bzac de̱ par nu gad lagy de̱ nu cue' gyicy cup de̱ consuel lo uba̱, sinu gyicy cup de̱ consuel lo Ñgyoozh, biñ nu gyicy nu gyabañ mbecy. 10Ñgyoozh bi bloom de̱ ya̱ lo tub rishdzidz ily nu rlyu nu bi gat la de̱, nunu co napa'm de̱ ya̱ par lo. Orze' gyicy cupa' de̱ consuel lom nu co napa'm ya̱, 11benu de ru locyuub der de̱ ya̱ nu cyiñ der lo Ñgyoozh nu nac de̱. Orze' benu zigy mbecy rnii nu dey Ñgyoozh nu nac de̱ ya̱, orze' ni' zi'l zigy mbecy rbic dey gras nim nu nac nu nap bicy num de̱. 12Yu' tub coz nu ricy ñi nu tona' la yet lagy de̱. Coz ze', nde' nu rad lagy de̱ nañ lardo̱o̱ nu nap bicy du̱ de̱ de ru gal nu dela de' zir mbecy. Bicy du̱ de̱ der nu gyel cacy. Nunu naal la rabee coz nu bicy du̱ de ru. Walab nu bicy du̱ de ru tub mod nu bruu nañ shcab ni uba̱, sinu bicy de̱ tub mod nu bruu lo Ñgyoozh. Gun Ñgyoozh bicy mi faboor nu blocyuub mi de̱ nu ni bicya̱. 13Orze' lo gyicy nu rzeed de̱ lo der rca̱a̱ de̱ tub lo zi'l riidz nu gac sya' der nunu nap gyet lag der cuen. Nunu drish lo̱ de̱ nu par lo nap gad lagy der 14ornu shuub dzi nu cyid Shuaan den Jesuuz, gal nu gyet lagy de̱ ya̱ nu nac de ru, orze' ni' zi'l gyet lagya' de ru nu nac de̱ ya̱. Nde' tub coz nu gad lagy der ñuu ga zi tiem na. 15Nu nac nu ya̱ rad lagya̱ nu de coz ze' nde' segur la, nde' nu ya̱ bicy pe̱e̱ nyapa̱ lo der loga la, gun orze' cyup tir yapa̱ locyuuba̱ der. 16Gun ya̱ bicy pe̱e̱ nyap güi̱i̱ de ru loga la nez nu ñgya̱a̱ Macedonia. Na or mbish cya̱, nyap güi̱i̱ ga̱' de ru tuuba' tir. Ni bicy pe̱e̱, gun orze' de ru gac locyuub der ya̱ nu gad coz nu cyiiñ ne̱ ni byaj nu cha̱ Judea. 17Ornu mne̱e̱ nu ni gyicya̱, ¿a mnii too der nu ya̱ bicy cyup ica̱? ¿Uti mnii too der nu ornu ya̱ rloo ica̱ ben lac gyicya̱, orze' ryuba̱ tub mod rguu? ¿A rne̱e̱ de̱ nu “Bi yap la de̱”, ze' laab tiem ze' rne̱e̱ ga̱' de̱ nu “Wayapa̱?” 18Ñgyoozh rad lagy mi nu wagne̱e̱ de̱ nu “Bi yap de̱”, orze' laab tiem ze' rne̱e̱ ga̱ de̱ nu “Wayapa̱.” De̱ ya̱ a̱' ne̱e̱ de̱ rup laa coz ze' nañ tub tiem zi'l. 19Gun Jesucrisht, I'ñ Ñgyoozh, biñ nu rzat Silvano, nu Timoteo, nu ya̱, mi ze' a̱' nac mi tub biñ nu ricy cyup ic, sinu dub laa tiem ricy mi coz nu rnii Ñgyoozh. 20Gun Crisht bicy yac mi ni dela riidz nap nu mnii Ñgyoozh nu segur la gyicy mi. Nde' nu ornu ryabic den gyel mbecy ni Ñgyoozh nu nac Crisht, orze' rnii den: “Laab ni gac ñii.” 21Orze' laab Ñgyoozh bicy mi nu gad lagy de̱ ya̱, gal nu de ru nañ lardoo den nu nac num den, nunu laab Ñgyoozh bloo sum den nu gac naa nim. 22Orze' briic mi Espiriit Yon nim ni den. Mi ze' nam gal nu na tub sey par nu gabe nu nac naa nim. Briic mi mi ze' ni den nu loga la par nu gabe nu cuic mi de coz ni den par lo. 23Gun Ñgyoozh neñ mi nu wancha̱ Corinto gal nu mnii to̱o̱ gun ya̱ rze̱e̱ nu a̱' nap par de ru benu ñgya̱a̱. 24Walab nu rlagy de̱ nu por fers la cheña lagy der de coz nu gne̱e̱, gun de ru bi rzu fert der nu nac de coz ni Crisht. Coz nu rlagy de̱, nde' nu gyicya̱ riiñ tublaazh la nu de ru, gun orze' zu cyit lagy der nu nac de riiñ nu gyicy den.

will be added

X\